Read Maru 2 KHO:KHAM MHOMYI: 24 Bible Online

2 KHO:KHAM MHOMYI: 24 - Maru bible

2 KHO:KHAM MHOMYI: 24

¹Yoasha wa apyad nhad' zin mae Yuda kho:kham boe" lo mung: Yerusalem mae byid xe zin eib: ra". Yao: myhi" wa Bersheba mae" Zibia ga: yaug ngad: ra".

²Yao: wa khinjaung Yehoiada daui: na: ra" myhao"- ASANG re o ngaui nhao: ra" mau" kad' ra".

³Yehoiada wa kho:kham Yoasha qhid' mae" yham sang myhi" shid' yaug khyin byid' ra". Ai tao wa yao: re yauggai zo: qe- myiqe: zo: qere khau: byid' ra".

⁴Yao: kho:kham boe" ru dayo, kyo thao re- Yoasha wa Caung:pa" Yham re dam: nyhang" ca" ga: myid: phyid' ra".

⁵Yao: wa khinjaung qere we' Levi byu qere Yuda vogaung: jham khyo ye: mung: mo, byu alhab' mae" Caung:pa" Yham re zin khao: ngo" qo" dam: nyhang" nae" ngaui laug sho' cao" zhang: yu genae" qhid' mae" amyin" khyo" ke' ra". Yao: wa yao: bam re aijao" kad' nae" ta" ra". Ngadqere: Levi byu jham wa nai" na gemung:-

⁶Yao: wa yao: bam: au: jhaung Yehoiada re khai: yu mung:- ASANG: daui daui yaug Moshe yang amyu" byu qere ASANG: qhid' kheim: Zaung re bao" thaug' ra" ngaui byid: genae" qhid' mae" mho' to" ra" Yuda we' Yerusalem mae" Levi byu qe gaug: yu ko" ra" khang: re nao pe"mung: makhyui nhao: i? ga: mho' ra".

⁷(Ai: akyang qeim: ra" Athalia nho: thao cao" mo; yang ai: Caung:pa" Yham re qeim nhao mung: gyang" lho" ra" zai myo: sho' re Bala re caung:pa" rumae ci: pye' ako".)

⁸Kho:kham wa Levi byu qere alu: ngaui ke' nae" qhid' mae" ban" dalam: kad' mung: aire Caung:pa" Yham kham: mae to" to: genae" qhid' mae" amyin" byid' ra".

⁹Yao: bam wa Yerusalem we' Yuda mung" jao: sho' khyo- Mao"So: daui daui yaug Moshe yang din"pyad' yo mae sao qhid' gaug: zhang: qhid: ra" khang: re yaug khao: ngo" ASANG jhao" cili" genae" qhid' mae" dao: pyang: ke' ako".

¹⁰Ceru wa mo, byu qere we' yao: bam: au: jhaung qere ngaui nhao: ra". Yao: bam wa yao: bam: khang: ngaui re cili" mung: ban" re byang" sho' li" ke' ako".

¹¹Levi byu qe wa ba khao: ngo" ban" re qu" gam mo, ngad ko" ra" kho:kham zug: qejhao" lhaung" dao: ye" ako". Ai: ban" byang" li" khao: ngo"- kho:kham nho: jo,nho" zam: we' Khinjaung Yin" nho: gaung tha" kad' yaug wa ai: ngaui jham re phoe' yu mung: ai: ban" re yao" jo, qo mae dam: `to" ako". Airu: yao: bam wa ngaui myo: sho' re qo" zhang: yu: ako".

¹²Kho:kham we' Yehoiada wa ai: ngaui re Caung:pa" Yham dam: nyhang" ra" mau" re qu" gam mo, re lhaung" byid' ako". Yao: bam wa laug kho' ba mo,- lagsama" qe- dam: nyhang" rumae ci: ra" to' jham re be, mo, re okaung lhaung: yu: ako".

¹³Mau" zaui: mo, alhab' gyai phin" zaui: gemung: azhao: mae" ru: boe" sho' yao: yao: bam dam: qo" kad' ako".

¹⁴Dam: nyhang" ru bin: kad' lao"- dang: ra" qhang we' ngaui re kho:kham we' Yehoiada re qhaug' byid: mung: aishid' yaug wa Caung:pa" Yham qhid' mae" khug' jham we' gatau: kang: keim jham kad' rumae ci: ako". Yehoiada kao so' daui: ra" myhao" Caung:pa" Yham mae ngaui" xeim: jham re man: man: ngaui" byid' ako".

¹⁵Yao: wa apyad dayo: sam xe zin joe" mung: gyai mao: thao re shid: lo" ra".

