Read Maru 2 KHO:KHAM MHOMYI: 4 Bible Online

2 KHO:KHAM MHOMYI: 4 - Maru bible

2 KHO:KHAM MHOMYI: 4

¹Kho:kham Sholamon wa qhang phyao:- lu phyao: shid' xe daung" bo mung: myhao phyao: daxe daung" bo: ra" gyid: phan dalam: kad' ra".

²Yao: wa no, phyao: ngo" daung" apyi khyo" lae phyao: daxe daung"- anhad' lhang" gam: sam xe daung" bo: ra" lang" lang" mung: ra" gyid: qid lhao: dalam: kad' ra".

³Qid lhao: nho: taung gaung shad' anhad' mae shid' jin kad' yang: shaung: te' to" ako". shaung: te' to" ra" alho wa nung: jaung lho ngad mung: qid lhao: we' dalhang: dae dasho: za: sheim" te' to" ru ngad: ra".

⁴Ai: qid lhao: wa taung gaung shad' khyo myo, khung: qang: to" ra" gyid: bo" nung: jaung lo: daxe: shid' dau" nho: dao kao" mae kai" to" ra". Shad' khao: ngo" khyo sam dau: dau: myo, khung: qang: to" ra".

⁵Qid lhao: ayae wa danghoe' thau: ra". Anhad' wa qid keim nhad' we' dau mung: seyo: bin: bu" ru: taung gaung shad' khyo kaui: thug' li" ra". Qid lhao: wa qid ga:lan: 15000 vao: ra".

⁶Yao: bam wa jarung: daxe lam: rere: kad' ako". Ngo" lam: wa Caung:pa" Yham nho: mug: thao shad' mae to: mung:- ngo" lam: wa mug: am: shad' mae to" to" ako". Aijham wa- ngaui" xeim: khyo" phad' ngaui" byid' ra" gug'nyhug' jham: nho: gaung dau jham re cid' rumae ci nae" ngad: ra". Qid lhao: aqi: lam: mae" qid wa khinjaung qe cid' san: rumae ci nae" qhid' mae" ngad: ra".

⁷Yao: bam wa lo, ci akhyao re cao" yang: qhang myikaug' tao" daxe lam: we' saboe" daxe lam: kad' mung: Caung:pa" Yham: nho: qe, mo" qe, mae aijham re to" ako". Dashad' mae myikaug' tao" ngo" lam: we' saboe" ngo" lam: lam: to" ako". Yao: bam wa qhang khug' dayo rere: kad' ako".

⁹Yao: bam wa khinjaung qe: qhid' mae" akhug shad' vang" dalam: kad' mung: taung gaung shad' vang" re: dalam: kad' ako". Vang" agyo: mae" vao ye" ra" kham: jham re gyid: bo" yang thab' pye' ako".

¹⁰Ai: gyid: bo" qid lhao: re Caung:pa" Yham: nho: ba thug' mug: thao shad' akhyug nhae mae to" to" ako".

¹¹Huram wa ug' jham- qe, gag khao: jham- khug' jham rere: kad' ra". Yao: wa Caung:pa" Yham qhid' mae" kad' byid: nae" ga: kho:kham Sholamon re dao:so: byid' to" ra" zai alhab' re kad' pin" ra". Aijham wa zang baung: shid' zang- khug' akhyao shid' lam: bo: ra" zang baung: au: mae" daung" zang shid' zang- Ai: daung" zang lam: khao: ngo" dao mae te' to" ra" nag: to" ra" jao co: lho- daung" zang khao: ngo" mae dazang mae shid' jin jin kad' mung: kheim" te' to" ra" gyid: bo" khaung: shi: byid yo ce'- lhin" daxe lam:- jarung: daxe lam:- qid lhao:- qid lhao: re vin: ci: ra" nung: jaung lo: lho daxe: shid' lam:- ug' jham- qe, gag khao: jham- gaung: kya: jham ngad: ra". Lo, mau" zaui: sara Huram wa kho:kham Sholamon amyin" byid' to" ru we' dakhyo: ASANG: Caung:pa" Yham mae ci nae" qhid' mae" ce: zai jham re boe; jhad' to" ra" gyid: bo" mae" kad' thug' yu: ra".

¹⁷Kho:kham wa aijham alhab' re Yodan lao: khaung: Sukhod we' Zarethan agyo: mae jo; ra" zhokoe mae sheim" yu: ra".

¹⁸Zai myo: sho' re kad' mung: aijham kad' rumae ci: ra" gyid: bo" re khag' maqo" lag: ngad: ako".

¹⁹Kho:kham Sholamon wa Caung:pa" Yham qhid' mae" qhang zai jham rere: kad' ra". Aijham wa phan- Mao"So re mug qhaug' byid: nae" qhid' mae" saboe"-

²⁰myikaug' tao" jham- yaung: to" rure cao" yang: gyang" lho" thao" ra" jo, qo qhid' kheim: mae te' ra" qhang gyang" myikaug' jham-

²¹bin: shaung gin jham- myikaug' jham- nye,zai" jham-

²²Myikaug' nye,zai" jham- khug' jham- sheim nae pyo: ja: qhid' mae" ban jham- myi: de; ra" myi:gyoe: ke' ci nae" ug' the" jham ngad: ra". Cejham alhab' re qhang gyang" yang kad' to" ra". Caung:pa" Yham taung gaung shad' kham: jham we' Gyang" Lho" Thao" Jo, qo kham: jham re qhang: yang thab' to" ako".