Read Maru 2 KHO:KHAM MHOMYI: 16 Bible Online

2 KHO:KHAM MHOMYI: 16 - Maru bible

2 KHO:KHAM MHOMYI: 16

¹Yuda kho:kham Asa eib: ru sam xe: khyaug' zin ein: zin mae Israel kho:kham Basha wa Yuda mung" khyo jhin" vao ye: mung: Yuda mung" khyo thug' lo"- vao lo kad' ra" khyo re phyid' pye' nae" qhid' mae" Rama mae gyetab kad' ra".

²Amung: Asa wa Caung:pa" Yham we' kho:kham kho" jo,nho" bam mae" ngaui we' qhang jham yu: yu mung: Suri kho:kham- Benhadad jhao" Damasku khyo vhin: ke' mung:-

³Nga" shid' yaug: yao: pho" shid' yaug we' dakhyo: nga" shid' yaug myid vang" ba nam kad' lang:- ce: ngaui we' qhang jham wa ni" qhid' mae" jhaung qhu" ngad:- yao" gyezo: qere nga" mug: myid mae" yao: dam: jhui" yu nae" qhid' mae" Israel kho:kham Basha we' nao myid vang" ba nam jho" kad' to" rure ana" phyo' pye' wa,- ga: ta" nhao: ke' ra".

⁴Kho:kham Benhadad wa Asa ta" rure myid vang" mung: yao" gyezug: qe we' gyezo: qere Israel vogaung: jham re gyekhe' zin: nae" nhao: ke' ra". Yao: bam wa Iyon- Dan- Abel Bed Makha- vogaung: jham we' zokho jham qaung" to" ra" Nabhtali mug: mae" vogaung: jham alhab' re sang: yu: ako".

⁵Kho:kham Basha wa boe" ra" khyo re the' gyo: lao"- Rama mae gyetab kad' na: rure thang: pye' mung: mau" zo" re to" pye' ra".

⁶Ai: thao kho:kham Asa wa Yuda mung" geim" mae" byu qere khai: zhang" yu mung: Rama mae kho:kham Baasha ci: lo: ra" laugbaui we' sag' the: jham re yetai: yu genae" qhid' mae" aibam re amyin" byid' ra". Amung: aijham re Geba we' Mizpa vogaung: re gyetab kad' rumae yao: bam ci: ako".

⁷Ai: ayo, mae lapa Hanani wa kho:kham Asa jhao" ye: mung: nao wa Israel kho:kham nho: gyetab- ni" Mao"So ASANG re khug ngha nae" atha"- Suri kho:kham re nao khug ngha: ruyang ni" lo, mae" phao: loe; avako".

⁸Sudan byu qe we' Libya byu qe wa gyekhe' myao: lhin" we' myao: jui: mo, myo: sho' bo: ra" gyetab mo" zang qo" ako" mangad: i? Ngadqere: nao ASANG re khug ngha: ruyang yao: wa nao re aibam re aung: pye' nhao: ra".

⁹ASANG wa yao: bam: aung khug nhag' lam" yang yao: re jhaug' zaug: ra" mo, re qam: bo nhao nae" qhid' mae" mug:myid geim" re te' te' za: lhaug' qu" na: ra". Nao wa ako" asho: kad' ava". Airumung: ana" mae" thoegu: khonhae" re: gyekhe' poe mae na ca" li" nae"- ga: yeta" ra".

¹⁰Ce: mathao mae Asa wa lapa pho" re gyai nhag' yo: mung: yao: re jao cao" yang taui" to" ra". Ai: ayo, mae yao: Asa wa mung" byu daqhae: re se' da: be, khyad' kad' ra".

¹¹Asa eib: ra" ayo, mae boe" ra" gu: aqhid mae" lo" thao" sho' mae" boe" gu: alhab' re Yuda we' Israel kho:kham qenho: mhomyi: paug' mae tung" xam" to" ako".

¹²Asa wa kho:kham kad' ru sam xe: gug zin ein: zin mae khyid xo sho' no: ruyang qeim: lo" byaug: ra". Ngadqere: yao: wa bao" yu: ru qhid' mae" ASANG jhao" maphaug' lo lo: mocid' sara jhao" ye" ra".

¹³Shid' zin thao re yao: wa shid: lo" mung:-

¹⁴Davi nho: vogaung: mae yao: yao" qhid' mae" yao: kyaung" to" ra" laug khyaung lab mae nyhab' pye' ako". Yao: bam wa nyhab' shaung nae" qhid' mae" yao" maogaung re shaung nae" xeim: nae pyo: cid' we' sheim nae pyo: xau jham re ci: ako". Yao: bam wa yao: shid: rure kaug' ngug nae" myikhyeim" mo" kad' ako".