Read Maru 1 KHO:KHAM MHOMYI: 16 Bible Online

1 KHO:KHAM MHOMYI: 16 - Maru bible

1 KHO:KHAM MHOMYI: 16

¹Yao: bam wa Dao: Thang" Ban" re Davi yang kad' to: byid' ra" zaung khyo cilo mung: ai: mae loke' to" ako". Ai: thao yao: bam wa ngaui" xeim: jham we' zam" khug: ra" ngaui" xeim: Mao"So re qhaug' byid' ako".

²Davi wa ngaui" xeim: jham re bin: qhaug' byid: thao ASANG: mang mae amyu" byu qere shaman" byid: mung:-

³Yao: bam alhab' mo, re zo:ve gae byid' ra". Yao: wa Israel mung" mae" yauggai- myiqe: yaug khao: ngo" re mug dakhai"- shokyaug' daje, je, we' sabyi' shi: kyaug' dajhid' jhid' gae byid' ra".

⁴Davi wa Dao: Thang" Ban" qhid' au: mae Nghaui"caung: mung: Mao"So re caung: khin" yang: Israel nho: Mao"So ASANG re caung:pa" ru mae au: she genae" qhid' mae" Levi byu daqhae: re khyin: san: to" ra".

⁵Asab re wa au: jhaung khyo"- Zekharia re wa yao" nho: bao" thaug' au: jhaung khyo" san: to" ra". Yeiela- Shemiramof- Yehie- Matithia- Eliab Benaia- Obed Edom- Yeiela bam re wa tang:be, mo, khyo" san: to" ra".

⁶Asab wa jhe' cang" be, mung:- Benaia we' Yahazie khinjaung shid' yaug wa Dao: Thang" Ban" qhid' au: mae man: man: labo" mad genae" qhid' mae" san: to" ra".

⁷Airu: Davi wa Asab we' yao" Levi mao:nhaung: qere ASANG re Nghaui"caung: caung: khin" nae" qhid' mae" qo sao qhid' byid' qhid: ra".

⁸ASANG re jeju so: byid: ge,- yao" qi" qhang: ra" khyo re ta" hau: kyo: ge,. Byumyu" qere yao: kad' ra" mau" zo" ta" kyo: ge,.

⁹ASANG re Nghaui"caung: ge,. Yao: kad' ra" mug' pho: mau" zo" jham re ta" kyo: ge,.

¹⁰Yao" yang ngonhaung" re sang: rumung: ngaui bau" na ge,. Yao: re caung:pa" byid: mo, alhab' ngaui bai" ngaui lho" na ge,.

¹¹Bao" yu nae" qhid' mae" ASANG jhao" locaung: pa" ge,.

¹²Yao" daui daui yaug Abraham nho: myid:zo: qe we"- Yao: khyin: yu: ra" yaug Yaku nho: myid:zo: qe we"- Mao"So kad' qhu" lo: ra" mug' pho: mau" jham re beim: ge,. Yao: byid' ra" dao: kho' khyo rere: beim: so: ge,.

¹⁴ASANG wa ngonhaung" Mao"So ngad: ra". Yao" nho: amying" dao: jham wa mug: myid geim" qhid' mae" ngad: ra".

¹⁵Apyad ato mae dang: jo, nae" qhid' mae" Abraham we' kad' to" ra" dao: thang"- Isag' we' kad' to" ra" dao:so: ngad: ra" Mao"So: dao: thang" re khonhae" re: dato" myhid' ge,.

¹⁷ASANG wa Yaku we' dao: thang" to" ra". Ai: dao: thang" wa apyad ato mae dang: jo; ra".

¹⁸Yao: wa- ngo nao re Khanan mug: myid byid: nae"- ai wa ni" jo,nho" boe" jo, nae"- ga: ta" ra".

¹⁹Mao"So byumyu" wa byu mamyo: ngad: ra". Khanan mung" mae byubang" boe" na: ako".

²⁰Yao: bam wa damug: mae" damug:- Kho:kham damungdan: mae" damungdan: du" phao: lae" qin" ako".

²¹Ngadqere: yao: bam re khag' yang deim" zag zo: nae" akhang" Mao"So mabyid: ngad: ra". Yao: wa kho:kham qere ai bam re gug: gam byid: nae" qhid' mae" ta" peim" mung:-

²²Ngoyang khyin: to" ra" daui daui mo, re dae date' ge,. Nga" lapa qere dathe' zao" ge, ga: ta" ra".

²³Mug: myid geim" mae" alhab' mo, we"- ASANG re khin" caung: byid: ge,. Yao" yang ngonhaung" re khyad' yu: ra" khyo ngaui bau" lau dao: re ba khao: ngo" ta" hau" na ge,.

