Read Maru 2 KHO:KHAM 8 Bible Online

2 KHO:KHAM 8 - Maru bible

2 KHO:KHAM 8

¹Elisha wa yao" yang yauggai zo: re kao so' dam: daui byid' ra" Shunem mae" myiqe: myhi" re- ASANG wa ai: mung"dan: bao" khug' nhad' zin khug' nhao nae". Amung: yao" yham byu qe we' daga" to" mung: gatau mae yena genae" qhid' mae" ta" ra".

²Ai: myiqe: myhi" wa Elisha dao: re cao" mung: yao: we' yao" yham byu qe wa Philisti mung" mae nhad' zin yena nae" to" lo" byaug: ako".

³Nhad' zin thao" lo" ra" yo, mae yao: wa Israel mung" khyo tug' lo mung: yao" yham- yao" myid re mho' yu nae" qhid' mae" kho:kham pho" jhao" ye" ra".

⁴Elisha nho: daui daui yaug Gehazi wa kho:kham pho" we' jho" jhau: na ko" rure yemyao: ra". Kho:kham wa Elisha kad' ra" mug' pho: ve,lho jham: khyo ba nug: ra".

⁵Shid: ra" yaug re Elisha" khoru: dam: daui li" nhao: ra" khyo re Gehazi yang kho:kham pho" re ta" kyo" na: au: myiqe: myhi" wa kho:kham pho" re mho' ra" khyo kad' ra". Gehazi wa yao: re- ASANG kho:kham we"- Elisha yang dam: daui: li" nhao: ra" myiqe: myhi" nho: yauggai zo: we' myiqe: myhi" wa cema: ngad: ra"- ga: ta" ra".

⁶Kho:kham pho" nho: dao: myid: re dao: phyid byid: mung: Gehazi: ta" ra" khyo dang: rure bota" ra". Ailao" kho:kham wa zug: dayaug re khai: yu yang: yao: re- yao: yena: byaug: ra" nhad' zin gyo: mae yao" yo mae" thug' ra" gaug zo: alhab' nho: aphug' bobo mung: yao: sang: ra" gu: ja: khao: ngo" yao: re dam: tug' byid: nae" ta" ke' ra".

⁷Suri kho:kham Benhadad no: na: ra" ayo, mae Elisha wa Damasku vogaung: khyo ye" ra". Elisha aimae na: rure kho:kham pho" re ta" kyo" ako".

⁸Ailao" yao: wa yao" zug: qemae" Hazae re lapa pho" re jhaung qhu" ye byid: mung:- ngo gai nae" la,- magai nae" la,- ein: rure ba nae" ASANG re myid: byid: nae" qhid' mae" yao: re yemho' wa,- ga: ta" ra".

⁹Aimung: Hazae wa Damasku mae" kad' ra" gai: thao" ja: zai aja: ja: re gola:u byid xe dau: dao mae qo byi" sho' seim" vin mung: Elisha jhao" ye" lo" ra". Hazae wa Elisha re ye qhug' lao"- ni" daui daui yaug kho:kham Benhadad wa yao" no mae" gai lo nae" la,- magai: nae" la,- ga" rure nao re myid: nae" ngore nhao: ke' ava"- ga: yao: re ta" ra".

¹⁰Elisha wa yao: shid zai ngad: ga" rure ASANG ngore qhu" byid' ava". Ngadqere: yao: jhao" lo" mung: yao: no gai nae" ga" ein: lo" ta" kyo: wa,- ga: tau" ra".

¹¹Ai: thao Elisha wa yao" myo, khung: mae Hazae maba: na losho' qu" gyaug sho' zhaug' qu" to" ra". nyag din taung" Elisha wa ngug byid thug' li" ra".

¹²Hazae wa ASANG we"- nao pe"mung: ngug: na: i? ga: myid' ra". Ailao" Elisha wa Israel byu qe: dao mae nao qu" gyaug sho' gye kad' li" nae" rure ngo ba yang: ngad:- nao wa yao: bam: gyetab jham re myi: ngha"- doe; thao" ra" yao: bam: zolau: qere se' gai: ra" yao: bam: zoshao qere vo; yu mung: thaung" jhan: se'- gaung la" ra" myiqe: qere vae dug: thug' phaug' pye' li" nae"- ga: tau" ra".

