Read Maru 2 KHO:KHAM MHOMYI: 36 Bible Online

2 KHO:KHAM MHOMYI: 36 - Maru bible

2 KHO:KHAM MHOMYI: 36

¹Yuda mung" byu qe wa Yoshia nho: yauggai zo: Yoahaza re khyin: yu mung: yao: re xau: gyad byid: yang: Yerusalem mae kho:kham kad' nhao: ako".

²Yoahaza wa yao: Yuda kho:kham boe" lo: au: apyad shid' xe: sam zin ngad: mung: Yerusalem mae lho" sam khye' eib: ra".

³Egutu kho:kham Nekho wa yao: re kyam: byu khyo" taung" yu mung:Yuda mung" re khang: khyo" qhang shid' xe joe: we' ngaui joe: shid' taung gaug: yu: ra".

⁴Nekho wa Yoahaza nho: yao:nhaung: Eliakim re Yuda kho:kham kad' nhao mung: yao" mang re Yehoiakim ga: tha" pye' byid' ra". Yoahaza wa Nekho yang Egutu mung" khyo jhui" lo" byaug: ra".

⁵Yehoiakim wa Yuda kho:kham boe" lo: au: apyad shid' xe: ngo" zin ngad mung:- yao: wa Yerusalem mae daxe: dazin eib: na: ra". Yao: wa yao" Mao"So ASANG re qobo shad' lhoe" ra".

⁶Babelon kho:kham Nebugkhaneza wa Yuda mung" khyo jhin" vao ye: mung: Yehoiakim re taung" yu mung: jao cao" yang taui: yang: Babelon khyo jhui" lo" ra".

⁷Nebugkhaneza wa Caung:pa" Yham mae" jo,nho" daqhae: re tai: lo" mung: Babelon mae" yao" kho:kham kho" mae" aijham re lo" ke' to" ra".

⁸Yehoiakim kad' ra" lo, mau" ngad: ra" yao" maca' majhad' lo, mau" jham we' yao: shad' lhoe" ra" makhyang" ra" lo, mau" bobo mung: ja: khao: ngo" re Israel we' Yuda kho:kham qe: mhomyi: paug' mae tung" xam" to" ako". Yao" yauggai zo: Yehoiakim wa yao" khu mae kho:kham xo' kad' ra".

⁹Yehoiakhin wa Yuda kho:kham boe" lo: au: apyad daxe: she' zin ngad mung: yao: wa Yerusalem mae lho" sam khye' daxe ba eib: na: ra". Yao: re: ASANG re qobo shad' lhoe" ra".

¹⁰Zin vao kheim: joe" lo lao"- Nebugkhaneza wa Yehoiakhin re kyam: byu khyo" Babelon khyo taung" jhui" lo" mung: Caung:pa" Yham jo,nho" jham re tai: lo" byaug: ra". Ai: thao Nebugkhaneza wa Yehoiakhin nho: yao: gan Zedekia re Yuda we' Yerusalem nho: kho:kham kad' nhao: ra".

¹¹Zedekia wa Yuda kho:kham boe" lo: au: apyad shid' xe: dazin ngad mung: yao: wa Yerusalem mae daxe: dazin eib: na: ra".

¹²Yao: wa ASANG re qobo shad' lhoe" mung: ASANG: mungdao: re ta" yaug lapa Yeremia nho: dao: re nhag' lam: nyham: khyo" yang: matae" gyo: byid: ngad: ra".

¹³Zedekia wa yao: re jhaug' zaug nae" ga: ASANG: mang mae yao: re deim" zag yang: jham tang: nhao yaug ngad: ra" Nebugkhaneza re gye kad' gum lau to" ra". Yao: wa myid tha" nae" we' Israel nho: Mao"So ASANG kho:kham jhao" phaug' lo nae" nhag' lam: qao: yang: ha: na: ra".

