Read Maru 1 KHO:KHAM MHOMYI: 11 Bible Online

1 KHO:KHAM MHOMYI: 11 - Maru bible

1 KHO:KHAM MHOMYI: 11

¹Israel byu qe alhab' wa Hebron khyo Davi jhao" ye: mung: yao: re ngonhaung" wa ni" sho: ni" sa: qe yao: ngad:-

²Lai: lo: ayo, mae Sholu wa ngonhaung" nho: kho:kham ngad: au: re lhao" re- nao wa Israel byu qere gye khe' poe mae jhui" au: she: lo: ra". Yao" byu qere nao jhui" au: she mung: yao: bam: kho:kham boe" lo: li" nae" ga: ni" Mao"So ASANG wa nao re dao:so: byid' to" ava"- ga: ta" ako".

³Aimung: Israel byu qe: au: jhaung qe alhab' wa Hebron khyo kho:kham Davi jhao" joe" li" ako". Yao: wa yao: bam we' gyang" lho" ra" myid vang" ba nam kad' ra". Yao: bam wa yao: re xau gyad byid: mung: Samuela nhad' khyo" ASANG: dao:so: byid' to" ru we' dakhyo: Davi wa Israel kho:kham boe" lo: ra".

⁴Kho:kham Davi we' Israel byu qe alhab' wa Yerusalem re gye ye zin" ako". Ai: pyad mae Yebu ga: mang qi" ra" ai: mung" mae azhao: mae" na: jo, ko" ra" Yebusi byu qe wa aimae na: jo; shiko" ra".

⁵Yebusi byu qe wa Davi re vogaung: akhug khyo khonhae" re: maqo" vao ye: nae" ga: ta" ako". Ngadqere: Davi wa yao: bam: Ziun gyetab re sang: yu: pye' mung: ai wa Davi nho: vogaung: khyo" mang thug' lo: ra".

⁶Amung: Davi wa Yebusi byu qere sao qhid' se' ra" yaug wa gye tab mae" zug: mo" boe" nae"- ga: ta" ra". Zeruia nho: yauggai zo: Yoab wa gye khe' poe re jhui" au: she mung: gyezug: mo" boe" lo: ra".

⁷Davi ai: gyetab mae yena: ru yang ai ru wa Davi nho: vogaung: ga: mhang" ako".

⁸Yao: wa ai: vogaung: re dam: zao mung: ba thug' shad' mae" bug gaung dao mae myid zhai: pyang" yang: zao: qhid: ra". Yoab wa vogaung: dang: ra" dau re dam: te" ra".

⁹Davi wa qam: bo: ra" ASANG yao: we' daga" na: ru yang je je qam: bo: li" ra".

¹⁰Cebam wa Davi nho: mang qi" ra" gyezo: qe: mang ja phin: ngad: ra". Dang: ra" Israel amyu" byu qe we' daga" yao: bam wa ASANG: yang dao:so: byid' to" ru we' dakhyo: yao: re kho:kham boe" sho' bao" thaug' byid: mung: yao" kho:kham mung"dan: re qam: bo: jo,sho' bao" thaug' byid' ako".

¹¹Sao qhid' yaug wa Hakmoni kaung mae" Yashobeam ngad mung: Sam yaug nho: au: jhaung ngad: ra". Yao: wa yao" lhae tad' yang byu sam yo zo: we' gye jho"zin: mung: alhab' mo, re gye poe mae se' pye' ra".

¹²Mang qi" ra" Sam yaug mae" dayaug wa Ahohi kaung mae" Eleaza nho: yauggai zo: Dodo ngad: ra".

¹³Yao: wa Pasdamin gye poe mae Davi shad' khyo bode, mung: Philisti byu qere gye zin" ra". Israel byu qe tao" phao: lo" na ko" au: yao: wa Bale gaug yo mae na: jo; ra".

¹⁴Aimung: yao: we' yao" byu qe wa yo gaung: mae jo, qo yu mung: Philisti byu qere gye zin" ako". ASANG wa yao: re qi: sho' aung doe; nhao: ra".

¹⁵Daba mae gyezug: sam xe mae" sam yaug wa Philisti byu daphung: Rephaim lao: khaung: mae jamu kad' na ko" yo, mae Adulam laug aug' nhae mae" Davi na: jo; ra" laug byo, khyo ye" lo" ako".

