Read Maru 2 KHO:KHAM MHOMYI: 34 Bible Online

2 KHO:KHAM MHOMYI: 34 - Maru bible

2 KHO:KHAM MHOMYI: 34

¹Yoshia wa yao: Yuda kho:kham boe" lo: au: yao" apyad she' zin ngad mung: yao: wa Yerusalem mae sam xe: dazin eib: na: ra".

²Yao: wa ASANG re ngaui nhao: ra" mau" re kad' ra". Yao: wa yao" phug' pho" Davi nho: ave re cao" mung: Mao"So: tarha" jham alhab' re jhaug' za: phug' cao" ra".

³Yoshia kho:kham boe" thao she' zin mae yao: gyai apyad ngai shi" au:- yao: wa yao" phug' pho" kho:kham Davi nho: Mao"So re caung:pa" ra". Ai: thao byid zin re yao: wa tarha" taung bug so re caung:pa" ra" jo, qo jham so myhi" Ashe nho: so lho jham- gatau solho jham alhab' re yao: phyo' qheim" pye' ra".

⁴Yao" byu qe wa yao: ceim" shid' ra" qao: mae na mung: Bala re caung:pa" ra" jo, qo mae" phan jham re be; khyoe' khyo" pye' mung: aijham: nhae mae jo; ra" sheim nae pyo: xau phad' ngaui" ra" Phan jham re be; khyug' khyo" pye' ra". Yao: bam wa Ashe nho: khyao dau solho jham re we' gatau: solho jham alhab' re myidgaung khyo aphaui: be; mhan" pye' mung: aijham re ngaui" xeim: ngaui" byid: ko" ra" mo; lab jham: dao mae ai aphaui: re sin" ke' ako".

⁵Yao: wa tarha" taung bug so jham: khinjaung qe: shoqug: jham re yao: bam caung:pa" lo ko" ra" jo, qo mae" phan dao mae ngha" pye' ra". Cegu: alhab' re kad' ra" khyo" yang yao: wa Yuda we' Yerusalem re caung:pa" thung" we' sin: yang: dam: gyang" san: nhao: ra".

⁶Yao: wa vogaung: jham rere: byo; qeim: byaug: ra" Manashe- Ephrim- Simon mug: am: shad' Nabhtali joe" sho' mae" jo, qo re dakhyo: za: kad' ra".

⁷Mug: am: shad' mung"dan: jao: sho' mae" mug:myid re yao: wa Phan jham re we' Ashe so sulho jham- solho jham re aphaui: mhan" pye' mung: sheim nae pyo: xau ngaui" byid' ra"- phan jham alhab' wa aje, je, be; khyoe' pye' ra". Ai: thao yao: wa Yerusalem khyo tug' lo" ra".

⁸Yao: eib: ru daxe: she' zin ein: zin mung"dan: re we' Caung:pa" Yham re tarha" taungbug so re caung:pa" ra" khyo re thao" lo" nhao: ra" khyo" yang bin: kyang" san: pye' thao re kho:kham Yoshia wa Mao"So ASANG: Caung:pa" Yham re dam: nyhang" nae" qhid' mae" byu sam yaug re nhao: ke' ra". Aibam wa Azalia nho: yauggai zo: Shaphan- Yerusalem mang: zug: Maseia- Yoahaza nho: yauggai zo: gyezug: Yoahaza bam ngad: ako".

⁹Levi gug:gam qeyang Caung:pa" Yham mae gaug: zhang: yu: ra" ngaui jham Khinjaung Yin" Hilkia lo,mae qhaug' byid' ako". (Ai: ngaui re Ephrim Manashe dang: ra" mug: am: shad' mung"dan: mae" mung" byu qemae" we' Yuda -Benyamin- Yerusalem mung" byu qemae" khyui: zhang: yu: ru ngad: ra".)

¹⁰Ce: ngaui re Caung:pa" Yham dam: nyang" ra" byu au: jhaung sam yaug re ab byid: mung:- aibam wa- Yuda kho:kham qeyang byo; qeim: jo, nhao ko" ra" yham jham re nyhang" nae" rumae ci: ra" sag' pye: we' laugbaui jham re vai nae" yham kad' mo, re we' lag sama qere byid' ako".

¹²Ai: mau" zaui: mo, wa nhag' lam: gyaidin: mo, ngad: ako". Yao: bam re Levi byu qe ngad ko" ra" Mazari kaung mae" Yahad we' Obadia- Kohad nho: kaung mae" Zekharia we' Mashulam ga" ra" Levi byu byid yaug: yang qu" gam byid' ako". (Levi byu qe alhab' mo, wa nghaui" thoe ke' rumae jhao mo, ngad: ako".)

¹³Gaje Levi byu qe wa yham vo: tho: dai" ra" mau" mae we' mau" aja: ja: zaui: ko" ra" mau" zaui: mo, re au: jhaung kad' mung: gaje wa tung" xam: kad' gug:gam qekhyo" caung da" byid' ako".

¹⁴Zai to: qe, mae" ngaui jham phoe' yu: au: Hilkia wa Mao"So: yang Moshe re byid' to" ra" tarha"- ASANG: tarha" paug' re the' myao: ra".

¹⁵Yao: wa Shaphan re ngo wa ce: Caung:pa" Yham mae ASANG: tarha" paug' re myao va"- ga: ta" ra".

¹⁶Amung: Shaphan wa aire kho:kham pho" jhao" cilo" ra". Yao: wa nao amyin" byid' to" ra" mau" ja: khao: ngo" re ngonhaung" bin: kad' va".

¹⁷Ngonhaung" wa Caung:pa" Yham mae shaung: to" ra" ngaui re yu: yu mung: mau" zaui: mo, re we' yao: bam: au: jhaung qere byid: va"- ga: lau lo" kyo" ra".

