Read Maru 2 KHO:KHAM MHOMYI: 18 Bible Online

2 KHO:KHAM MHOMYI: 18 - Maru bible

2 KHO:KHAM MHOMYI: 18

¹Yuda kho:kham Yehoshaphad jo,nho" qo" mung: mang qi" li" lao"- yao: wa yao" yham khaung byu qe we' Israel kho:kham Ahab nho: yham khaung byu qe: agyo: mae myi: jho" yu nae" khyo re kad' ra".

²Zin na mataung" myao" kyo re Yehoshaphad wa Ahab re yeqhug' nae" qhid' mae" Samari vomo" khyo ye" lo" ra". Yehoshaphad we' yao" thao cao" mo, re nga: yhe' byid' ra" khyo" Ahab wa yao we' nung: myo: sho' se' yang: zo: shaug' poe kad' ra". Yao: wa Gilead mung" mae" Ramod vomo" re gye yebo khe' nae" qhid' mae" Yehoshaphad re ta" ngaug: yu nae" seim" ra".

³Yao: wa Ramod khyo gye yekhe' zin: nae" khyo nao ngo we' daga" bocao" nae" i? ga: myid' ra". Yehoshaphad wa nao jin" lao" wa ngo wa jin" jin" ngad:- ai we' dakhyo: nga" gyetab re: jin" jin" ngad:- ngonhaung" nao jhao" bobo nae" ga: phaug' tau" ra".

⁴Ai: thao yao: wa- ngadqere: ASANG we' shi" sao qhid' jho" qham: qu" lang:- ga: ta" ra".

⁵Aimung: Ahab wa lapa alaug byid yo yaug ko re khai: yu mung: yao: bam re- ngo Ramod khyo gye yekhe' nae" ye: zai i? Maye: zai i? ga: myid' ra". Yao: bam wa yekhe' wa, Mao"So wa nao re aung doe; ru byid' li" nae"- ga: tau" ako".

⁶Ngadqere: Yehoshaphad wa- yao: khyo" yang nga" shid' yaug byin phyo: qo" jho" qham nae" lapa gayaug mana i? ga: myid' ra".

⁷Ahab wa Imla nho: yauggai zo: Mikhaia ga" ru gatau dayaug na shi" ra". Ngadqere: ngo wa yao: re nghang" ra". Pe"mung:ga"re yao: wa nga" qhid' mae" khonhae" re: gai: ru daja: re: lapa mapa: qu" ngad: ra"- ga: tau" ra". Yehoshaphad- nao airu: ta" nae" ma- ang ga: phaug' tau" ra".

⁸Ailao" Ahab wa kho:kham vang" mae" zug: re khai: yu mung: aijao" Mikhaia re jhui" yu nae" yao: re ta" ra".

⁹Kho:kham shid' yaug wa yao: shid' yaug: nho: kho:kham bau: qhang ve, mung: Samari vogaung: kham" nho: taung gaung shad' gaug nao: jao: mae" yao: shid' yaug: tao" khau" mae zaung: jo; ako". Lapa qe alhab' wa yao: shid' yaug: qhid' kheim: mae lapa pa: ako".

¹⁰Yao: bam mae" Khenana nho: yauggai zo: Zedekia wa jo, to' khyug jham kad' mung: Ahab re- ASANG ceru: ta" ra"- cejham ciyang nao Suri byu qere khe' zin" re yao: bam re bin sho' aung: pye' li" nae"- ga: lapa pa: ra".

¹¹Lapa gaje alhab' re: daru: za: ta" ako". Yao: bam wa Ramod re gye yezin: wa, nao aung nae" ASANG wa nao re aung doe; ru byid' li" nae"- ga: ta" ako".

¹²Ai: au: re Mikhaia re yejhui" ra" zug: pho" wa yao: re lapa gaje qe alhab' wa kho:kham pho" qhid' mae" aung myaug nae" rure lapa pa: ako". Nao re: daru: za: lapa pa wa,- ga: ta" ra".

¹³Ngadqere: Mikhaia wa daui: na: ra" ASANG khyo" yang nga" Mao"So ngore ta" ra" dao: re ngo ta" nae"- ga: ta" ra".

¹⁴Kho:kham Ahab qhid' kheim: mae yao: thug' li" lao"- kho:kham pho" wa Mikhaia we" kho:kham Yehoshaphad we' ngo wa Ramod re gye yekhe' zai i? Maye: khe' zai i? ga: myid' ra". Mikhaia wa- ye khe' wa,- nao aung nae" ASANG wa nao re aung doe; ru byid' li" nae"- ga: tau" ra".

¹⁵Ngadqere: Ahab wa ASANG: mang mae nao ngore dao: jhau: ra" au: dangman" ru ta" wa, lhe"- ein: nao re ngo khonho" lhang ta" va" i? ga: phaug' tau" ra".

¹⁶Mikhaia wa Israel gyezo: qe wa yao lhaug' yaug mabo: ra" yao jham re" ru: bug gaung khaung: mae byo: sin" na: rure ngo the' myao:-amung: ASANG wa ce: byu qe- au: jhaung maqo" ngad: ako". Yao: bam re yaug yo za: yham phao nhao: ke' ge,- ga: ta" ra" ga: phaug' tau" ra".

