Read Maru 1 KHO:KHAM MHOMYI: 15 Bible Online

1 KHO:KHAM MHOMYI: 15 - Maru bible

1 KHO:KHAM MHOMYI: 15

¹Davi wa yao" qhid' mae" Davi nho: vomo" mae yham jham kad' ra". Yao: wa Mao"So: Dao: Thang" Ban" qhid' mae" re: jo, qo dalam: nyhang" mung: ai re zaung kad' nghoe' to" ra".

²Ai: thao yao: wa Levi byu qe za: ai: Dao: Thang" Ban" re vo, ang: ra". Pe"mung: gare yao: bam wa ai re vo, nae" qhid' mae" we' apyad ato yao: re caung da" byid: nae" ASANG: yang khyin: to: mo, ngad: ako"- ga: ta" ra".

³Aimung: Davi wa yao: nyhang" jaung: to" ra" jo, qo khyo Dao: Thang" Ban" re vo, yu nae" qhid' mae" Israel amyu" byu alhab' re khai: zhang" yu: ra".

⁴Ai: thao yao: wa Arun nho: myid:zo: qe we' Levi byu qere khai: yu nhao: ke' ra".

⁵Levi byu Kohad kaung mae" Urie wa au: jhaung kad' mung: yao" kaung mae" 120 yaug-

⁶Merari kaung mae" Asaia au: jhaung kad' mung: 220 yaug-

⁷Gershon kaung mae" Yoela au: jhaung kad' mung: 130 yaug-

⁸Elizaphan kaung mae" Shemaia au: jhaung kad' mung: 200 yaug-

⁹Hebron kaung mae" Elie au: jhaung kad' mung: 80 yaug-

¹⁰Uzie kaung mae" Amminadab au: jhaung kad' mung: 112 yaug joe" li" ako".

¹¹Davi wa khinjaung Zadog we' Abiatha- gatau Levi byu qe ngad: ra" Urie- Asaia- Yoela- Shemaia- Elie- Amminadab khyaug' yaug re khai: yu: ra".

¹²Yao: wa Levi byu qere- naonhaung" wa Levi kaung jham mae" au: jhaung qe ngad: ako". Israel nho: Mao"So ASANG: nho: Dao: Thang" Ban" re ngo nyhang" jaung: to" ra" jo, qo khyo naonhaung" qo" dao: to: genae" qhid' mae" naonhaung" yao" gaung re we' naonhaung" nho: Levi mao: nhaung: qe san sin" sho' kad' to: ge,-

¹³Pe"mung: gare sao qhid' lhang ai re vo, nae" naonhaung" aimae mana geyang: re:- naonhaung" yao: re caung:pa" ang: ru we' dakhyo: macaung: pa" yang: ngonhaung" Mao"So ASANG wa ngonhaung" re qobo dae byid' ra" ga: ta" ra".

¹⁴Ailao" khinjaung qe we' Levi byu qe wa Israel nho: Mao"So ASANG: nho: Dao: Thang" Ban" re dao: yu nae" qhid' mae" yao: yao" gaung re san sin" sho' kad' ako".

¹⁵Levi byu qe wa Moshe nhad' khyo" ASANG: yang amyin" byid' to" ru we' dakhyo:- kang ke' yang: yao: bam: lo, sin mae dao: ako".

¹⁶Davi wa Levi byu au: jhaung qere Nghaui"caung: nae" ngaui bau: ngaui lho" tang: jham we' jhe' cang" jham be; myhang" nae" Levi byu myo: sho' re san: to: nae" amyin" byid' ra".

¹⁷Yao: bam wa nghaui" caung: mo, kaung mae" o mae tung" to" ra" mo, re gyid: jhe' cang" be, nae" khyin: to" ako". Aibam wa Yoela nho: yauggai zo: Heman- yao" amyu" ba nam Berekhia nho: yauggai zo: Asab- Merazi kaung mae" Kushaia nho: yauggai zo: Ethan bam ngad: ako". Yao: bam re bao" thaug' byid: nae" qhid' mae" yao: bam wa thoe myhao: ra" tang: jham re be, nae" o mae" mo, re khyin: san: to" ako". Aibam wa Zekharia- Yazie- Shemiramod- Yehie- Uni- Eliab- Masia- Benaia bam ngad: ako". Thoe nyham: ra" tang: jham be, nae" qhid' mae" yao: bam wa o mae" Levi byu qere khyin: san: to" ako". Aibam wa Matithia- Eliphelehu- Mikneia- Azazia we' Caung:pa" Yham gug: gam Obed Edom we' Yeiela bam ngad: ako".

²²Khenania wa nghaui" caung: pha,jhi" mae jhao yaug ngad: ru yang Levi byu qe: Nghaui"caung: mo; au: jhaung kad' nae" khyin: to: qhug' ra".

²³Berekhia- Elkana- Obed Edom- Yehia bam wa Dao: Thang" Ban" gug: gam mo, khyo" khyin: to: qhug' ako". Khin jaung qe ngad ko" ra" Shebania- Yoshaphad- Nethane- Amasai- Zekharia- Benaia- Elieze bam wa Dao: Thang" Ban" qhid' au: mae labo" mad nae" qhid' mae" khyin: to: qhug' ako".

²⁵Aimung: kho:kham Davi- Israel byu au: jhaung qe- gye zug: mo" qe wa Dao: Thang" Ban" re ye dao: yu nae" qhid' mae" Obed Edom nho: yham khyo ye: mung: yao: bam wa aimae poe qi: kad' ako".

²⁶Yao: bam wa Dao: Thang" Ban" re dao ko" ra" Levi byu qere Mao"So: yang bao" thaug' byid: shao:- nung: jaung lo: nhad' dau:- yao nhad' dau: re ngaui" xeim: ngaui" byid' ako".

²⁷Davi wa Dao: Thang" Ban" re dao: ra" Levi byu qe we' yao: bam: au: jhaung Khenania- nghaui" caung: mo, re" ru: gai: ra" jid: mo" pin" yang khyab' to" ra" bau: qhang ve; ci: ra". Davi wa jid: mo" qao nghoid' rere: ve; ci: ra".

²⁸Aimung: Dao: Thang" Ban" re Yerusalem khyo dao: do, loko" ra" mo, mae bocao ko" ra" Israel byu qe alhab' wa labo" mad- the' daui mad- jhe' cang" be,- tang: be; myhang" yang: ngaui bau: ngaui lho" hug' do, lo: ako".

²⁹Ban" re vomo" khug khyo dao: vao lo: na: au:- Sholu nho: myiqe: zo: Mikha wa bao:zo: kham: khyo" qu" ke' mung: Davi go" nhan" yang: ngaui bau: taung" thug' jhu" rure myao lao"- yao: re qu" phoe: pye' ra".