Read Maru 1 KHO:KHAM MHOMYI: 26 Bible Online

1 KHO:KHAM MHOMYI: 26 - Maru bible

1 KHO:KHAM MHOMYI: 26

¹Cejham wa Caung:pa" Yham gug: gam mo, khyo" caung da" byid' ra" Levi byu qe: qhid' mae" jaung byid' ra" mau" zo" ngad: ra". Kora nho: kaung Asab nho: yham khaung mae" Kore nho: yauggai zo: Meshelemia ga" ra" yauggai zo: dayaug na: ra".

²Yao: wa yauggai zo: nhad' yaug qo" mung: ai bam wa yao: yao" apyad re cao" yang:- Zekharia- Yediae- Zebadia- Yathnie-

³Elam- Yeshohaia- Eliehoenai

⁴Yauggai zo: she' yaug yao: re byid' ra" khyo" yang: Mao"So: yang shaman" byid' ra" Obed Edom ga" ra" byu dayaug re: na: ra". Yao" yauggai zo: qe wa yao: bam: apyad re cao" yang: Shemaia- Yehozaba- Yoahaza- Sakha- Nethane- Ammie- Isakha- Peulthai- ga: mo, ngad: ako".

⁶Obed Edom nho: zoqhid' yauggai zo: Shemaia- wa Othani- Rephaela- Obed- Elzabad- Elihu- Shemakhia- ga" ra" yauggai zo: khyaug' yaug qo" ra". Yao: bam: boe" doe; ra" qam: mathao mae gyai akhyag: ra" byu qe ngad: ako". Athao" mae" shid' yaug wa gakai: lo" boe" doe; ako".

⁸Obed Edom nho: yham khaung wa ce: mau" qhid' mae" gyai boe" doe; ra"byu alhab' khyaug' xe: shid' yaug nyhang" jaung: to" ra".

⁹Meshelemia nho: yham khaung wa boe" doe; ra" byu daxe: she' yaug nyhang" jaung: to" ako".

¹⁰Merari kaung mae" yauggai zo: byid yaug qo" ra" Hosa ga" ra" byu dayaug na: ra". Aibam wa Shimri (Yao wa zo qhid' mangad: qere: yao: pho" yang yao: re au: jhaung kad' nhao: ra".)

¹¹Hikia- Tebalia- Zekharia bam ngad: ako". Caung:pa" yham gug: gam kad' ko" ra" mo, Hosa nho: yham khaung byu qe wa daxe: sam yaug ngad: ako".

¹²Caung:pa" yham gug: gam qere yham khaung cao" yang: aphung: phung: kho' to" ako". Yao: bam re gatau Levi byu qe we' dakhyo: Caung:pa" Yham mau" mae jaung: to" ako".

¹³Yham khaung angai aqi: re maqu" lo: yham khaung khao:ngo" kham: kholam re qo yu nae" rure pha" ce' khyo" ako".

¹⁴Shelemia wa ba thug' shad' kham: mae pha" ce' ang: ra". khonhae" re: pha,jhi" agai byid: yaug ngad: ra" yao" yauggai zo: Zekharia wa mug: am: shad' kham: mae pha" ce' ang: ra".

¹⁵Obed Edom wa mug: thao shad' kham: mae pha" ce' ang mung: yao" yauggai zo: qe wa zai to: qe, jham re gug: gam nae" pha" ce' ang: ako".

¹⁶Shuphin we' Hosa tao wa ba vao shad' kham: we' tho' mae" khyo dao mae jo; ra" Shelekhed kham: mae pha" ce' ang: ako". Gug: gam mau" re ayo, khyo" yang: daphung: thao daphung: kho' jaung: to" ako".

¹⁷Bathug' shad' mae ba khao: ngo" gug: gam khyaug' yaug- mug: am: shad' mae byid yaug- mug: thao shad' mae byid yaug zaung" ako". Zai to: qe, daqe, mae gug: gam shid' yaug yaug khyo" mung: ba khao ngo" zai to: qe, mae gug: gam byid yaug yaug zaung" ako".

¹⁸Bavao shad' mae" zaung mae khyoyae mae byid yaug- zaung yao: mae shid' yaug gug: gam byid yaug zaung" ako".

