Read Maru 2 KHO:KHAM 6 Bible Online

2 KHO:KHAM 6 - Maru bible

2 KHO:KHAM 6

¹Daba na mae lapa phung: mae" au: jhaung wa Elisha re- ngonhaung" na: ra" jo, qo wa saung" ngai: ra".

²Ngonhaung" na jo, qo kad' nae" qhid' mae" Yodan gyaung: khyo sag' yethau: yu nae" ngonhaung" re akhang" byid: la,- ga: nyhung: ra". Ailao"- Elisha wa gai:- ga: tau" ra".

³Yao: bam mae" dayaug yao: re ai bam we' cao: ye: nae" jhan: mung: yao: re: myid vang" ra".

⁴Yao: bam daga" ye" lo" ako". Yao: bam Yodan gyaung: khyo joe" ye: gelao"- mau" yezaui" ako".

⁵Yao: bam mae" dayaug wa sag' gae re thau: lhang" ke' ra". nyag din taung" yao" vozaung: qid khyo byid: gyo" vao lo" ra". Ailao"- yao: wa Elisha re ngo pe" ru: kad' nae" i? ai wa ngho" ci: ra" vozaung: ngad: ga: tau" ra".

⁶Elisha wa- khotau gyo" lo" ra" i? ga: myid' ra". Aiyaug wa yao: re jo, qo ta" shid' ra". Ailao" Elisha wa sag' khyaung: dakhyaung: re phyid' yu mung: aire qid khyo pye' zaui: ke' ra". Vozaung: wa adao khyo myung: do, li" ra".

⁷Elisha wa xoe: yu wa,- ga: amyin" byid' ra". Aiyaug wa gam" gyo" mung: xoe: yu: ra".

⁸Suri kho:kham wa Israel byu qe we' gyekhe' ra". Yao" gyezug: qe we' byin phyo: jho" qham mung: yao: jamu kad' nae" jo, qo re khyin: ra".

⁹Ngadqere: Elisha wa Israel kho:kham pho" re ai: jo, qo khyo date' ye:- pe"mung:ga"re Suri byu qe wa ai: jo, qo mae khug' lham: na: ako"- ga: ta" peim" ra" dao: pyang: ke' ra".

¹⁰Aimung: Israel kho:kham wa ai: jo, qo mae na: ra" mo, re ta" peim: mung: yao: bam lha" na: ako". Cere" ru: myo: sho' lhang boe" ra".

¹¹Suri kho:kham wa ceru: boe" rure gyai nhag' lam: mapyo: ngad: ra". Yao: wa yao" zug: qere khai: yu mung: yao: bam re naonhaung" mae" khoyaug lam: Israel kho:kham nho: byu ngad ko" i? ga: myid' ra".

¹²Yao: bam mae" dayaug wa ASANG kho:kham we"- khag' mangad:- lapa Elisha wa naoyao" kug qe, mae sae za: khug' ta" ra" dao: re lhao" re:- Israel kho:kham re ta" kyo: byid' ra"- ga: ta" ra".

¹³Kho:kham pho" wa yao: khai: mae na: rure qho ge,- ngo yao: re taung" yu nae"- ga: ta" ra". Elisha Dothan mae na: ra" ga: yao: re ta" kyo: gelao".

¹⁴Yao: wa gyephung: qi we' myao: jham- gyekhe' myao: lhin" jham re aikhyo nhao: ke' ra". Yao: bam wa vogaung: khyo myi" re joe" ye: mung: yevang" ci: ako".

¹⁵Thao: ba ne,seim no' Elisha nho: daui daui yaug so" li" mung: yham mae" thug' lo" re Suri gyezo: qe wa myao: jham- gyekhe' myao: lhin" jham we' vogaung: re vang" ci ko" rure ye myao: ra". Yao: wa Elisha jhao" dam: lo" mung: ASANG we"- ngonhaung" wa jeim: va"- ngonhaung" pe" ru: kad' zai i? ga: ta" ra".

¹⁶Elisha wa dagyaug wa,- yao: bam: shad' mae tho' ngonhaung" shad' mae na mo, je: myao: ga: tau" ra".

¹⁷Ai: thao yao: wa o" ASANG we"- yao" myo, jid' re phung" byid: mung: yao: re myao nhao wa,- ga: akyu" mho' ra". ASANG wa Elisha nho: akyu" mho' dao: re tae" gyo: byid' ra". Elisha nho: daui daui yaug tau: qu" ke' re- bug gaung khyid mae myao: jham- gyekhe' myi: myao: lhin" jham byang" jo, mung: Elisha lhang" gam: mae na: jo, ko" rure myao: ra".

¹⁸Suri byu qe khe' zin" li" gelao" Elisha wa- o" ASANG we"- ai byu qere myo,jid nhao wa,- ga: akyu" mho' ra". ASANG wa yao" akyu" mho' dao: re tau: byid: mung: yao: bam re myo, jid nhao: ra".

