Read Maru 2 KHO:KHAM MHOMYI: 28 Bible Online

2 KHO:KHAM MHOMYI: 28 - Maru bible

2 KHO:KHAM MHOMYI: 28

¹Ahaza wa apyad shid' xe zin mae kho:kham boe" lo mung: yao: wa Yerusalem mae daxe: khyaug' zin eib: na: ra". Yao: wa yao" phug' pho" kho:kham nho: gai: ra" ave, re macao" ngad: ra". Ai: atha" yao: wa ASANG re mangaui nhao: ra" mau" jham re kad' ra".

²Amung: Israel kho:kham qe: ave, re cao" kad' ra". Yao: wa to' yang kad' to" ra" Bala khyao dau solho jham kad' nhao mung: Hinnom lao: khaung: mae sheim nae pyo: xau phad' ngaui" byid' ra".

³Israel byu qe jhui" vao ye" lo" au: ASANG: yang ai: mung"dan: mae" khe' thug' pye' ra" amyu" byu qenho: maca' majhad' lo, mau" re lag qu" yu mung: solho jham re phad' ngaui" xeim: khyo" yao" yauggai zo: qere lhao" re ngaui" byid' ra".

⁴Taung bug so re caung:pa" ra" jo, qo jham- bug gaung jham- ba sham gae qao: khao: ngo" mae Ahaza wa ngaui" xeim: ngaui" byid: mung: sheim: nae pyo: xau phad' ngaui" byid' ra".

⁵Kho:kham Ahaza qobo shad' ruyang yao" Mao"So ASANG wa Suri kho:kham re yao: re khe' aung: pye' nhao: mung: Yuda byu qe myo: sho' re kyam: byu qekhyo" Damasku khyo jhui" lo" nhao: ra". ASANG wa Remalia nho: yauggai zo: Israel kho:kham Peka rere: Ahaza dao mae aung: pye' nae" akhang" byid: mung: daba mae za: lhe" thao" ra" Yuda gyezo: 120,000 yaug re se' pye' ra". Yao: bam: phug' pho" qenho: Mao"So ASANG wa ceru: boe" nae" akhang" byid' ra". Pe"mung:ga"re Yuda byu qe wa yao: re shapye' pye' geyang: ngad: ra".

⁷Zikhri ga: mang: ra" Israel gyezo: dayaug wa kho:kham Ahaza nho: yauggai zo: Maseia rere: kho:kham kho" eib yaug Azrikam rere: -kho:kham pho" nho: o mae" yaug ngad: ra" Elkana rere: se' pye' ra".

⁸Yuda byu qe wa yao: bam: mao:nhaung: qe ngad sho' ngadqere: Israel gyetab wa myiqe: 200,000 yaug we' zoshao qere kyam: byu qekhyo" taung" yu mung: lanyab myo: sho' we' daga" Samari vogaung: khyo jhui" phao: lo" ako".

⁹Obed ga: mang: ra" ASANG: lapa dayaug wa Samari vogaung: mae na: ra". Yao: wa Israel gyetab Yuda kyam: byu qe we' daga" dam: tug' lo: na mung: vogaung: khyo vao lo nae" ngad: au: yetug: yu mung:- yao: wa naonhaung" mho" pho" qenho: Mao"So ASANG wa Yuda qere nhag' yo: mung: yao: bam re naonhaung" re aung: pye' nhao: ra". Ngadqere: ana" yao: wa yao: bam re naonhaung" yang gyai makhyang" ra" khyo" se' pye' ra" thoe re the' gyo" ava".

¹⁰Amung: ana" naonhaung" wa Yerusalem we' Yuda byu yauggai myiqe: qere naonhaung" jeim kad' pye' nae" seim" ako". Naonhaung" re: naonhaung" Mao"So ASANG re qobo shad' lhoe" vako" rure maba ko" i?

¹¹Nga" dao: re tae" gyo: ge,- ce: kyam: byu qe wa naonhaung" mao:nhaung: nhae: mo" qe ngad: ako". Yao: bam re phao nhao: ke' ge,- mangad: re ASANG wa yao" nhag' jam: yo" rumae" naonhaung" re qobo dae byid' li" nae"- ga: ta" ra".

¹²Mug: am: mung"dan: mae" au: jhaung qe byid yaug ngad ko" ra" Yehohanan nho: yauggai zo: Azaria- Meshilemod nho: yauggai zo: Berekhia- Shalum nho: yauggai zo: Yehizkia- Hadlai nho: yauggai zo: Amasa bam re: gyetab kad' ra" lo, mau" re ngag: thaug' ako".

¹³Yao: bam wa ai: kyam: byu qere cekhyo dajhui" lo ge,. Ngonhaung" wa ASANG re qobo shad' bam va". Ngonhaung" re qobo dae byid: nae" man: sho' yao: re nhag' yo: nhao va". Ana" naonhaung" wa ngonhaung" qobo re myo" li" nhao nae" ra" mau" re zaui: nug: ako"- ga: ta" ako".