¹⁶Yao: bam wa Israel byu qe: qhid' mae" re:- Mao"So qhid' mae" re:- Caung:pa" Yham qhid' mae" re: yao: kad' lai: lo: ra" mau" zo" re axam: aso: kad' byid' ra" khyo" Davi vogaung: mae" kho:kham lab mae yao: re nyhab' ako".

¹⁷Ngadqere: Yehoiada shid we' Yuda au: jhaung qe wa yao: bam: dao: re tae" gyo: byid: nae" kho:kham Yoasha re ta" ngaug: yu: ako".

¹⁸Airu: mung: mo, byu qe wa yao: bam: phug' pho" qenho: Mao"So ASANG: Caung:pa" Yham mae caung:pa" rure thang: pye' ako". Amung: solho jham re we' Ashe so myhi" nho: khyao dau sulho jham re caung:pa" li" ako". Ce: qobo jham re shad' ra" yao: bam: qobo wa ASANG: nhag' jam: yo" rure Yuda we' Yerusalem dao mae joe" li" nhao: ra".

¹⁹ASANG wa yao: jhao" dam: phaug' lo nae" qhid' mae" yao: bam re ta" peim: byid: nae" lapa jham re nhao: ke' ra". Ngadqere: mo, byu qe wa matae" gyo: ha: pye' ako".

²⁰Ailao" Mao"So: byo wa khinjaung Yehoiada nho: yauggai zo: Zekharia re li" vao: jaung" ra". Yao: wa mo, byu qe gai: the' myao nae" jo, qo mae ye; jo, mung:- naonhaung" wa yao" amyin" dao: jham re pe"mung: maphug' cao" lo: naonhaung" yao" dao mae kyi" khyag' ru boe" nhao ko" i?- ga: Mao"So ASANG myid' ra" lhe"- naonhaung" yao: re shapye' pye' ako". Aimung: naonhaung" re yao: shapye' pye' ava" lhe"- ga: hug' ra".

²¹Kho:kham Yoasha wa Zekharia re gye khug' kad' rumae bobo mung: kho:kham nho: amyin" khyo" mo, byu qe wa Caung:pa" Yham vang" khug mae Zekharia re laugbaui: yang pye' se' pye' ako".

²²Kho:kham pho" wa Zekharia nho: yao: pho" Yehoiada jhaug' zaug za: caung: da" byid' lo: ra" khyo re to" myhid' pye' mung: Zekharia re se' pye' ra". Zekharia wa kao gyo" lo" na: au: nao kad' na: rure ASANG the' myao mung: nao re qobo dae byid: vashao: wo"- ga: ta" ra".

²³Aizin xaung: thug' yo, joe" lao" Suri gyetab wa Yuda we' Yerusalem re gye li" zin: mung: au: jhaung alhab' re se' pye' yang: lanyab myo: sho' re Damasku khyo sham" cilo" ko" ra".

²⁴ASANG Suri gyetab re ngai ngadqere: gyai myo: sho' je: qi" ra" Yuda gye re aung: pye' nae" akhang" byid' ra". Pe"mung:ga"re mo, byu qe wa yao: bam: phug' pho" qenho: Mao"So ASANG re shapye' pye' geyang: ngad: ra". Cere" ru: ASANG wa kho:kham Yoasha re qobo dae byid' ra".

²⁵Yao wa dae xo sho' de' ra". Gyevo qe zad: phao: lo" gelao"- yao" gyezug: qemae" shid' yaug wa yao: re geim lau mung: khinjaung Yehoiada nho: yauggai zo: re se' ra" lage, phaug' ra" khyo" yao" yab jaung: mae yao: re se' pye' ako". Yao: re Davi nho: vogaung: mae nyhab' pye' ako". Ngadqere: kho:kham lab mae manyhab' ko" ngad: ra".

²⁶(Yao: re gye kad' geim lau: ra" mo, wa Amon myiqe: Shimead ga: mang: ra" yaug: nho: yauggai: zo: Zabad- Moba myiqe: Shimead ga: yaug: nho: yauggai zo: Yehozabad ga: ru shid' yaug ngad: ako".)

²⁷Kho:kham qenho: akhyo re tung" to" ra" mugsug' paug' mae Yoasha nho: yauggai zo: qenho: mhomyi:- yao: re qobo zhaug' ra" lapa dao: jham- Caung:pa" Yham khoru dam: kad' ra" khyo tung" xam: jham bobo: ra". Yao" yauggai zo: Amazia wa yao" khu mae kho:kham xo' kad' ra".