¹⁹Ai: thao Elisha wa yao: bam jhao" ye: mung:- naonhaung" khyonghung: nghung" ako". Ce: vogaung: wa naonhaung" qho: na: ra" vogaung: mangad:- nga" thao: cao" ge,- naonhaung" cao" qho: na ko" ra" yaug jhao" ngo jhui" ye: nae" ga: ta" mung: yao: wa Samari khyo jhui" lo" ra".

²⁰Yao: bam vomo" khug khyo vao ye: we' Elisha wa ASANG we"- yao: bam: myo,jid' re phung" byid: mung: myao nhao wa,- ga: akyu" mho' ra". ASANG wa yao" akyu" mho' dao: re tau: byid' ra". Yao: bam: myo, re dam: myao nhao mung: yao: bam Samari vogaung: khug mae ngad: jo; rure yao: bam myao: ako".

²¹Israel kho:kham pho" wa Suri byu qere the' myao lao" Elisha re- ASANG we"- ai bam re ngo se' pye' zai i? Aibam re ngo se' zai i? ga: myid' ra".

²²Elisha wa dase'- gyekhe' rumae nao the' taung" yu ra" gyezo: qere lhao" re: nao mase' pye' ngad: ra". Yao: bam re zo:ve we' shaug' qid byid: jhaug' wa,- yao: bam re yao: bam: kho:kham jhao" dam: tug' lo" nhao wa,- ga: ta" ra".

²³Aimung: Israel kho:kham pho" wa yao: bam re zo: shaug' poe aqi: da" zho: mung: yao: bam bin zo: bin: shaug' gethao re Suri kho:kham jhao" yao: bam re dam: nhao: ke' ra". Ai: ba na mae" Suri byu qe wa Israel mung" re gyekhe' ru thang: pye' ako".

²⁴Dayo, kyo thao re- Suri kho:kham Benhadad wa yao" gyetab alhab' re jhui: mung: Israel re gye kad' yang: Samari vomo" re vang" ci: ra".

²⁵Airu: vang" ci: ruyang vomo" khug mae zo:ve xo sho' bao" khug' khug' byaug: ra". Loze au: dalam: wa ngaui she' xe kye'- phaung" kyug' khyid' dabye: re ngaui din" ga" ngo" lam: phug' ra".

²⁶Israel kho:kham pho" wa vomo" vang dao khyo" su" lai: lo" au: myiqe: dayaug wa ASANG kho:kham we"- ngore bao" yu la,- ga: gyi: hug' ra".

²⁷Yao: wa ASANG nao re mabao" re wa ngo nao re pe" qo" bao" thaug' byid: nae" i? Ngo wa jung: gaug we' sabyi qang: qo" ra" i?

²⁸Ni" qug khai: qug: khai: pe" ngad: i? ga: tau" ra". Yao: wa daba: ne, ce: myiqe: myhi" wa nga" zo: re zo: mung: thao: ba re yao: zo: re zo: lang: ga: pha,jhi" byid' ra".

²⁹Aimung: nga" shid' yaug nga" yauggai zo: re yhung: zo" pye' va". Thao ba ngo yao: re yao" yauggai zo: re zo: lang: ein: ngo ta"- ngadqere: yao: wa yao" yauggai zo: re nyham" pye' ra"- ga: tau" ra".

³⁰Cere the' gyo: lao" kho:kham pho" wa nhag' ngai: ru we' yao" mai bau: re lao" cad' pye' ra". Vang nhae mae te' na: ra" mo, wa yao" mai bau: akhug mae jid: mo" mai bau: ve; ci rure the' myao: ako".

³¹Ce: ba magyam shire Elisha nho: au: re ngo maphyid' pye' byid: re wa Mao"So ngore se' pye' vashao:- ga: ta" ra".

³²Amung: yao: wa Elisha re yetaung" yu nae" lagyo: nhao: ke' ra". Ai: ayo, mae Elisha wa yao: jhao" lae" li" ko" ra" lau: de, daqhae: we' daga" yham mae na: jo; ra". Kho:kham pho" nho: lagyo: majoe" li" shire Elisha wa ai: lau: de, qere- ai: byu se' yaug wa ngore li" se' nae" byu nhao: ke' ava". Ana" yao: cekhyo joe" li" lao"- kham: pyid' pye' ge,- yao: re davao li" nhao ge,- kho:kham pho" yao: re: yao" nhaung thao" mae ngad: ra"- ga: ta" ra".

³³Yao: cedao: ta" qug' na: au:- kho:kham pho" joe" li" mung:- ngonhaung" re ce: qug: khai: boe" nhao yaug wa ASANG yao: ngad: ra". Ngo pe"mung: daja: ja: kad' nae" yao: re lao" na lo nae" i? ga: ta" ra".