Read Maru 1 KHO:KHAM MHOMYI: 23 Bible Online

1 KHO:KHAM MHOMYI: 23 - Maru bible

1 KHO:KHAM MHOMYI: 23

¹Davi wa gyai mao" lo" lao" yao: wa yao" yauggai zo: Sholamon re Israel kho:kham kad' nhao: ra".

²Kho:kham Davi wa Israel au: jhaung qe- khinjaung qe- Levi byu qe alhab' re khai: zhang" yu: ra".

³Yao: wa sam xe zin we' ai: tho' qi" ra" Levi byu yauggai alhab' re byu japhin: gaug: yu: ra". Alhab' wa sam tug: she' taung ngad: ako".

⁴Kho:kham pho" wa- shid' tug: byid taung yaug re Caung:pa" Yham mau" zo" mae lau: de, kad' nhao mung: khyaug' taung re wa tung" xam: we' tarha" agyi qe-

⁵Byid taung wa gug: gam mau" qo yu nae" we' byid taung wa kho:kham: yang byid' to" ra" thoe myang: ra" nghaui" ja: zai jham ci mung: ASANG re caung: khin" nae" mau" byid' to" ra".

⁶Davi wa- Levi byu qere yao: bam: kaung re cao" yang: sam phung: khyo" to" ra". Ai bam wa Gershon- Kohad- Merari bam ngad: ako".

⁷Gershon wa Ladan we' Shimi ga" ra" yauggai zo: shid' yaug qo" ra".

⁸Ladan wa Yehie- Zetham- Yoela ga" ra" yauggai zo: sam yaug qo" mung:-

⁹Aibam wa Ladan nho: myid:zo: qe: kaung mae" au: jhaung qe ngad: ako". (Shi mi wa Shelomod- Haziels- Haran ga" ra" yauggai zo: sam yaug qo" ra".)

¹⁰Shimi wa apyad re cao" yang: Yahad- Zina- Yeu- Beria ga" ra" yauggai zo: byid yaug qo" ra". Yeu we' Beria tao wa myid:zo: myo: sho' maqo" ngad: ako". Aimung: ai tao re wa dakaung khyo" za: nghe' ako".

¹²Kohad wa Amram- Izha- Hebron- Uzie ga" ra" yauggai zo: byid yaug qo" ako".

¹³Yao" nho: zoqhid' yauggai zo: Amram wa Arun we' Moshe tao: yao: pho" ngad: ra". (Arun we' yao" myid:zo: qe wa ASANG re caung:pa" ru mae sheim nae pyo: ja: phad ngaui" nae"- yao: re caung da" byid: nae"- yao" mang mae amyu" byu qere shaman" byid: nae" ngad mung: gyang" lho" zai jham re apyad ato mae ci zaui: nae" qhid' mae" gathaung san khyin: to" ra".

¹⁴Ngadqere: Mao"So byu Moshe nho:yauggai zo: qe wa Levi byu qe mae bobo: ako".)

¹⁵Moshe wa Gershom we' Elieze ga" ra" yauggai zo: shid' yaug qo" ra".

¹⁶Gershom nho: yauggai zo: qe mae" au: jhaung wa Shebuela ngad: ra".

¹⁷Elieze wa Rehabia ga" ra" yauggai zo: dayaug za: qo" ra". Ngadqere: Rehabia wa myid:zo: myo: sho' qo" ra".

¹⁸Kohad nho: zole; Izha wa Shelomid ga" ra" yauggai zo: dayaug qo" mung: amyu" kaung: nho: au: jhaung ngad: ra".

¹⁹Kohad nho: yauggai zo: sam yaug ein: yaug Hebron wa Yeria- Amaria- Yahazie- Yekameam ga" ra" yauggai zo: byid yaug qo" ra".

²⁰Kohad nho: yauggai zo: byid yaug ein: yaug Uzie wa Mikha we' Ishia ga" ra" yauggai zo: shid' yaug qo" ra".

²¹Merazi wa Mali we' Mushi ga" ra" yauggai zo: shid' yaug qo" ra". Mali re: Eleaza we' Kisha ga" ra" yauggai zo: shid' yaug qo" ra".

²²Ngadqere: Eleaza wa yauggai zo: dayaug re: maqo" lo:- myiqe: zo: qe za: qo" yang: shid: lo" ra". Yao" nho: myiqe: zo: qe wa yao: bam yao: maung bye" qe ngad ko" ra" Kisha nho: yauggai zo: qe we' lo,xo' xo' ako".

²³Merari nho: zole; Mushi wa Mali- Ede- Yeremod ga" ra" yauggai zo: sam yaug qo" ra".

²⁴Cebam wa Levi kaung mae" myid:zo: qe ngad mung: akaung khyo"- yham khaung khyo" yao: bam yaug khao: ngo" re mang japhin: tung" to" ako". Shid' xe zin we' ai tho' qi" ra" mo, yao" myid:zo: qe yaug khao:ngo" wa ASANG nho: Caung:pa" Yham mae" mau" zo" mae vin vo; nae" qo" ako".

²⁵Davi wa Israel nho: Mao"So ASANG wa yao" byumyu" dao mae ngaui pyo: yaug yo: ru byid' to" ava". Amung: yao: yao: re: Yerusalem mae apyad ato na: li" nae".

²⁶Aimung: Levi byu qere: Levi byu qe: qhid' mae" ASANG: Zaung qhid' kheim: re we' caung:pa" ru mae ci: ra" zai alhab' re khonhae" re: vo, ca" lo: genae" mangad: ga: ta" ra".

²⁷Davi nho: lo" thao" pyang dao: re apan to: mung: Levi byu qe alhab' wa yao: bam apyad shid' xe zin dau lao"- ai: mau" qhid' mae" mang japhin: ke' ako".

²⁸Aibam re Arun nho: myid:zo: khinjaung qere Caung:pa" Yham caung:pa" mau" re bao" byid: nae"- ai: vang" we' qe, jham re qu" caung nae"- gyang" lho" ra" ja: alhab' re masan masin" maboe" sho' zam: nae".

²⁹Mao"So re qhaug' byid' ra" mug we' sin" ra" cinman" phaui:- man" mabo ra" mug- baung" to" ra" mug- mau" re qo yu nae"-Caung:pa" Yham mae qhaug' byid' ra" xeim: jham re lag nae"-

³⁰Ne,seim myi" thao khao: ngo" ASANG re caung: khin" mung: phungbao byid: nae" we' Dugno: Ba- lho" xin: poe- gatau poe ba na jham mae ASANG re xeim: qhaug' byid' ru re phad' ngaui" nae" mau" mae san: to : qhug' ako". Lhang khao: ngo" ce: mau" re zaui: nae" Levi byu khonho" yaug ga" ra" tarha" re jhaug' za: kad' to: yang: san: to: qhug' ako". Levi byu qe wa ayo, alhab' mae ASANG re caung:pa" ra" mau" re vin vo; nae" qo san: to: byid' ru qhug' ako".

³²Yao: bam wa ASANG: Zaung qhid' kheim: we' Caung:pa" Yham re qu" caung nae" we' Caung:pa" Yham mae caung:pa" ru mae Arun nho: myid:zo: khinjaung qere we' yao: bam: amyu" ba nam qere bao" thaug' byid: nae" san: to: qhug' ako".