Read Maru 2 KHO:KHAM MHOMYI: 8 Bible Online

2 KHO:KHAM MHOMYI: 8 - Maru bible

2 KHO:KHAM MHOMYI: 8

¹Sholamon wa Caung:pa" Yham we' yao" kho:kham kho" re shid' xe zin kad' ra".

²Yao: wa kho:kham Hiram yang byid' to" ra" vogaung: jham rere: dam: te: mung: aijham mae Israel byu qere yena nhao: ra".

³Yao: wa Hamad we' Zoba mug:myid re sang: yu mung:-

⁴Din" pyad' yo mae" Palmura vogaung: re gyetab kad' pye' ra". Yao: wa zokho to: nae" qhid' mae" jo, qo agaung: ngad: ra" Hamad mae" vogaung: jham rere: dam: te" ra".

⁵Sholamon wa o mae tung" to" ra" vogaung: jham rere: te" ra". Aijham wa tho' Bed Horon we' o: Bed Horon (Kham: we' kham: kyao" de; ra" gyetab vogaung: jham)

⁶Balad vogaung:- zokho to" ra" vogaung: jham alhab'- yao" myao: jham we' myao: lhin" jham nha: to" ra" vogaung: jham ngad: ako". Yao: wa Yerusalem vogaung: mae Lebanon mung" mae- yao: eib: ra" mug:myid jao: sho' mae yao: yaung: to" ra" gu: alhab' re boe" sho' kad' ra".

⁷Sholamon wa mung"dan: re yao: bam sang: yu ko" au: Israel byu qeyang mase' pye' lo: tang" to: qhug' ko" ra" Khanan byu qenho: myid:zo: qe alhab' re jeim mau" zaui: nhao: ra". Aibam mae Hiti byu- Amori byu- Perizi byu- Hivi byu- Yebusi byu- qe bobo gemung: aibam: myid:zo: qe wa ana" ba joe" sho' xo' yang: jeim doe; lo: ako".

⁹Israel byu qere wa jeim mau" mazaui: nhao ngad: ra". Ngadqere: gyezo: qe- zug: qe- myao: lhin" gye zug: qe- myao: jui: gyezo: qe- khyo" kam" wa mau" zaui: nhao: ra".

¹⁰Yham kad' ra" mau" aja: ja: mae jeim mau" kad' ko" ra" mo; dao mae zug: kad' ra" byu 250 yaug na: ako".

¹¹Sholamon wa yao" yham sang myhi" Egutu kho:kham myiqe: zo: re Davi nho: vogaung: mae" yao: kad' byid' ra" yham khyo pyaung" yu: ra". Sholamon wa Israel nho: kho:kham Davi nho: kho:kham kho" mae yao: magai: na- pe"mung:ga"re Dao: Thang" Ban" jo; ra" jo, qo khai: mae ngadqere: aiwa gyang" lho" ra" jo, qo ngad yang: ngad: ra"- ga: ta" ra".

¹²Sholamon wa Caung:pa" Yham qhid' kheim: mae yao" yang kad' to" ra" phan dao mae ASANG re ngaui" xeim: ngaui" byid' ra".

¹³Gyang" lho" ra" ba na ba khao: ngo" qhid' mae" Moshe nho: tarha" mae ta" to" rure cao" yang: yao: wa phad' ngaui" xeim: ngaui" byid' ra". Ai: ba na jham wa Dugno: Ba- lho" xin: poe ba na- dazin mae dalhang kad' ra" man" make' mug poe ba na- Gaug yad poe ba na- Zaung poe ba na jham ngad: ako".

¹⁴Yao: pho" Davi yang to" to: co' ra" tarha" jham re cao" mung: yao: wa nghaui" caung" rumae we' khinjaung qe mau" zaui" rumae bobao" thaug' ko" ra" Levi qe we' khinjaung qenho: ba khao ngo" mau" zo" re jaung: to" ra". Yao: wa Mao"So: byu Davi yang amyin" byid' to" ru we' dakhyo: kham: dung: khao: ngo" mae yo, dau khyo" cao" yang: ba khao: ngo" mau" kad' nae" Caung:pa" Yham gug:gam mo, rere: jaung: to" ra".

¹⁵Davi yang khinjaung qere we' Levi byu qere zai to: jhi jham we' gatau: mau" zo" we' sin: yang: mho" shid' to: co' gu: re jid: gam" jao gaug kad' ako".

¹⁶Ce: ayo, joe" lao"- Sholamon nho: mau" zo" jham alhab' bin: ava". ASANG: Caung:pa" Yham apan aqao: zao: rumae" bin sho' mae" mau" alhab' wa aung myaug: ra".

¹⁷Ai: thao Sholamon wa Edom mung" mae jo; ra" Tham: ne qid yae mae" Eziongeba we' Elad gau: khung: khyo" ye" ra".

¹⁸Kho:kham Hiram wa Yao" nho: zug: qe we' lha kau: ba jhao: ra" mo; yang jhui" au: she: ra" qao: mae" qid sang pho jham Sholamon jhao" gau" lo" ako". Yao: bam wa Sholamon nho: zug: qe we' daga" Ophi mung" khyo gau" ye: mung: Sholamon jhao" qhang joe: datug je vin: lo byid' ako".