Read Maru 2 KHO:KHAM MHOMYI: 5 Bible Online

2 KHO:KHAM MHOMYI: 5 - Maru bible

2 KHO:KHAM MHOMYI: 5

¹Kho:kham Sholamon wa Caung:pa" Yham kad' ra" mau" alhab' re bin lao"- yao: wa yao: pho" Davi yang ASANG re qhaug' byid' to: co' ra" ngaui- qhang we' gatau alhab' re Caung:pa" Yham zai to: qe, jham mae tai: ke' to" ra".

²Athao kho:kham Sholamon wa Davi nho: vogaung: Ziun mae" ASANG: Dao: Thang" Ban" re Caung:pa" Yham khyo dao: yu nae" qhid' mae" Israel byumyu" kaung- yham khaung jham: nho: au: jhaung qe alhab' re Yerusalem khyo khai: zhang" yu: ra".

³Yao: bam alhab' wa zaung poe ayo, mae zang" ham: ako".

⁴Au: jhaung qe alhab' bin: zang" ham: na gelao" Levi qe wa Dao: Thang" Ban" re tau: to' yu mung:-

⁵Aire Caung:pa" Yham khyo dao: ye" lo" ako". Khinjaung qe we' Levi qere: ASANG: qhid' kheim: Zaung re khyad' yu mung: zai khin jham alhab' re Caung:pa" Yham khyo vo; ye" ako".

⁶Kho:kham Sholamon we' Israel byu qe alhab' wa Dao: Thang" Ban" qhid' au: mae ham: phaung: na mung: matho' nghe' losho' myo" ra" yao jham- nung: jham re ngaui" xeim: ngaui" byid' ako".

⁷Ai: thao khinjaung qe wa ASANG: Dao: Thang" Ban" re Caung:pa" Yham khyo dao: ye: mung: Gyang" Lho" Thao" Jo, qo- kherubin qao: mae yeto" to" ako".

⁸Kherubin jham: nho: daung yheim" to" ru wa ban" re we' dao: ra" kang re nghoe' to" ra".

⁹Kang athao re Gyang" Lho" Thao" Jo, qo qhid' au: mae yeye; ra" yaug khag' re: gai: myao: ra". Ngadqere: jo, qo gatau khai: mae" re: maqo" gai: myao ngad: ra". (Kang wa aitau mae ana" ba joe" sho' jo; ashi")

¹⁰Yao: bam Egutu mung" mae" thug' lo: na ko" au: Israel byu qe we' ASANG Dao: Thang" kad' ra" ayo, Sina bam mae Moshe yang ai: khug mae ke' to" ra" laug pye: shid' pye: mae" je yang: Dao: Thang" Ban" khug mae gatau pe" mabo ngad: ra".

¹¹Joe" na ko" ra" khinjaung qe alhab' yao: bam yao" phung: re maqu" lo:- yao: bam yao" gaung re qhaug' byid' ako". Amung: Levi tang: be, mo, ngad ko" ra" Asab- Hemon- Yeduthun we' yao: bam: kaung mae bobo mo, alhab' wa jid: mo" pin: mai bau: ve; ako". Levi qe wa phan: nho: ba thug' shad' ayae mae jhe' cang" jham we' tang: jham ci yang: ye; jo; ako". Yao: bam we' daga" khinjaung dayo: shid' xe yaug wa labo" mad: na: ako". ASANG re caung:khin" ge,- pe"mung:ga"re yao: wa gai: ra". Amung: yao" jhid'de; myid wa apyad ato ngad: ra". Yao: bam ASANG re nghaui"caung ko" au: Nghaui"caung: mo, wa labo" jham- jhe' cang" jham- gatau: be; myhang" thoe we' thoe gyai jho" nyang: ako". Caung:pa" Yham mae" khinjaung qe thug' lo" na: au: nyag din taung" ASANG: qhid' kheim: phungbao wa jham thaui: qhui qhui qhag qhag mung: bao: jo; ra". Yao: bam ai: caung:pa" phaung re maqo" xo' kad' ngad: ako".