¹⁷Ahab wa Yehoshaphad re yao: wa nga" qhid' mae" khonhae" re: gai: ra" dao: lapa mapa: qu" ngad: ra" ein: nao re ngo ta" va". Khonhae" re: aqeim za: ngad: ra"- ga: ta" ra".

¹⁸Mikhaia wa xo' mung:- ana" ASANG ta" rure tae" gyo: wa,- ASANG wa yao" mug: lagyo: jham yao" nhae mae ye; jo, mung: mug: khaungdao mae" yao" tao" khau" dao mae zaung: jo; rure ngo myao:-

¹⁹Yao: wa ye" lo" mung: Ramod mae se' pye' qhug' nae" qhid' mae" Ahab re khag' yang mhug' pyag' nae" i? ga: ASANG myid' ra". Mug: lagyo: jham wa damyo"- daja: ga: ta" na: ako".

²⁰Byo dadau: wa ASANG jho" bye ce" ye: mung: yao: re ngo mhug' pyag' nae"- ga: ta" ra".

²¹ASANG wa khoru: mhug' pyag' nae" i? ga: myid' ra". Ai: byo wa ngo ye: mung: Ahab nho: lapa qe alhab' re mhug' ta" nhao nae" ga: phaug' tau" ra". ASANG wa yao: re ye mhug' pyag' wa,- nao aung myaug: li" nae"- ga: ta" ra".

²²Mikhaia wa- ceru boe" ava"- ASANG wa ai: ni" lapa qere nao re mhug' ta" nhao: ava". Ngadqere: nao qug: khai: kyi" khyag' ru qhug' nae" amyin" yao: yao: khyo" to" ava"- ga: dao: pin" ra".

²³Ailao" lapa Zedekia wa Mikhaia jhao" ye: mung: yao" myo, khung: re yepyo' mung: ASANG: byo wa khoyo, re ngo mae" thug' lo" mung: nao re dao: jhau: ra" i? ga: myid' ra".

²⁴Mikhaia wa nao nhaung thao" qe, khyo phao: vho' nae" ye" lo" lao"- nao ba: li" nae"- ga: phaug' tau" ra".

²⁵Ailao" kho:kham Ahab wa yao" gyezug: dayaug re Mikhaia re taung: wa,- yao: re vomo" zug: Amon jhao" jhui" lo" mung: kho:kham nau" Yoasha re lo" byid: wa,-

²⁶Ngo pe" maqo dam: tug' joe" lo yo, joe" sho' yao: re thaung: khug mae pye' zaui: to: mung: zo:ve we' qid masho: majhin kad' ge,- ein: yao: bam re ta" wa,- ga: amyin" byid' ra".

²⁷Mikhaia wa nao pe" maqo lo: dam: tug' lo:ngad: re wa ASANG nga" nhad' khyo" dao: jhau va" ru wa mangad:- ga: ta" ra". Amung: yao: wa ngo ta" va" dao: re yaug khao: ngo" tae" gyo: ge,- ga: paug' ta" ra".

²⁸Ai: thao Israel kho:kham Ahab we' Yuda kho:kham Yehoshaphad wa Gilead mae" Ramod vogaung: re gyekhe' nae" ye" lo" ako".

²⁹Ahab wa Yehoshaphad re nga" shid' yaug gyekhe' poe khyo ye" lo" au: ngoyao" gaung re geim kad' nae". Ngadqere: nao wa naoyao" kho:kham mai bau: re ve, wa,- ga: ta" ra". Amung: Israel kho:kham wa geim kad' mung: gye poe khyo ye" lo" ako".

³⁰Suri kho:kham yao" gyekhe' myao: lhin" zug: sam xe: shid' yaug re Israel kho:kham mae" je yang: gatau khag' rere: makhe' zin: nae" amyin " byid' to" ra".

³¹Aimung: yao: bam kho:kham Yehoshaphad re myao lao" yao: bam alhab' mo, wa yao: re Israel kho:kham ngad ga: jho gemung: yao: bam yao" thao cao" khe' ako". Ngadqere: Yehoshaphad zag: hug' lao"- ASANG wa yao: re khyad' yu mung: gyekhe' zin" ru yao: mae" phaug' lo" byaug: ako".

³²Gyekhe' myao: lhin" zug: qe wa yao: Israel kho:kham mangad' rure myao gemung: yao: re cao" khe' rure thang: pye' ako".

³³Ngadqere: Suri gyezo: dayaug: yang mageim: bag: ke' ra" myo: dakhe' wa kho:kham Ahab re yao" nho: qao nghoe' axo' gyo: mae lazao" ra" yao: wa ngo dae de; va"- ga: yao" gyekhe' myao: lhin" keim: yaug re hug' mung: lhang: lo wa,- ngore gye poe mae" jhui" thug' lo" la,- ga: ta" ra".

³⁴Gyekhe' poe gyai thin: au: kho:kham Ahab wa Suri byu qe shad' khyo myo, khung: qang yang: yao" gyekhe' myao: lhin" dao mae nga: jo; ra". Ba vao yo, mae yao: shid: lo" byaug: ra".