Read Maru 2 KHO:KHAM MHOMYI: 33 Bible Online

2 KHO:KHAM MHOMYI: 33 - Maru bible

2 KHO:KHAM MHOMYI: 33

¹Manashe wa Yao: kho:kham boe" lo: au: daxe: shid' zin shi" ngad: ra". Yao: wa Yerusalem mae 25 zin eib: na: ra".

²Yao" byumyu" qe qhid' khyo jhin" ye" lo" ko" au:- mung"dan: mae" ASANG: yang khe' thug' pye' ra" maca' majhad' ave, lo, mau" re cao" mung:- Manashe wa ASANG re qobo shad' ra".

³Yao: pho" Hezekia yang phyo' pye' va" ra" taung bug so re caung:pa" ra" jo, qo jham re dam: kad' ra". Yao: wa Bala caung:pa" nae" qhid' mae" phan jham re kad' mung: Ashe so myhi" nho: khyao dau sulho jham rere: kad' ra". Amung: yao: wa kyi jham rere: caung:pa" ra".

⁴Yao: re apyad ato mae caung:pa" byid: nae" jo, qo ga: ASANG: yang ta" to" ra" Caung:pa" Yham mae tarha" taung bug so jham: phan jham re kad' ra".

⁵Yao: wa Caung:pa" Yham vang" shid' lam: mae kyi jham re caung:pa" nae" phan jham re kad' ra".

⁶Yao: wa yao" yauggai zo: qere Hinon lao: khaung: mae ngaui" xeim: khyo" phad' ngaui" byid' ra". Yao: wa boe, phyid'- vha" ru- lo, kyo' qu" mo, we' jan: zho: mo, re dao: myid: myid' ra" mau" kad' ra". Yao: wa ASANG re qi: sho' qobo shad' lhoe" mung: yao: nhag' jam: yo" rure lhau: zhung" ke' ra".

⁷Davi we' yao" yauggai zo: Sholamon pha: re ce: Yerusalem tau ce: Caung:pa" Yham mae ngore caung:pa" nae" jo, qo khyo" Israel amyu" kaung daxe: shid' kaung: nho: mug:myid alhab' mae" ngo khyin: yu: to: va" jo, qo ngad:-

⁸Israel byu qe nga" amyin" dao: jham alhab' re phug' cao" mung: nga" daui daui yaug Moshe yang yao: bam re byid' to" ra" Tarha" alhab' re phug' cao" ko" re wa yao: bam: phug' pho" qere ngoyang byid' to" ra" mung"dan: mae" yao: bam re khe' thug' pye' nae" ngo akhang" mabyid: nae"- ga: ta" to" ra" jo, qo Caung:pa" Yham mae khyao dau sulho dalam: to" to" ra".

⁹Yao" byumyu" qe qhid' au: khyo jhin" ye" lo" ra" au:- Manashe wa Yuda mung" byu qere yao" yang khe' thug' pye' ra" byumyu" qeyang shad' lhoe" ko" ra" qobo tho' je: qi" ra" qobo jham re lhao" re: shad' lhoe" genae" jhui" au: she: ra".

¹⁰Manashe we' yao" mung" byu qere ASANG: yang ta" peim: byid: sho' ngadqere: yao: bam matae" gyo: ngad: ako".

¹¹Airu: mung: ASANG wa Yuda mung" re Asuri gyetab mae" zug: qere jhin" vao ye: nhao: ra". Yao: bam wa Manashe re taung" yu mung:- yao: re jo, to' nghoe: te' yang: jao co" yang taui: mung: Babelon khyo she: lo" ako".

¹²Yao" dayin dayo: qug: khai: kham zo" rumae" yao: nhag' lam: nyham: khyo" mung: yao" Mao"So ASANG jhao" phaug' lo mung: bao" thaug' byid: nae" ru yao: re mho' ra".

