Read Maru 2 KHO:KHAM MHOMYI: 17 Bible Online

2 KHO:KHAM MHOMYI: 17 - Maru bible

2 KHO:KHAM MHOMYI: 17

¹Yehoshaphad wa yao: pho" Asa nho: khu mae kho:kham xo' kad' mung: Israel re yao: gye kad' rure qam: bo sho' kad' ra".

²Yao: wa gyetab jham re Yuda gyetab vogaung: jham mae- Yuda seyo: vogaung: jham mae- Asa yang sang: yu: ra" Ephrim mae" vogaung: jham mae nha: to" ra".

³ASANG wa Yehoshaphad re yao: pho" nho: pyad sao qhid' dau mae" aso: re thao cao" ru we' Bala re macaung:pa" ruyang yao: re shaman" byid' ra".

⁴Yao: wa yao: pho" Mao"So re caung da" byid' ra". Mao"So: amyin" dao: jham re phug' cao" mung: Israel kho:kham qe kad' ra" khyo re macao" kad' ngad: ra".

⁵ASANG wa Yehoshaphad re Yuda mung"dan: re tang za: zam" ci nae" qam: byid' ra" mung" byu qe alhab' mo, yao: re jhaung qhu" jham li" byid' ako". Aimung: yao: wa jo,nho" qo" ru we' qi: sho' phug' myao: byid: qhug' yaug boe" li" ra".

⁶Yao: wa ASANG re caung da" byid' rumae phug mung: taung bug so jham re caung:pa" ra" jo, qo jham alhab' re we' Yuda mung" mae jo; ra" so myhi" Ashe nho: aso: jham alhab' re phyo' sin" pye' ra".

⁷Yao: eib: ru sam zin ein: zin mae yao: wa Yuda mung" mae" vogaung: jham re yemho" shid' nae" qhid' mae" o mae tung" to" ra" zug: qere nhao: ke' ra". Ai bam wa- Benhaila- Obadia- Zekharia -Nethane- Mikha- bam ngad: ako".

⁸Yao: bam we' daga" Levi byu gug yaug we' khinjaung shid' yaug re: cao" ye" ako". Levi byu qe wa Shemaia- Nethania- Zebadia- Asahe- Shemiramod -Yonathan- Adoniya- Tobiya- Tobadoniya ngad mung: khinjaung wa Elishama we' Yehoram bam ngad: ako".

⁹Yao: bam wa ASANG: tarha" mugsug' paug' re yu: vin mung:- Yuda mung" mae" vogaung: jham alhab' khyo jao: sho' khyo ye: yang: aire Yuda mung" byu qere mho" shid' byid' ako".

¹⁰ASANG wa lhang" gam: mae" mung"dan: jham alhab' re Yehoshaphad we' gye jho" zin: nae" rure gyaug nhao: ra".

¹¹Philisti byu qe damyo" wa Yehoshaphad re ngaui we' qhang myo: sho' we' gatau: jhaung qhu" jham myo: sho' cili" byid: mung: Arab byu qe wa yao: re yao 7,700 dau:- cad' be, 7,700 dau: li" byid' ako".

¹²Aimung: Yehoshaphad wa xo' yang: qam: so' je: bo: li" ra". Yao: wa Yuda mung" geim" mae gyetab we' vogaung: jham re te: mung:-

¹³Aijham mae zokho myo: sho' qaung" to" ra". Yao: wa Yerusalem mae yao: bam: amyu" kaung re cao" yang: baug thug' ra" zug: qere nha: to" ra".

¹⁴Adna wa Yuda amyu" kaung qemae" gyetab jham: nho: gyezug: ngad: ra". Yao: qao: mae gyezo: 300,000 yaug qo" ra".

¹⁵Aso: shid' lam: ein: yaug zug: wa Yehohanan ngad mung: gyezo: 280,000 yaug qo" ra".

¹⁶Amung: aso: sam lam: ein: yaug zug: wa Zikhri nho: yauggai zo: Amasia ngad mung: gyezo: 200,000 yaug qo" ra". (Amasia wa ASANG re caung da" byid: nae" yao: yao" myid khyo" qhaug' byid' ra".)

¹⁷Benyamin amyu" kaung mae" gyetab jham: nho: gyezug: wa Eliada ngad mung: baug thug' ra" gyezo: dayaug ngad: ra". Go we' lo, la: ci: ra" gyezo: 200,000 re eib: ra" gyezug: ngad: ra".

¹⁸Yao" o mae" gyezug: pho" wa Yehozabad ngad mung: gyekhe' poe qhid' mae" nyang" za: gyekhin ci: ra" byu 180,000 yaug qo" ra".

¹⁹Ce: gyezo: qe wa Yerusalem mae kho:kham re caung da" byid: mung: gyezo: gaje qere wa Yuda mung" mae" gyetab vogaung: gatau jham mae nha: to" ra".