Read Maru 1 KHO:KHAM MHOMYI: 19 Bible Online

1 KHO:KHAM MHOMYI: 19 - Maru bible

1 KHO:KHAM MHOMYI: 19

¹Ai: thao Amon kho:kham Naha shid: lo" mung: yao" yauggai zo: Hanun wa kho:kham boe" lo: ra".

²Kho:kham Davi wa yao" nho: yao: pho" Naha ngo re kad' lo: ru we' dakhyo: Hanun re ba nam ngad: ra" khyo re ngo qhu" byid: ca" ra" ga: ta" ra". Aimung: Davi wa yao" nho: jhid'de; sang: bono: ru re yeta" kyo: nae" lagyo: qere nhao: ke' ra". Yao: bam Amon mung" khyo joe" ye: gelao"-

³Amon byu au: jhaung qe wa kho:kham Hanun re Nao re jhid'de; sang: bono: ra" khyo re ta" nae" qhid' mae" Davi wa ni" pho" re nga: yhe' yang: ce: byu qere nhao: ke' ru ngad: ein: nao jho: i?. Airu: mangad: nae"- Yao: wa ce: mung" re aung: yu: pye' nae" qhid' mae" jin" byu qe khyo" ce: mung" re ca: qu" geshao: ga: ai: bam re cekhyo nhao: ke' ru ngad: ra"- ga: ta" ako".

⁴Kho:kham Hanun wa Davi nho: lagyo: qere taung" yu mung: yao: bam: nhad' maui: jham re qaug: pye'- yao: bam: mai bau: jham re zaung thai: mae lhai" phung" pye' byid: yang: yao: bam re dam: nhao: ke' ra".

⁵Yao: bam wa yham khyo tug' lo" nae" gyai qho' pye' ako". Airu: boe" ra" khyo re Davi the' gyo: lao"- Yerikho: vogaung: mae na: jo, mung: yao: bam: nhad' maui: madam: yaug: li" re matug' lo genae" byu nhao yang: dao: pyang: ke' ra".

⁶Kho:kham Hanun we' Amon byu qe wa Davi re yao: bam: gyevo kad' yu: rure myid: beim: gemung: yao: bam wa Mesopotamia mung" tho' dau mae" we' Suri mung" Makha we' Zoba mung" gye khe' myao: lhin" we' myao: lhin" keim: mo, re ngho: nae" qhid' mae" ngaui joe: dataung byid' ako".

⁷Yao: bam wa gye khe' myao: lhin" sam tug: shid' taung ngho" yu mung: Makha kho:kham gyetab we' joe" li" yang: Medeba jo, qo mae Jamu li" kad' na: ako". Amon byu qere: yao: bam: vogaung: alhab' mae" thug' li" gemung: gye khe' zin: nae" jin" jin" ngad: ako".

⁸Boe" ra" khyo re Davi the' gyo: lao"- yao: wa Yoab we' gye tab geim" re nhao: ke' ra".

⁹Amon byu qe wa to" li" mung: yao: bam: vomo" Raba khyo vao ye" ra" kham: dung: mae jo, qo yu: ako". Yao: bam re bao" thaug' nae" joe" li" ko" ra" kho:kham qe wa pa: din" mae jo, qo yu: ako".

¹⁰Yoab wa gyevo qeyang yao" qhid' au: khyo" we' nhaung thao" khyo" yao: re khe' zin: genae" ngad: rure ba mung: yao: wa gai: thao" ra" Israel gyezo: qere khyin: yu yang: Suri byu qe shad' khyo myo,nho qang yang: ai bam re jo, qo yu nhao: ra".

¹¹Yao: wa dang: ra" yao" gyezo: qere yao: nhaung: Abishai re eib nhao: ra". Abishai re Amon byu qe shad' khyo myo, nho qang yang: jo, qo yu nhao: ra".

¹²Yoab wa yao: re- Suri byu qe ngo re aung: lo" na ko" rure nao myao lao"- ngo re li" bao" yu la,- Amung: Amon byu qe nao re aung: lo" na ko" rure ngo myao lao"- ngo nao re li" bao" yu nae".

¹³Dagyaug wa, vae" myid bo wa,- ngonhaung" byumyu" we' Mao"So: vogaung: jham: qhid' mae" mazag mavae gye khe' lang:- ASANG myid o: ru we' dakhyo: boe" vashao:- ga: ta" ra".

¹⁴Yoab we' yao" byu qe wa khe' zin: nae" qhid' khyo ye" lo" mung: Suri byu qe wa phao: lo" ako".

¹⁵Suri byu qe tao" phao: lo" na ko" rure Amon byu qe the' myao gelao"- Yao: bam wa Abishai mae" phao: lo" mung: vogaung: khug khyo zad' vao lo" ako". Ai: thao re Yoab wa Yerusalem khyo tug' phao: lo" ra".

¹⁶Israel byu qeyang yao: bam re aung: pye' va" rure Suri byu qe beim: gemung: yao: bam wa Uphrad gyaung: ba thug' shad' Suri mung" jham mae" gye tab jham re jhin" yu: yang: Zoba kho:kham Hadareze nho: gyezug: Shobag nho: eib: ra" qao: mae yao: bam re na nhao: ako".

¹⁷Davi ce: khyo re the' gyo: lao" yao: wa Israel gyezo: qere zhang: yu yang: Yodan gyaung: re gau" de, mung: Suri byu qe shad' khyo myo, nho qang yang: ai bam re jo, qo yu nhao: ra".

¹⁸Gyekhe' qhid mung:- Israel byu qe wa Suri gyetab re dam: khe' tug' ke" ako". Davi we' yao" byu qe wa Suri myao: lhin" keim: byu nhad' taung yaug we' khyid su: gyezo: byid tug re se' pye' ako". Yao: bam wa Suri gyezug: Shobag rere: se' pye' ako".

¹⁹Hadareze eib: ra" qao: mae na ko" ra" kho:kham qe wa Israel byu qe yang yao: bam re aung: pye' va" rure beim: gelao"- Yao: bam wa Davi we' mang: dae tae" mung: Davi eib: ra" qao: mae na mo, boe" lo: ako".

²⁰Suri byu qe wa Amon byu qere khonhae" re: dam: bao" nae" myid mabo loko" ngad: ra".