¹³Mao"So wa Manashe nho: akyu" mho' dao: re khae: yu byid: mung: yao: re Yerusalem khyo tug' lo" nhao: ru we' dam: eib nhao: ra" khyo" yang dao: phyid' byid' ra". Ceru wa ASANG wa Mao"So ngad: rure ba nhao lam" nhao: ra".

¹⁴Ceru: thao re- Manashe wa mug: am: shad' Gihon qid thug' nhae lao: khaung: akhyug mae" ngo: kham: dung: we' Ophela ga: mang: ra" vogaung: mug:myid joe" sho' ngad: ra" Davi nho: vogaung: ba thug' shad' taung gaung shad' vang khyae bao re je: myhao sho' ce" to' ke' ra". Yao: wa gyezo: daphung: we' gyezug: dayaug yaug rere: Yuda mung" mae" gyetab vogaung: khao: ngo" mae nha: to" ra".

¹⁵Yao: wa Caung:pa" Yham mae" taung bug so jham re we' aimae yao" yang ke' to" ra" khyao dau sulho rere: Caung:pa" Yham jo; ra" bug gaung dao mae" we' Yerusalem vogaung: gatau: jo, qo mae" tarha" taung bug so phan jham rere: yu: pye' ra". Yao: wa cegu: alhab' re vogaung: taung gaung shad' khyo tai: thug' ye: mung: shapye' pye' ra".

¹⁶Yao: wa ASANG re caung:pa" ra" jo, qo mae" phan rere: nyhang" pye' ra". Yao: wa ai: dao mae zam" khug: ra" ngaui" xeim: jham- jeju beim: so" ra" ngaui" xeim: jham re phad' ngaui" byid' ra". Yao: wa Yuda mung" byu qe alhab' re Israel nho: Mao"So ASANG re caung:pa" genae" qhid' mae" amyin" byid' ra".

¹⁷Mung" byu qe wa caung:pa" jo, qo gatau jham mae ngaui" xeim: jham re xo' yang: phad' ngaui" byid: gengad yang: re: yao: bam wa aijham re ASANG re za: ngaui" byid' ako".

¹⁸Manashe yao" Mao"So re akyu" mho' ru- Israel nho: Mao"So ASANG: mang mae yao: re dao: jhau mo, lapa qenho: mungdao: jham- Manashe kad' lo: ra" lo, mau" gatau ja: khao: ngo" re Israel kho:kham qenho: mhomyi: paug' mae tung" xam" to" ako".

¹⁹Kho:kham nho: akyu" mho' dao:- aire Mao"So: yang tau: byid' ra" dao: phyid- amung: yao: myid matha" shire yao: shad' lhoe" ra" qobo japhin:- yao: kad' ra" makhyang" ra" mau"- tarha" taung bug so re caung:pa" ra" jo, qo jham we' yao: kad' ra" so myhi" Ashe nho: so lho jham we' yao: caung:pa" ra" solho jham: khyo alhab' re lapa qe: mhomyi: paug' mae tung" xam" to" ako".

²⁰Manashe wa shid: lo" mung: kho:kham kho" mae nyhab' pye' ako". Yao" yauggai zo: Amon wa yao" khu mae kho:kham xo' kad' ra".

²¹Amon wa yao: Yuda kho:kham boe" lo: au: re yao" apyad shid' xe: shid' zin ngad mung: Yerusalem mae shid' zin eib: na: ra".

²²Yao: pho" Manashe ru: yao: wa ASANG re qobo shad' mung: yao: pho" caung:pa" lo: ra" solho jham re caung:pa" ra".

²³Ngadqere: yao: pho" ru: mangad:- yao: wa nhag' lam: manyham: khyo" ru we' ASANG shad' khyo re: maphaug' lo ngad: ra". Yao: wa yao: pho" tho' lhao" re: qobo je: kad' ra".

²⁴Amon nho: gyezug: qe wa yao: re geim lau to" mung: kho:kham kho" mae yao: re khug' se' pye' ako".

²⁵Yuda Mung" byu qe wa Amon re khug' se' ra" mo, re se' pye' mung: yao" yauggai zo: Yoshia re kho:kham kad' nhao: ako".