¹⁴Ailao" gyetab wa kyam: byu qere we' lanyab jham re mung" byu qere we' au: jhaung qere ab byid' ako".

¹⁵Aimung: kyam: byu qere sham" yu: to" ra" lanyab mae" mai bau: gae byid: nae" qhid' mae" byu byid yaug re mau" byid' ako". Yao: bam wa aibam re mai bau: jham- Khyid zhaung: jham- zo:ve jham- shaug' qid yao: bam dae khu mae gyad nae" zhanlun xau jham- re gae byid' ako" khyo maqo" su: qam: saung" nang: mo, re loze jham: dao mae zaung nhao mung: kyam: byu qe alhab' re Yuda mug:myid: mae jo; ra" laso' gae vogaung: Yerikho khyo jhui" tug' lo" ako". Ai: thao Israel byu qe wa Samari mae" yham khyo dam: tug' lo" ako".

¹⁶Edom byu qe wa Yuda re dam: li" khe' zin: mung: kyam: byu qe myo: sho' re taung" she: lo" ako". Aimung: kho:kham Ahaza wa Asuri khosin" Tiglad Pilesa re bao" yu nae" byu nhao: ke' byid: nae" qhid' mae" mho' ke' ra".

¹⁸Ce: ayo, mae yao: Philisti byu qe wa ba vao shad' mae" bam khyid khaung: mae" vogaung: jham re we' Yuda mug: thao shad' mae" vogaung: jham re li" khe' zin" ako". Yao: bam wa Bed Sheme vogaung: Iayalon vogaung:- Gederod vogaung:- Timna vogaung:- Gimzo vogaung:- Su khu jham re lhad' sang: yu mung: aitau mae gyag maqui: te" na: ako".

¹⁹Pe"mung:ga"re Yuda kho:kham Ahaza wa yao" mung" byu qe: akho: akhang" re mangad mangung: kad' pye' mung: ASANG re ngag: thaug' ra". Amung: ASANG wa Yuda mung" dao mae qug: khai: dayin dayo: boe" nhao: ra". Timna vogaung: we' Gimzo vogaung: jham we' aijham nho: vogaung: ngai jham bobo mung:-

²⁰Asuri khosin" wa Ahaza re bao" thaug' byid: nae" atha"- yao: re ngag: thaug' mung: yao: re qug: khai: dayin dayo: kad' byid' ra".

²¹Aimung: Ahaza wa Caung:pa" Yham mae" kho:kham kho" mae" mung" byu qenho: au: jhaung qe: yham jham mae" qhang re yu mung: aijham re khosin" pho" re byid' ra". Ngad sho' ngadqere: ai yang pe" maqo" bao" kad' byid: ngad: ra".

²²Yao: qhug' ra" qug: khai: dayin dayo: jham wa xo: tho' xo: lo lao"- Ahaza wa ASANG re ga-au: tho' qobo je: shad' lhoe" ra".

²³Yao: wa- yao: re aung: pye' ra" Asuri byu qenho: so jham re ngaui" xeim: ngaui" byid: mung: Asuri so jham wa Asuri kho:kham qere bao" thaug' byid' ako". Yao: bam re ngo xeim: ngaui" byid' ngad re yao: bam wa ngo rere: bao" thaug' byid' li" genae"- ga: ta" ra". Ceru wa yao" dao mae we' yao" byumyu" dao mae kyi" khyag' ru boe" nhao: ra".

²⁴Aitho' mago" yao: wa Caung:pa" Yham zai kug jham re yu: yu mung: adau dau be; kho' sin" pye' ra". Yao: wa Caung:pa" Yham re pyid' to: mung: Yerusalem khyi" khao: ngo" mae phan jham re zhaug' to" ra".

²⁵Yuda vomo"- vogaung: khao: ngo" mae taung bug so jham re caung:pa" ra" jo, qo kad' mung: aimae taung bug so jham re sheim nae pyo: ja: xau phad' ngaui" byid' ra". Ceru: kad' mung: yao" phug' pho" qenho: Mao"So ASANG: nhag' jam: yo" rure yao: yao" gaung mae joe" li" nhao: ra".

²⁶Yao: eib: ra" aqhid mae" athao joe" sho' boe" lo: ra" khyo jham gatau alhab' re Yuda kho:kham qe we' Israel kho:kham qenho: mhomyi: paug' mae tung" xam" to" ako".

²⁷Kho:kham Ahaza wa shid: lo" mung: Yerusalem mae nyhab' pye' ako". Ngadqere: kho:kham lab mae manyhab' ngad: ako". Yao" yauggai zo: Hezekia wa yao" khu mae kho:kham xo' kad' ra".