¹³Hazae wa ngo wa khoru: ai qhi" sho' kheim: so' gai: qo" nae" i? Ngo wa pe" boe" yaug mangad: ga: tau" ra". Elisha wa nao Suri kho:kham boe" li" nae" ra" khyo ASANG ngore qhu" byid' ava"- ga: phaug' tau" ra".

¹⁴Hazae wa Benhadad jhao" tug' ye" ra". Benhadad wa yao: re- Elisha pe" ru: ta" ra" i? ga: lham: myid' ra". Ailao" Hazae wa nao dang za: gai li" nae" ga: yao: ngore ta" ra"- ga: tau" ra".

¹⁵Ngadqere: thao: ba re Hazae wa mai pho' dakhye' yu mung: aire qid tag' yang: kho:kham pho" re zang" se' pye' ra". Amung: Hazae wa Benhadad nho: khu mae Suri kho:kham xo' kad' ra".

¹⁶Ahab nho: yauggai zo: Yoram wa Israel kho:kham khyo" eib: ru ngo" zin ein: zin mae Yehoshaphad nho: yauggai zo: Yehoram wa yao" apyad sam xe: shid' zin mae Yuda kho:kham boe" lo: ra".

¹⁷Yao: wa Yerusalem mae she' zin eib: na: ra".

¹⁸Yao" yham sang myhi" wa Ahab nho: myiqe: zo: ngad: mung: yao: wa Ahab nho: yham khaung re" ru: Israel kho:kham qe: makhyang" ra" khyo mae cao" ra". Yao: wa ASANG re qobo shad' ra".

¹⁹Ngadqere: ASANG wa Yuda mung" re manug: phyo' qheim" pye' ngad: ra". Pe"mung:ga"re yao: wa yao" daui daui yaug Davi re yao" myid:zo: qe xo' yang: khonhae" re: eib nae" dao:so: byid' to: yang: ngad: ra".

²⁰Yehoram eib: ra" gyo: mae Edom wa Yuda re geim lau to" tau: lhan: mung: loe; beim: ra" mung"dan: boe" lo: ra".

²¹Aimung: Yehoram wa Edom gyetab vang" to" ra" zai re vogaung: khyo yao" gyekhe' myao: lhin" alhab' we' to" ye" lo" ra". Yao: we' yao" gyekhe' myao: lhin" jham: zug: qe wa aimae" lai: kho' thug' lo" nae" kad' mung: phao: loe; lo" ako". Yao" gyezo: qe wa yao: bam: yham khyo phao: byo: lo" ako".

²²Ai: ayo, mae" Edom wa Yuda nho: lo, mae" loe; beim: ra" mung"dan: ngad: ra". Ce: ayo, mae za: Libna vogaung: re: tau: lhan: geim lau kad' ra".

²³Yehoram kad' ru gatau ja: khao: ngo" wa Yuda kho:kham qenho: mhomyi: paug' mae tung" xam" to" ako".

²⁴Yehoram wa shid: lo" mung: Davi nho: vogaung: mae" kho:kham lab mae nyhab' pye' ako". Amung: yao" yauggai zo: Ahazia wa yao" khu mae kho:kham xo' kad' ra".

²⁵Ahab nho: yauggai zo: Yoram wa Israel kho:kham khyo" eib: na: ru daxe: shid' zin mae Yehoram nho: yauggai zo:- Ahazia wa yao" apyad shid' xe: shid' zin mae Yuda kho:kham boe" lo: ra".

²⁶Yao: wa Yerusalem mae dazin eib: na: ra". Yao: myhi" wa Ahab nho: myiqe: zo: Israel kho:kham Omri nho: yao: myid: Athalia ngad: ra".

²⁷Ahazia wa myi: yu: ra" khyo" kho:kham Ahab we' xo' taui: mung: yao: wa Ahab nho: yham khaung kad' ru we' dakhyo: ASANG re qobo shad' ra".

²⁸Kho:kham Ahazia wa Suri kho:kham Hazae we' gye jho" khe' rumae Israel kho:kham Yoram we' jho" qhan" ra". Gyetab jham wa Gilead mung" mae" Ramod vogaung: mae gye jho" zin" ako". Yoram wa gyekhe' poe mae dae de' ra".

²⁹Yao: wa yao" dae khu re gai sho' ya: yu nae" qhid' mae" Yezre vogaung: khyo tug' phao: lo: ra". Ahazia re: aikhyo yao: jhao" lae" ye" ra".