¹⁴Aitho' mago" Yuda au: jhaung qe- khinjaung qe- mung" byu qe wa yao: bam: lhang" gam: mae" byumyu" qenho: qobo shad' lhoe" ra" ave, re cao" mung: solho jham re caung:pa" ako". Aimung: yao: bam wa ASANG yao: yao" yang yao: gyang" lho" sho' kad' to" ra" Caung:pa" Yham re masan masin" kad' pye' ako".

¹⁵Yao: bam: phug' pho" qenho: Mao"So ASANG wa yao" amyu" byu qere ta" peim: nae" lapa qere xo' yang: nhao: ke' ra". Pe"mung:ga"re: yao: wa yao: bam re we' Caung:pa" Yham re tang" to: nug yang: ngad: ra".

¹⁶Ngadqere: yao: bam wa Mao"So: lagyo: qere maphug' makhyad' kad'- yao" mungdao: jham re pe" xan: masun:- yao" lapa qere qi: jung" pye' byid' ako". Aimung: lo" thao" mae yao" byumyu" qere ASANG: nhag' yo" ru wa khag' re: maqo" phao: loe, losho' saung" qi" byaug: ra".

¹⁷Airumung: ASANG wa yao: bam re gye zin: nae" qhid' mae" Babelon kho:kham re jhui" yu: ra". Kho:kham wa Caung:pa" Yham mae lhao" re: Yuda zolau: qere se' pye' ra". Yao: wa angai aqi: yauggai myiqe:- no mo, gai mo, khag' rere: nhag' makhyag' ngad: ra". Mao"So wa yao: bam alhab' mo, re yao" lo, khyo ab: pye' ra".

¹⁸Babelon kho:kham wa Caung:pa" Yham- Caung:pa" Yham jo,nho" ban" kho:kham we' yao" gyezug: qenho: jo,nho" jham re phyo' lhad' yu mung: ja: khao: ngo" re Babelon khyo tai: lo" ra".

¹⁹Yao: wa Caung:pa" Yham re we' vogaung: re kho:kham kho" jham re we' ai: jo,nho" jham alhab' we' daga" ngha" pye' mung: vogaung: vang jham re phyo' khyo" pye' ra".

²⁰Yao: wa na: dang: ra" mo, alhab' re Babelon khyo jhui" lo" mung: aimae yao: bam wa yao: re we' yao" myid:zo: qere Persian khosin" to" li" ra" ayo, joe" sho' jeim qekhyo" caung da" byid' ako".

²¹Airu: ASANG wa gau: qhid' khae" yang: lapa Yeremia nhad' khyo" mug:myid re dugno: nhao ra" thung" tarha" re macao" geyang:- aire dam: pyang" byid nae" qhid' mae" mug:myid wa nhad' xe zin lam: lam: cae: jhug tag boe" jo; nae" ga: ta" to" ra" dao: jab byang" lo: ra".

²²Kuru Persia khosin" boe" ru sao qhid' zin mae lapa Yeremia nhad' khyo" ASANG ta" to" ra" dao: jab byang" li" ra". Yao: wa Kuru re o mae tung" to" ra" amyin" re tung" mung: yao" khosin" mung"dan: khyi" khao: ngo" mae thoe qi: ke' yang: nghe' nae" qhid' mae" amyin" khyo" nae" qhid' mae" Kuru re jhan" ra". Ai: amyin" wa-

²³Ce wa Persia khosin" Kuru nho:amyin" ngad: -Mug: khaung mae" Mao"So ASANG wa ngore mug:myid geim" re eib: ra" yaug kad' nhao mung: Yuda mung" mae" Yerusalem mae yao"qhid' mae" caung:pa" yham dalam: kad' nae"- ngore qo vhin: to" ra". Ana"- Mao"So: byumyu" qe ngad ko" ra" naonhaung"alhab' wa ai: khyo lo" ge,- naonhaung" Mao"So ASANG wa naonhaung" we' daga" ngad vashao: wo"- ga" ru ngad: ra".