Read Maru 2 KHO:KHAM MHOMYI: 10 Bible Online

2 KHO:KHAM MHOMYI: 10 - Maru bible

2 KHO:KHAM MHOMYI: 10

¹Rehoboam wa Shekhem khyo ye" ra". Aimae mug: am: shad' mae" Israel byu qe alhab' zang" ham mung: yao: re kho:kham kad' nhao: ako".

²Kho:kham Sholamon nho: lo, mae" Egutu mung" khyo phao: loe; lo" yaug ngad: ra" Nebad nho: yauggai zo: Yeroboam wa ce: lau dao: re the' gyo: lao"- yao: wa Egutu mung" mae" tug' lo: ra".

³Mug: am: mae" amyu" kaung qe wa yao: re khai: yu nhao: ke' mung: yao: bam alhab' Rehoboam jhao" zang" ham: ye: yang: yao: re-

⁴Ni" pho" Sholamon wa ngonhaung" re gyai thin: ra" khyo" kad' mung: ngonhaung" re qola: vhin: lo: ra". Nao wa ai: qo jham re seim: nhao mung: yo yo za: ngonhaung" re kad' re wa ni" qao: mae ngonhaung" jhaug' zaug za: na: bam nae"- ga: ta" ako".

⁵Rehoboam wa ai: khyo we' sin: yang: myid: qu" nae" qhid' mae" ngore ba na sam ba akhang" byid: gela,- aimung: dam: li" geri ga: phaug' tau" ra". Ailao" ai: byu qe to" lo" ako".

⁶Kho:kham Rehoboam wa yao: pho" Sholamon nho: pha,jhi" byid: khyo" zaui" lo: ra" lau: de, mao: zo: qe we' jho" qham: ra". Yao: wa ce: byu qere byid: nae" dao: phyid' pe" ja: naonhaung" ngore pha,jhi" qo" byid: genae" i? ga: myid' ra".

⁷Yao: bam wa nao wa ce: byu qere: nau" nhae" za: kad' mung: gyo" ngaui gyo" yo sho' ra" dao: phyid re byid: yang: yao: bam re ngaui nhao: re wa yao: bam wa khonhae" re: jhaug' zaug za: nao re caung da" li" genae"- ga: tau" ako".

⁸Ngadqere: yao: wa ai: lau: de, mao: zo: qenho: pha,jhi" byid' rure pe" shui manho lo:- yao: we' daga" qi" li" mo, ana" yao" pha,jhi" byid: lau: de, boe" na ko" ra" apyad ngai: ra" mo, jhao" ye" ra".

⁹Yao: wa yao: bam re naonhaung" ngore pe" pha,jhi" byid: genae" i? Yao: bam: qo re seim: nhao byid: nae" ngore mho' na ko" ra" mo, re ngo pe" ta" nae" i? ga: myid' ra".

¹⁰Yao: bam wa yao: re nao ceru: ta" ang: ra" nga" lo, nhaung: thao" nyhug' wa nga" pho" nho: phyid' dam: tho' je: thau: ra".

¹¹Nga" pho" wa naonhaung" re qola: vhin: ra" ngo wa je: lhao" re: ai: qo jham re je: la: nhao nae". Yao: wa naonhaung" re vose" yang be; ra". Ngo wa to' zaui: te' to" ra" taui: vose" yang naonhaung" re be, nae" ein: yao: bam re ta" wa,- ga: pha,jhi" byid' ako".

¹²Sam ba thao re Yeroboam we' amyu" byu qe alhab' yao" yang ta" to" ru we' dakhyo: kho:kham Rehoboam jhao" dam: li" ako".

¹³Kho:kham pho" wa lau: de, mao: zo: qeyang pha,jhi" byid' rure pe" shui manho lo:- apyad ngai: ra" mo; yang pha,jhi" byid' to" ru we' dakhyo: amyu" byu qere thin thin za: dao: jhau: ra".

¹⁴Yao: wa nga" pho" wa naonhaung" dao mae qola: vhin: lo: ra". Ngo wa je: lhao" re: aijham re la: nhao nae". Yao: wa naonhaung" re taui: vose" yang be; ra"- ngo wa naonhaung" re to' zau: te' to" ra" taui: vose" yang be, nae" ga: yao: bam re ta" ra".

¹⁵Aiwa Shilo mae" lapa Ahiya nho: nhad' khyo" Nebad nho: yauggai zo: Yeroboam re ASANG ta" to" ra" khyo re ASANG: myid o: ru boe" li" nhao nae" qhid' mae" boe" ru ngad: ra". Ceru wa amyu" byu qere kho:kham pho" yang matae" gyo: byid' ra" khyo ngad: ra".

¹⁶Amyu" byu qe wa yao: bam: dao: re kho:kham pho" manug: tae" gyo: byid' rure ba gelao"- yao: bam wa- Davi we' yao" yham khaung gyoe; gyo" vashao: wo"- yao: bam ngonhaung" re pe" kad' byid' qu" ko" ra" i? Israel lau: de, qe we"- yham phao: lo" gelang: se,- Rehoboam wa yao: yao" gaung re lha" yang: na vashao:- ga: zag: hug' ako". Ailao" Israel byu qe wa geim lau to" mung: Rehoboam mae" thug' lo" ako".

¹⁷Rehoboam re Yuda mug:myid mae na ko" ra" amyu" byu qenho: kho:kham khyo" za: kad' nhao: to: co' ako".

¹⁸Ai: thao kho:kham Rehoboam wa mau" zaui: byu qenho: au: jhaung ngad: ra" Adoniram re Israel byu qejhao" ye: nhao: ke' ra". Ngadqere: yao: bam wa yao: re laugbaui: yang lham: pye' se' pye' ako". Ailao" Rehoboam wa yao" gyekhe' myao: lhin" khug khyo phyad phyad do; zaung mung: Yerusalem khyo phao: loe; lo" byaug: ra".

¹⁹Ai: ayo, mae" mug: am: shad' mae" Israel mung" byu qe wa Davi kho:kham nho: kho:kham yham khaung qere gye kad' ako".