Read Maru 1 KHO:KHAM MHOMYI: 29 Bible Online

1 KHO:KHAM MHOMYI: 29 - Maru bible

1 KHO:KHAM MHOMYI: 29

¹Kho:kham Davi wa mo, phaung geim" re- nga" zo: Sholamon wa Mao"So: yang khyin: yu: to" ra" yaug ngad:- Ngadqere: yao: wa ana" apyad ngai: ru we' thaung" qhug' qu" ru mamyo: shi: ngad: ra". Zaui: nae" mau" wa gyai qi" ra". Pe"mung: gare ceru wa byu qe: qhid' mae" kho:kham kho" mangad: Mao"So ASANG: nho: Caung:pa" Yham ngad: ra".

²Ngo wa Caung:pa" Yham qhid' mae" yham vo: jham ja: khao: ngo" nyhang" seim" to: va". Ai wa- Qhang- ngaui- gyid:- jo,to'- sag' the:- phug' de; ra" laug sin"- laug sin" jham lamyhung shaung: te' nae" laug je, jham- laug phyu myo: sho' ngad:-

³Cetho' mago" ngo byid' to: va". Mao"So: Caung:pa" Yham qhid' mae" nga" jhid'de; myid mathao mae ngo wa ngoyao" nho: jo, nho" mae" ngaui we' qhang re byid: va".

⁴Ngo wa Caung:pa" Yham qe, jham re shaung nae" qhid' mae" qhang gyang" joe: sam taung- ngaui gyang" joe: nhad' taung tho' mago" we'- lo,mau" zaui: mo, lo,mau" kad' nae" zai alhab' ngo byid' to: va". Ana" ASANG re mabyag lo: qhaug' byid nug yaug gatau khag' bo ko" i?- ga: ta" ra".

⁶Ailao" amyu" kaung au: jhaung qe- amyu" nho: zug: qe- gyezug: qe- kho:kham kho" mae" jo,nho" eib: ra" zug: qe wa Caung:pa" Yham kad' mau" qhid' mae" o mae" we' dakhyo: byid' ako".

⁷Ai bam wa- qhang joe: ngo" tug- ngaui joe: datig- gyid: joe: shid tig- jo,to' joe: daxe tig qhaug' byid' ako".

⁸Laug sin" qo" ra" mo, re: Levi byu Gershon nho: kaung mae" Yehie zaui" ra" Caung:pa" Yham jo,nho" ban" mae li" ke' ako".

⁹Amyu" byu qe wa ASANG re kao bau taung" byid: gemung: yao: bam myo: sho' qo" byid: geyang: bau" ako". Kho:kham Davi re: lo" thao" sho' ngaui bau" ra".

¹⁰Mo,phaung geim" qhid' kheim: mae kho:kham Davi wa ASANG re caung: khin" ra". Yao: wa ngonhaung" nho: phug' pho" Yaku nho: Mao"So ASANG we"- nao wa apyad ato mae caung: khin" byid' ru qhug' vashao: wo"-

¹¹Nao wa qi" qhang: ru we' qam: so' phungbao- qam: so' bo yaug ngad: ra". Mug:gaung dao mae" we' myid gaung dao mae" ja: khao: ngo" wa ni" nho: ngad: ra". Nao wa kho:kham alhab' re eib yaug ngad: ra".

¹²Ngaui qhang jo,nho" alhab' wa nao mae" joe" li" ru ngad: ra". Nao wa ja: khao: ngo" re ni" qam we' kheim: so' yang eib: ra". Nao wa yaug khao: ngo" re qi" qhang: ru we' qam: qo" bo nhao yaug ngad: ra".

¹³Ana"- ngonhaung" Mao"So we"- ngonhaung" nao re jeju beim: so: mung: ni" phungbao qo" ra" mang re ngonhaung" caung: khin" ra".

¹⁴Nga" amyu" byu qe we' ngo wa pe" re: gai: gai: nao re maqo" byid:- Pe"mung: gare ja: khao:ngo" wa nao mae" jhaung qhu" ngad: ra". Nao yao: sang gau ngad: ra" ja: re za: ngonhaung" qhaug' byid' ra".

¹⁵O"- ASANG we"- ngonhaung" wa ngonhaung" phug' pho" qe we' dakhyo: su: mug: mae pyaung" nha qhug' mung: byu bang" qe ru: ngonhaung" na: lo: rure nao ba: ra". Ngonhaung" apyad wa lai: lo" byaug: ra" bao qab we' dau: mung: ngonhaung" wa shid: ru mae" maqo" phao: loe, ngad: ra".