¹⁸Ai: thao yao: wa ngo we' Hilkia yang ngore byid' ra" mugsug' paug' dapaug' cemae qo" ga: bota" mung: aire thoe qi: we' kho:kham pho" re nghe' kyo" ra".

¹⁹Mugsug' paug' nghe' na: rure kho:kham pho" the' gyo: lao" yao" nhag' lam: myid myo" ru we' yao" mai bau: jham re lao" cad' pye' mung:-

²⁰Yao: wa Hilkia- Shaphan nho: yauggai zo: Ahikam- Mikhaia nho: yauggai zo: Abdon kho:kham kho" mugsug' tung' yaug (Jere pho") Shaphan- kho:kham pho" nho: la khab' Esaia bam re-

²¹ASANG jhao" ye: mung: nga" qhid' mae" we' Israel we' Yuda mung"dan: mae na: jo, shiko" ra" mung" byu qe: qhid' mae" yeqham byid: gela,- ce: mugsug' paug' nho: mho" shid' khyo jham re cao" qho ge,- ngonhaung" nho: phug' pho" qe ASANG: mung: dao: re maphug' cao" ru we' ce: mugsug' paug' mae kad' ca" ga" rure makad' ko" ruyang ASANG wa ngonhaung" re nhag' yo" ra" ga: amyin" byid' ke' ra".

²²Kho:kham amyin" re cao" yang: Hilkia we' gaje qe wa Yerusalem asag' tam" mae na: ra" lapa myhi" Hulda ga: mang: ra" myiqe: dayaug we' yeqham: ako". Yao" yham sang pho" Shalum wa Harha nho: yao: myid:- Tigva nho: yauggai zo: ngad mung: Caung:pa" Yham mae" bau: qhang kad' ra" au: jhaung ngad: ra". Yao: bam wa boe" ra" khyo yao: re ta" kyo" ako".

²³Yao: wa aibam re kho:kham pho" jhao" dam: tug' lo" genae" ta" mung: ASANG mae" mungdao: yao: re byid' ke' ra". Aimung: dao: wa- ngo wa Yerusalem we' yao" vobyu qe alhab' re kho:kham pho" re nghe' kyo" ra" mugsug' paug' mae bo: ra" nhang: kheim" yang qobo dae byid: nae".

²⁵Yao: bam ngore ngag: pye' mung: gatau: so jham re ngaui" xeim: ngaui" byid' ako". Airu: yao: bam kad' ko" ra" mau" yang nga" nhag' jam: yo" rure lhau: zhung" to" ke' ako". Nga" nhag' jam: yo" ru wa Yerusalem re gye kad' nhao mung: aiwa nhag' yo: magyo" nae".

²⁶Kho:kham pho" yao: yao" qhid' mae" wa Israel nho: Mao"So ASANG ngo ceru: ta" ra". Nao wa mugsug' paug' mae tung" to" rure tae" gyo" ava".

²⁷Yerusalem re we' yao" vobyu qere qobo dae byid: nae" ngo khoru: kyaug' nhin" ra" dao: re nao the' gyo: lao"- nao wa nga" qhid' kheim: mae myid tha" pye' mung: naoyao" gaung re nyham: khyo" pye' yang: ni" mai bau: jham re lao" cad' pye' ru we' kaug' ngug: ra". Ngo wa ni" akyu" mho' dao: re the' gyo: va".

²⁸Yerusalem dao mae ngo byid: nae" ngad: ra" qobo dae byid' rure nao shid thao mangad: re majoe" li" nae". Ngo wa nao re yaug yo za: shid lo" nhao nae"- ga: ta" ra". Ai: byu qe wa ce: mungdao: vin yang: kho:kham Yoshia jhao" tug' phao: lo: ako".

²⁹Kho:kham Yoshia wa Yuda mung" we' Yerusalem mae" au: jhaung qe alhab' re khai: zhang" yu mung:-

³⁰Yao: bam alhab' mo, daga" za: khinjaung qe- Levi byu qe- dang: ra" amyu" byu qe alhab'- jo,nho" qo" mo,- myaung sho: mo, we' daga" Caung:pa" Yham khyo ye" ako". Kho:kham pho" wa yao: bam alhab' mo; qhid' kheim: mae Caung:pa" Yham mae" qhug' myao: yu: ra" dao: thang" mugsug' paug' geim" re thoe qi: ke' yang: nghe' kyo" ra".

³¹Yao: wa kho:kham kho" yham zang baung: nhae mae ye; jo, mung: yao: re mho dao: gyo: nae"- yao" tarha" jham we' amyin" dao: jham re yao" aung khug nhag' lam: alhab' yang phug' cao" mung: mugsug' paug' mae tung" to" ru we' dakhyo: ai: dao: thang" mae cao" nhao: to" rure lo, joe" cao" kad' nae" qhid' mae" ASANG we' dao: thang" to" ra". Amyu" byu qe alhab' re: ai: dao: thoe re phug' cao" nae" dao:so: to" ako".

³²Yao: wa Benyamin byu qe we' Yerusalem mae na: jo; ra" gatau yaug khao: ngo" re ai: dao: thang" re phug' cao" nhao: ra". Airumung: Yerusalem byu qe wa yao: bam: phug' pho" qenho: Mao"So we' yao: bam kad' to" ra" dao: thang" yang mho' ra" gu: phug' cao" ako".

³³Kho:kham Yoshia wa Israel byu qe sang: ra" mug:myid mae jo; ra" maca' majhad' ngad: ra" solho jham alhab' re phyo' qheim" pye' ra". Yao: daui: na: gu: mae yao: wa yao: bam: phug' pho" qenho: Mao"So ASANG re caung da" byid: genae" qhid' mae" mung" byu qere mho' ra".