²⁴Yao" nho: phungbao re byumyu" alhab' mo, re ta" hau" kyo: ge,- byumyu" alhab' re yao" nho: qam: so' thin: ra" mau" zo" jham ta" hau" kyo: ge,.

²⁵ASANG wa qi" qhang: rumung: gyai yao: caung: khin" byid: nae" man: qi" ra" so aho jham alhab' tho' mae je yang: yao: re nga: yhe' byid: ca" ra".

²⁶Gatau: byumyu" alhab' mo; nho: so jham wa sulho jham za: ngad: ako". ngadqere: ASANG wa mug: khaung jham re phan" to" ra".

²⁷Phungbao we' kho:kham aso' wa yao: re lhang" kham" to" ra". Yao" nho: Caung:pa" Yham mae kheim: so' we' yaung" ru byang" jo; ra".

²⁸Myid gaung dao mae" byu qe we"- ASANG re caung: khin" byid: ge,- yao" nho: phungbao we' qam: o: re caung: khin" byid: ge,.

²⁹ASANG: nho: phung bo: ra" mang a re caung: khin" byid: ge,- ngaui" xeim: ci mung: yao" Caung:pa" Yham khyo vao li" ge,. Gyang" lho" yaug thug' li" re yao" qhid' kheim: mae goe; pa" ge,.

³⁰Yao" qhid' kheim: mae gyaug: nin" na ge,. Myid gaung wa yao" jo, qo mae tang: jo, nhao mung: magai: qui: ngad: ra".

³¹Myid gaung we' mug:gaung we"- ngaui bau: ge,- ASANG wa kho:kham ngad: rure byumyu" mung"dan: jham re ta" kyo: ge,.

³²Pang:lai: we"- nao mae bo: ra" gug'nyhug' ja: khao: ngo" we"- hug' myang ge,- jao: gyu" jham we"- nao mae bo: ru alhab' we' daga" ngaui bau: ge,.

³³Seyo mae" sag' gae jham wa ASANG gyo" li" mung: myid gaung re eib: ra" au: ngaui bau: ngaui lho" li" genae".

³⁴ASANG re caung: khin" byid: ge,- ASANG wa gai: rumung: yao: re jeju beim: so: byid: ge,. Yao" jhid' de; myid wa apyad ato mae ngad: ra".

³⁵Ngonhaung" ASANG Mao"So we"- ngonhaung" nao re jeju qo" beim: so: mung: ni" gyang" lho" mang re qo" caung: khin" nae" qhid' mae" ngonhaung" re khyad' yu mung:- byumyu" mung: dan: jham: phaung mae" ngonhaung" re dam: jhui" tug' yu la,.

³⁶Israel nho: Mao"So ASANG re caung: khin" ge,- ana" re: apyad ato mae re: yao: re caung: khin" ge,. Ai: thao amyu" byu qe alhab' wa- Amen- ga: ta" mung: ASANG re caung: khin" ako".

³⁷Kho:kham Davi wa Dao: Thang" Ban" to" ra" jo, qo mae kad' ra" caung:pa" mau" mae Asab we' yao" Levi mao:nhaung: qere khonhae" re:mau" zaui: nae" san: to" ra". Yao: bam wa yao: bam: mau" re ba khao: ngo" aimae zaui" ako".

³⁸Yeduthun nho: yauggai zo: Obed- Edom we' yao" kaung mae" byu khyaug' xe: she' yaug wa ai bam re bao" byid' ako". Hosa we' Obed- Edom wa kham: dung: re gug: gam au: jhaung qe ngad: ako".

³⁹Ngadqere: khinjaung Zadog we' yao" nho: khinjaung mao: nhaung: qe wa Gibeon mung" mae" caung:pa" jo, qo mae ASANG re caung:pa" ra" mau" mae au: jhaung kad' mo, ngad: ako".

⁴⁰Yao: bam wa ba khao: ngo" ne,seim myi"thao ASANG: yang Israel byu qere byid' to" ra" Tarha" mae tung" to" rure cao" mung: ngaui" xeim: jham re phan dao mae phad' ngaui" byid' ako".

⁴¹Aimae Heman- Yeduthun we' gaje qe wa je yang: ASANG: nho: apyad ato: jhid'de; myid qhid' mae" caung: khin" nghaui"caung: nae" khyin: san: to: qhug' ako".

⁴²Heman we' Yeduthun shid' yaug wa labo" mad jhe' cang" be,- gatau: ngaui" zai jham re caung: khin" Nghaui"caung: au: be; myhang" ru mae re: au: jhaung ngad: ako". Yeduthun nho: kaung qe wa kham: dung: gug: gam au: jhaung qe ngad: ako".

⁴³Ai thao yaug khao: ngo" wa yham phao: lo" ako". Davi re: yao" yham byu qe we' dayo, zo: lo" na nae" yham phao: lo" ra".