¹⁶Ngonhaung" Mao"So ASANG we"- ngonhaung" wa ni" gyang" lho" mang re nga: yhe' byid: nae" caung:pa" yham kad' nae" qhid' mae"- ce: jo,nho" alhab' re ci zhang: li" ru ngad:- Ngadqere: ai gu: alhab' wa nao mae" joe" li" mung: alhab' wa ni" nho: ngad: ra".

¹⁷Nao wa yaug khao: ngo" nhag' lam: re jham" qu" mung: din: man mo, re nao ngaui: rure ngo ba:. Ngo wa din: man" ra" myid we' nhag' lam: san san za: cegu: alhab' kao bau taung" nao re byid' to: va". Amung: cetau zaung" na ko" ra" ni" amyu" byu qe wa nao re qhaug' byid: nae" khonho" ngaui bau: ko" rure ngo myao: va".

¹⁸Ngonhaung" nho: phug' pho" Abraham- Isag- Yaku bam: Mao"So ASANG wa ai ru" ra" kao bau mheim au: gang: myid ni" byumyu" qe: nhag' lam: khug mae apyad ato mae zaui" to: byid: mung: yao: bam khonhae" re: nao re jhaug' zaug nhao: ra".

¹⁹Nao byid' to" ra" amyin" ja: khao: ngo" re phug' cao" nae" we' ce: nyhang" seim" to" ra" Caung:pa" Yham kad' mau" re aung khug nhag' lam: alhab' we' qam: ke' kao bau yang: kad' nae" myid nga" zo: Sholamon re byid: wa,- ga: caung: khin" ra".

²⁰Ai: thao Davi wa amyu" byu qere naonhaung" Mao"So ASANG re caung: khin" ge,- ga: amyin" byid' ra". Amung: mo,byu phung: geim" wa yao: bam: phug' pho" qenho: Mao"So ASANG re caung: khin" byid: mung: yao: bam wa au: gam" byo" yang: ASANG re nga: yhe' byid' ako". Kho:kham rere: nga: yhe' byid' ako".

²¹Thao: ba re yao: bam wa ngaui" xeim: khyo" gug'nyhug' jham re se' yang: ai jham re ASANG re qhaug' byid: mung: amyu" byu qere zo: nhao: ako". Aitho' mago"- yao: bam wa nung: jaung lo: dataung- yao lo: dataung- yao dataung- gaug geim" ngaui" xeim: phad' ngaui" byid' ako". Yao: bam wa sabyi' qang: xeim: rere: qhaug' byid' ako".

²²Aimung: yao: bam wa ai: ba mae ASANG: qhid' kheim: mae zo: shaug' yang: gyai ngaui bau" na: ako". Yao: bam wa shid' lhang ein: lhang Sholamon re kho:kham ga: ta" hau" ako". Yao: bam wa ASANG: mang mae yao: re yao: bam: kho:kham khyo" xau gyad byid: mung: Zadog re wa khinjaung khyo" xau gyad byid' ako".

²³Aimung: Sholamon wa ASANG: yang ta" to" ra" kho:kham tao" mae yao: pho" Davi khu mae kho:kham xo' kad' ra". Yao: wa aung doe; ra" kho:kham ngad mung: Israel amyu" geim" yao" mho dao: re tae" gyo" ako".

²⁴Zug: qe alhab'- gyezo: qe we' Davi nho: yauggai zo: gaje qe alhab' lhao" re: kho:kham khyo" Sholamon re jhaug' zaug nae" dao:so: byid' ako".

²⁵ASANG wa amyu" geim" Sholamon qhid' kheim: mae gyaug phug' yang: ye; jo, nhao mung: Israel mung" re eib: qu" ra" kho:kham gatau alhab' mo, tho' yao: re phungbao byid' ra".

²⁶Yese nho: yauggai zo: Davi wa Israel mung" re byid xe zin eib: ra". Yao: wa Hebron mae nhad' zin- Yerusalem mae sam xe: sam zin eib: ra".

²⁸Yao: wa apyad qi: mao: thao- jo,nho" qo" thao- su: yang phug' myao: qhug' thao shid: lo" mung: yao" yauggai zo: Sholamon wa yao" khu mae kho:kham xo' kad' ra".

²⁹Kho:kham Davi nho: mhomyi: aqhid mae" lo" thao" joe"sho' re lapa Samuela- Nathan- Gad sam yaug: nho: tung" xam: paug' mae tung" to" ako".

³⁰Ai: tung" xam: jham wa yao: khoru: eib: ru- yao: khoqhi" kheim: so' bo yaug ngad: ru we' yao: mae re: Israel mung" mae re: lhang" gam: mae" mung"dan: jham mae boe" ra" khyo alhab' re ta" to" ako".