Read Maru 2 KHO:KHAM MHOMYI: 21 Bible Online

2 KHO:KHAM MHOMYI: 21 - Maru bible

2 KHO:KHAM MHOMYI: 21

¹Yehoshaphad wa shid: lo" mung: Davi nho: vogaung: mae" kho:kham lab mae nyhab' pye' ako". Yao" yauggai zo: Yehoram wa yao" khu mae kho:kham xo' kad' ra".

²Yuda kho:kham Yehoram nho: yauggai zo: Yehoshaphad wa Azaria- Yehie- Zekharia- Azariahu- Mikhae -Shephatia ga" ra" yao:nhaung: khyaug' yaug qo" ra".

³Yao: bam: yao pho" wa yao: bam re qhang- ngaui we' gatau phug' de; ra" jo,nho" myo: sho' re byid: mung: Yuda mung" mae" gyetab vogaung: dayaug re davo vo mae zug: kad' nhao: ra". Ngadqere: Yehoram wa zoqhid' ngad: ruyang Yehoshaphad wa yao: re yao" khu mae kho:kham xo' kad' nhao: ra".

⁴Yehoram wa mung"dan: re tang sho' bin: qo" zam" ci lao"- yao:nhaung: qe alhab' re we' Israel zug: qe daqhae: rere: se' pye' ra".

⁵Yehoram wa apyad sam xe: shid' zin re kho:kham boe" lo mung: Yerusalem mae she' zin eib: na: ra".

⁶Yao: wa kho:kham Ahab we' Israel kho:kham gatau qenho: makhyang" ra" ave, re cao" ra". Pe"mung:ga"re yao: wa Ahab nho: myiqe: zo: dayaug re lo, xo' yu: ra". Yao: wa ASANG re qobo shad' lhoe" ra".

⁷Ngadqere: ASANG wa Davi nho: kho:kham kaung re manug: phyo' pye' ngad: ra". Pe"mung:ga"re yao: wa Davi we' dao: thang" kad' to: mung: yao" myid:zo: qe wa khonhae" re: xo' yang eib: li" genae" ga: dao:so: byid' to: yang: ngad: ra".

⁸Yehoram eib: ra" ayo, gyo: mae Edom wa Yuda re geim lau to" mung: loe; beim: ra" mung"dan: boe" lo: ra".

⁹Airumung: Yehoram we' yao" gyezug: qe wa gyekhe' myao: lhin" jham we' daga" Edom khyo jhin" vao ye" lo" ako". Aimae Edom gyetab wa yao: bam re vang" ci: ako". Ngadqere: myi" re yao: bam phao: loe; lai: thug' lo" nae" khyo qo" kad' yu: ako".

¹⁰Ai: ayo, mae" Edom wa Yuda nho: loe; beim: ra" mung"dan: ngad: lo: ra" ce: ayo, mae yao: Libna vogaung: re: tau: lhan" ra". Pe"mung:ga"re Yehoram wa- yao" phug' pho" qenho: Mao"So ASANG re shapye' pye' va" ruyang ngad: ra".

¹¹Yao: wa Yuda bam mug: khaung: mae taung bug so re caung:pa" ra" jo, qo jham lhao" re: kad' mung: Yuda we' Yerusalem byu qere ASANG re qobo shad' lhoe" nae" au: jhui" she: ra".

¹²Lapa Elia wa Yehoram re ceru: ga: vhin tung" dakhye' vhin: ke' ra". Aiwa ni" nho: phug' pho" Davi nho: Mao"So ASANG wa nao re dao: phyid' ava". Pe"mung:ga"re nao wa ni" pho" kho:kham Yehoshaphad we' ni" phug' kho:kham Asa nho: ave, rere: macao" kad' yang: ngad: ra".

¹³Ai: atha"- nao wa Israel kho:kham qenho: ave, re cao" mung: Yuda we' Yerusalem byu qere alhab' we' yao" khu mae xo' kad' mo; yang Israel byu qere jhaug' mazaug: ru jhui" kad' ko" ru we' dakhyo: Mao"So re jhaug' mazaug kad' nhao: na: ako". Nao wa nao tho' je: gai mo, ngad ko" ra" ni" mao:nhaung qere lhao" re: se' pye' ra".

¹⁴Ai: mathao mae- ASANG wa ni" byu qere ni" zo: dau qere- ni" yham sang myhi" qere- gyai thin sho' qobo dae byid: mung: ni" jo,nho" jham re phyo' pye' li" nae".

¹⁵Nao yao: re: daba we' daba je: xo: li" nae" ngad: ra" vae: dug: khai" no: rure kham zo" li" nae" ga" ru ngad: ra".

¹⁶Qid yae cao" yang: te" na: jo, ko" ra" Kusha byu qe: nhae mae Philisti we' Arab byu qe daqhae: na: jo; ako". ASANG wa Yehoram re gye yezin: genae" qhid' mae" aibam re jhan" ke' ra".

¹⁷Yao: bam wa Yuda mung" khyo jhin" vao ye: mung: kho:kham kho" re ye lhad' yu yang: kho:kham pho" nho: zothao" yauggai zo: Ahazia mae" je yang: kho:kham myhi" qe- yauggai zo: alhab' re kyam: byu qekhyo" jhui" lo" byaug: ako".

¹⁸Ceru: boe" thao re ASANG wa kho:kham pho" re vae: dug: khai" nho: ra" no boe" li" nhao: ra".

¹⁹Kho:kham pho" wa shid' zin ko- ai: no wa zo" zo" mae" je: xo: li" mung: dayin dayo: kham zo: mung: lo" thao" mae shid: lo" ra". Yao" phug' pho" qere kad' ru we' dakhyo:- yao: re kaug' ngug: rumae khyeim" mo" myi: mamad byid: ngad: ako".

²⁰Yehoram wa apyad sam xe: shid' zin re kho:kham boe" lo mung: Yerusalem mae she' zin eib: na: ra". Yao: shid: au: khag' re: makaug' ngad: ako". Yao: bam wa yao: re Davi nho: vogaung: mae nyhab pye' ako". Ngadqere: kho:kham lab mae mangad: ngad: ra".