¹⁶Ai: yo, mae Davi wa bug gaung mae gyetab khug mae na: jo; ra". Philisti byu daphung: wa Betlehem re sang: yu: pye' ako".

¹⁷Davi wa yham khyo myid mung: Betlehem vogaung: kham: nhae mae jo; ra" qid thaung: mae" qid- dayaug yaug: yang ngo re khe' jhaug' ko" qa: we"- ga: ta" ra".

¹⁸Mang qi" ra" gyezo: sam yaug wa Philisti byu qe: jamu gaung: khyo" kho' vao ye: mung: ai: qid thaung: mae" qid ye khae: yu yang: ai re Davi jhao" ci lo byid' ako". Ngadqere: Davi wa ai re mashaug' ngad: ra". Ai: atha"- ASANG re byid' ra" ngaui" xeim: khyo" yao: wa ai re vhe' khyo" pye' mung:-

¹⁹Ngo khoru: maqo" shaug'- ceru wa yao: bam yao" kao so' dam yang: kad' ko" ra" ce: byu qe: sa: re shaug' ruru: boe" nae" ga: ta" ra". Aimung: yao: wa ai re mashaug' lo: ha: pye' ra". Cejham wa mang qi" ra" gyezug: sam yaug: nho: mazag mavae kad' ra" lo, mau" jham ngad ra".

²⁰Yoab nho: yao: nhaung: Abishai wa mang qi" ra" Sam xe yaug: nho: au: jhaung ngad: ra". Yao: wa yao" lhae tad' yang byu sam yo zo: we' gye jho"zin: mung: alhab' mo, re se' pye' mung: sam xe yaug: phaung mae mang qi" li" ra".

²¹Yao: wa Sam xe yaug mae" mang qi" thao" yaug ngad: ra". Amung: yao: wa ai bam: au: jhaung boe" lo: ra". Ngadqere: yao: wa Sam yaug nho" mang maqi: ngad: ra".

²²Kabze mae" Yehoiada nho: yauggai zo: Benaia wa mang qi" ra" gyezo: ngad: ra". Yao: wa qam: bo: ra" Moba sulhe: shid' yaug re se' ru bobo mung: Sulhe: lo, mau" myo: sho' kad' yaug ngad: ra". Dalhang mae yao: wa gyu: khyo" ra" ba na daba mae dung: gyan: dalam: khyo gyo" ye: mung: khang khyi dadau: re yese' pye' ra".

²³Yao: wa lhae tad' mo" zang ci mung: ngo" daung" qhang: ra" Egutu byuqi: dayaug rere: se' pye' ra". Benaia wa yao: re thaung kang: yang be, mung: Egutu byu pho" lo, mae" lhae tad' re lhad' yu mung: ai: yaug thug' se' pye' ra"

²⁴Ai jham wa Sam xe yaug mae dayaug ngad: ra" Benaia nho: sulhe: lo, mau" jham ngad: ra".

²⁵Yao: wa Sam xe yaug phaung mae baug thug' yaug ngad: ra". Ngadqere: Sam yaug nho" mang maqi: ngad: ra". Davi wa yao: re yao" kao zaung" au: jhaung kad' nhao: ra".

²⁶Cebam wa baug thug' ra" gyezo: qe ngad: ako". Yoab nho: yao: nhaung: Asahe Betlehem mae" Dodo nho: yauggai zo: Elhanan Harod mae" Shamod Peled mae" Heleza Tekoa mae" Ike nho: yauggai zo: Ira Anathod mae" Abieze Husha mae" Sibekhai Aho mae" Ilai- Netopha mae" Maharai Netopha mae" Bana nho: yauggai zo: Heled- Benyamin mug: Gibea mae" Ribai nho: yauggai zo: Ithai Pirathon- mae" Benaia Gasha nhae mae jo, ra" lao: khaung: jham mae" Hurai Arba mae" Abie Bahurum mae" Axmared Shalbon mae" Eliahba Gizon mae" Hashem Harara mae" Shage nho: yauggai zo: Yonathan Harara mae" Sakhara nho: yauggai zo: Ahiam Ura nho: yauggai zo: Eliphala Mekhera nho: yauggai zo: Hephera Pelon mae" Ahiya Khame mae" Hezro Ezbai nho: yauggai zo: Naarai Nathan nho: yao:nhaung: Yoela Hagri nho: yauggai zo: Mibha Amon mae" Zeleg Berod mae" Yoab nho: (...)