¹⁹Ceru wa Kora kaung we' Merari kaung re jaung byid' ra" gug: gam mau" ngad: ra".

²⁰Yao: bam: Levi mao: nhaung: gaje qe wa Caung:pa" Yham ngaui ban" we' Mao"So re qhaug' byid' ra" jhaung qhu" jham ke' to" ra" zai to: qe, jham re qu" caung: ra" mau" au: jhaung qe ngad: ako".

²¹Gershon nho: yauggai zo: qemae" dayaug ngad: ra" Ladan wa yao" nho: yauggai zo: Yehie nho: yham khaung bobo mung: yham khaung myo: sho' nho: phug' pho" ngad: ra".

²²Ladan nho: gatau yauggai zo: ngad ko" ra" Zetham we' Yoela shid' tao wa Caung:pa" Yham jo,nho" ban" we' zai to: qe, jham re qu" caung: ra" mau" kad' ako".

²³Amram- Izha- Hebron- Uzie bam: myid:zo: qere re: mau" jaung byid' ako".

²⁴Moshe nho: yauggai zo: Gershom nho: kaung mae" Shebuela wa Caung:pa" Yham jo,nho" ban" re qo yu: ra" zug: au: jhaung ngad: ra".

²⁵Gershom nho: yao: nhaung: Elieze khyo" yang yao: wa Shelomid we' xo' taui" ra" Elieze wa Rahabia nho: yao: pho"- Rahabia wa Yeshaia- Yoram- Zikhri- Shelomid bam: yao: pho" ngad: ra".

²⁶Shelomid we' yao" yham khaung byu qe wa kho:kham Davi- yham khaung au: jhaung qe- amyu" kaung au: jhaung qe- gyezug: qe yang Mao"So re qhaug' byid' to" ra" jhaung qhu" alhab' re qu" caung: ra" mau" au: jhaung qe ngad: ako".

²⁷Yao: bam wa gye poe mae qo" sham" yu: ra" lanyab jham mae" daqhae: re yu yang: Caung:pa" Yham mae ci nae" ai re qhaug' byid' ako".

²⁸Shelomid we' yao" yham khaung wa lapa Samuela- kho:kham Sholu- Nera nho: yauggai zo: Abne- Zeruia nho: yauggai zo: Yoab bam: yang cito: ko" ra" jhaung qhu" jham bobo mung: Caung:pa" Yham mae ci nae" qhaug' byid' to" ra" ja: khao: ngo" re qu" caung: ra" au: jhaung qe ngad: ako".

²⁹Izha nho: myid:zo: qemae" Khenania we' yao" yauggai zo: qere eib khang" ra" mau" ngad: ra" tung" xam: mau"- Israel byu qe jho" ta" ngag: byo; rure ta" sho' byid: nae" mau" re zaui: nae" jaung: to" ako".

³⁰Hebron nho: myid:zo: qemae" Hashabia we' alhab' baug thug' ra" yao" amyu" dataung: nhad' yo yaug wa Israel mung" Yodan gyaung: bavao shad' mae caung:pa" thung" we' sin: yang: re: mung" eib mau" we' sin: yang: re: alhab' re eib khang" ra" mau" jaung: to: qhug' ako".

³¹Yeria wa Hebron nho: myid:zo: qenho: au: jhaung ngad: ra". Davi kho:kham kad' ru byid xe zin ein: zin mae Hebron nho: myid:zo: qe: yham khaung jham re myid' ca: qu" mung: ce: yham khaung we' sin" ra" baug thug' ra" gyezo: qere Giliead mung" mae" Yahzera jo, qo mae na: jo, ko" rure the' myao: ako".

³²Kho:kham Davi wa Yeria nho: amyu" yham khaung qenho: baug thug' ra" au: jhaung shid' taung: nhad' yo zo: re khyin: yu mung: Rubin- Gad- Bathug' shad' Manashe mug: myid ngad: ra" Israel mung" Yodan gyaung: ba thug' shad' mae caung:pa" thung" we' sin: yang: re: mung" eib: ra" khyo we' sin: yang: re: alhab' re eib khang" ra" au: jhaung kad' nhao: ra".