Read Maru 2 KHO:KHAM 7 Bible Online

2 KHO:KHAM 7 - Maru bible

2 KHO:KHAM 7

¹Elisha wa ASANG ta" ra" dao: re tae" gyo: wa,- ne, mo" ba ce: ayo, mae nao wa Samari vogaung: mae gai: thao" ra" jung: gaug dajig we' bale gaug daphai" re ngaui dakye' yang qo" vai: yu li" nae"- ga: ta" ra".

²Kho:kham pho" nho: lagyo: pho" wa Elisha re- ASANG yao: yao: ai jao" yao: gaug zo re khyo" byid' re lhao" re: airu: magai: boe"- ga: tau" ra". Elisha wa nao wa airu: boe" rure the' myao: li" nae". Ngadqere: nao aire qhug' zo: nae" mangad:- ga: phaug' tau" ra".

³Mao gae: de; ra" byu byid yaug wa Samari vogaung: kham mo" taung gaung shad' mae na: ako". Yao: bam yao: cao:- ngonhaung" shid sho' pe"mung: cemae lao" na zai i?

⁴Vogaung: khyo vao lo" nae" pe" lajheim: mabo- pe"mung:ga"re aimae ngonhaung" lo" moe' shid zai za: ngad: ra". Ngonhaung" cemae na: jo, ngadqere: ngonhaung" wa shid zai za: angad:- aimung: Suri byu qe: jamu khyo ye: gelang:- xo: thao" wa yao: bam ngonhaung" re se' pye' li" genae". Ngadqere: yao: bam ngonhaung" re kao so' daui: na nhao ko" maba ga: jho" ta" ako".

⁵Aimung: mug: cad' lo" na: au:- yao: bam Suri byu qe: jamu khyo ye" lo" ako". Ngadqere: yao: bam aikhyo joe" ye: gelao"- dayaug re: mana ngad: ra".

⁶ASANG wa gyetab mo" zang myao: jham- gyekhe' myao: lhin" jham joe" li" na: ra" thoe ru"rure Suri byu qere the' gyo: nhao: ra". Amung: Suri byu qe wa Israel kho:kham Hiti- Egutu kho:kham qe we' yao: bam: gyezo: qe: yao: bam re khe' zin: nae" lhaung: to: jho: ako".

⁷Aimung: ai: myi myi" thao Suri byu qe wa yao: bam yao" kao qhid' mae" phao: lo" mung: yao: bam: jamu jham- myao: jham- loze jham we' jamu re airu: lo, malhai: lo: shapye' to: co' ako".

⁸Aibam byid yaug zaung ayae mae joe" ye: gelao"- zaung khug khyo vao ye: mung: ai: mae jo; rure zo: shaug' yang: ngaui- qhang yao: bam qhug' ra" mai bau:- re yu mung: thug' lo" mung: aijham re ye nyham" to" ako". Ai: thao yao: bam dam: tug' lo mung: gatau zaung dalam: khyo vao ye: mung: azhao: mae" we' dakhyo: kad' ako".

⁹Ngadqere: ai:thao re yao: bam yao: cao:- ngonhaung" ceru: kad' nae" maang ngad: ra". Ngonhaung" wa lau dao: gai qo" mung: ngonhaung" za: magai: zug' to: ngad: ra". Ngonhaung" wa cere ta" nae" ne, kao joe" sho' lao" na: re ngonhaung" wa dang za: qobo dae byid' ru qhug' nae" ngad:- ana" jao" yao: lo" mung: kho:kham pho" nho:- zug: pho" jham re lo" ta" kyo: gelang:- ga: jho" ta" ako".

¹⁰Amung: yao: bam wa Suri byu qe: jamu mae" to" lo" mung: Samari vogaung: khyo tug' phao lo" mung: kham: zaung" mo, re ngonhaung" wa Suri byu qe: jamu khyo ye: mung: byu dayaug rere: mamyao pe" thoe re: magyo:- myao: jham we' loze jham re: taui: mapheim- jamu jham rere: Suri byu qe to: co' ru pe" lo, malai: ngad: ra"- ga: ta" ako".

¹¹Zaung" mo, wa ai: lau dao: re hau" ke' ako". Aiwa kho:kham kho" khyo lo" ta" kyo" ako".

¹²Myi" ngad: jo, ashi"- ngadqere: kho:kham pho" wa yab jaung: mae" to" mung: yao" zug: qere Suri byu qe pe" yaung: na: rure ngo ta" geli"- cemae bao" khug' gyo" na va" rure yao: bam ba geyang: yao: bam mae yevho' na: ru ngad genae". Ngonhaung" wa zo:ve qho nae" qhid' mae" vomo" re to: co' ko" maba ga: jho: mung: ai:thao re ngonhaung" re adaui li" taung" yu yang: vomo" re sang: pye' nae" myid: na: ako"- ga: ta" ra".

¹³Yao" nho: zug: qemae" dayaug wa- pe" ru: ngad ngad shid: byaug va" mo, we' dakhyo:- cemae na ko" ra" vobyu qe wa jeim: zai va". Aimung: pe" boe" va" rure ngonhaung" ba nae" qhid' mae" dang: ra" myao: ngo" dau: we' byu daqhae: re nhao: ke' gelang:- ga: ta" ra".

¹⁴Yao: bam byu daqhae: re khyin mung: kho:kham pho" wa Suri gyetab pe" boe" va" khyo re yequ" nae" pyang dao: we' daga"- gyekhe' myao: lhin" shid' lam: mae aibam re nhao: ke' ra".

¹⁵Aibam wa Yodan gyaung: joe" sho' ye" ako". Yao: bam phao: lo" zo" Suri byu qe shapye' to: co' ra" mai bau: we' khin jham re khyo thao" qang" the' myao: ako". Ailao" yao: bam dam: tug' lo mung: kho:kham re lau lokyo" ako".

¹⁶Samari vobyu qe tao" thug' ye: gemung: Suri byu qe: jamu re lanyab yegaug: yu: ako". ASANG ta" to" ru we' dakhyo: gai: thao" ra" jung: gaug we' bale gaug daphai" we' jung: gaug dajig re ngaui dakye' re aung" ako".

¹⁷Israel kho:kham pho" wa yao" lagyo: pho" re kham: mo" re zaung" ra" zug: kad' nhao: to" ra". Ai: zug: pho" wa kho:kham pho" Elisha re yeqhug' ra" au: lapa pa: to" ru we' dakhyo: vobyu qeyang zab: nhae" pye' ru qhug' mung: shid: lo" ra".

¹⁸Thao: ba ai: ayo, mae Samari vogaung: mae gai: thao" ra" jung: gaug dajig we' bale: gaug daphai" re ngaui dakye' yang aung" li" genae"- ga: Elisha kho:kham pho" re ta" ra" dao: re-

¹⁹Ai: zug: pho" wa ASANG yao: yao: aijao" yao: gaug zo re khyo" byid' re lhao" re: airu: magai: boe" ga: tau" ra". Amung: Elisha wa nao wa airu: boe" rure the' myao: li" nae"- ngadqere: khonhae" re: ai: zo:ve maqo" zo: nae" ga: phaug' tau" ra".

²⁰Ai we' dakhyo: yao: yao: mae boe" lo: ava"- vomo" kham" mae vobyu qeyang zab: nhae" pye' yang: yao: shid: lo" byaug: ava".