Read Maru EZRA 10 Bible Online

EZRA 10 - Maru bible

EZRA 10

¹Ezra wa- Caung:pa" Yham jao: kheim: mae goe; gyo" akyu" mho' mung:- ngug yang: ai: qobo jham re lhang: yu: na: au:- Israel byu phung: mo" zang ngad: ra" yauggai- myiqe: we' zoshao qe- yao: re lhang" gam: mung: alo akho: ngug: na: ako".

²Ailao" Elam kaung mae"- Yehie nho: yauggai zo: Shekania wa Ezra re- ngonhaung" wa taung bug byumyu" myiqe: qere lo, xo' yu mung: Mao"So we' lalam lakhug: khyo mae phyo' qheim" pye' bam va". Ngadqere:- Israel qhid' mae" myid: lao" jo, qo jo; ashi"-

³Ana" ngonhaung" wa- ce: myiqe: qe we' yao: bam: myid:zo: qere nhao: pye' nae" ein: ngonhaung" nho: Mao"So re jhaug' zaug: dao:so: to: ca" va". Ngonhaung" wa- nao: yang we' Mao"So: amyin" re nga: yhe' ra" gaje: yang pha,jhi" byid' rure cao" nae". Ngonhaung" wa- Mao"So: tarha" yang amyin" byid' to" rure cao" bam nae".

⁴Mau" boe" sho' kad' nae" ru wa ni" nho: qo ngad: ra". Ngonhaung" wa ni" thao mae na: bam:- aimung: qhid' khyo ye: mung: boe" sho' jhui" kad' la,- ga: ta" ra".

⁵Aimung: Ezra wa- khinjaung qemae" au: jhaung qe- Levi qemae" au: jhaung qe we' dang: ra" byu qemae" au: jhaung qere- Shekania pha,jhi" byid' rure kad' nae" ga" ra" dao:so: re jham tang: nhao: qhid: ra".

⁶Ai: thao yao: wa- Caung:pa" Yham qhid' kheim: mae"- Eliashib nho: yauggai zo: Yehohanan nho: yham qo bug khyo vao ye: mung: aimae pyaung" nha: to: mo, nho: jhaug' mazaug: ra" mathao mae myi geim" aimae yekaug' ngug: na: ra". Yao: wa pe" re: mazo: mashaug' ngad: ra".

⁷Byumyu" qenho: au: jhaung qe: amyin" khyo" yang- pyaung" nha: to" rumae" dam: tug' lo mo, alhab' Yerusalem mae phaung ham ca" ga: Yuda we' Yerusalem khyi" khao: ngo" khyo lau dao: kyo" ke' ra". Dayaug yaug qe sam ba gyo: mae maqo" joe" li" ngad: re- yao" nho: jo, nho" alhab' re sham" yu: pye' byid' ru qhug' mung:- yao: wa byumyu" phaung mae bovao nae" akhang" ci:phyaug' pye' ca" nae".

⁹Sam ba gyo:- lho" gug khye' ein: khye' lho" xin: shid' xe ba: ba mae- Yuda we' Benyamin mug: mae na: ra" yauggai alhab' wa- Yerusalem khyo li" mung: Caung:pa" Yham vang" mae zang" bam: ako". Mug: gyai xo sho' qu: na: ru we' mug: dab: rumae akhyag phaung ngad: ra" mathao mae yaug khao: ngo" gyo; nin" ako".

¹⁰Khinjaung Ezra to" li" mung: yao: bam re jhau: ra" yao: ta" ru wa- naonhaung" taung bug myiqe: qere lo,xo' yu: ra" khyo" yang Israel dao mae qobo qo" nhao mung: lalam lakhug mae jhaug' mazaug ngad: ako".

¹¹Aimung: ana"- naonhaung" phug' pho" qenho: ASANG jhao" mae qobo lhang: yu mung:- yao: o ngaui: ru kad' ge,- naonhaung" yao" gaung re- ce: ngonhaung" na: ra" mug: mae" taung bug qejhao" mae" kho' na mung:- naonhaung" nho: taung bug myhi" zang qere kao" pye' ge,- ga: ta" ra".

¹²Mung" byu qe wa nao ta" ru pe" ngadqere: ngonhaung" kad' nae" ga: hug' yang: tau" ako".

¹³Ngadqere:- yao: bam ceru: ga: ta" laung" ako". Mo, phaung saung" qi" ru we' mug: re: gyai qu: na: ra" mug: hao: tae mae ngonhaung" ceru: maqo" ye; jo,- ceru wa daba shid' ba za" agyo: mae qo" gai: kad' ra" mau" mangad:- pe"mung:ga"re ngonhaung" mae" myo: sho' mo, wa ce: qobo shad' rumae bobo: bam va".

¹⁴Ngonhaung" nho: zug: ade, qe wa Yerusalem mae na mung: ai: mau" re qu" caung vageshao:- ailao" taung bug myiqe: myhi" zang qo" to: yaug khag' ngadqere:- dang: to" ra" ayo, mae- au: jhaung qe we' vomo" mae" tarha" agyi qe we' daga" li" vashao:- ceru: khyo" yang boe" jo; ra" ayaug: re Mao"So mae" nhag' yo" ru pai" pye' vashao:- ga: xo' ta" ra".

¹⁵Meshulam we' Levi byu Shabethai- Asahe nho: yauggai zo: Yonathan we' Tigva nho: yauggai zo: Yahzeia mae" lai yang: gaje khag' re: ai: mau" re mangag: thaug' ngad: ako".

¹⁶Pyaung" nha: to" rumae" dam: tug' lo mo, ai: yaung: to" ra" mau" re lham yu: ako". Aimung: khinjaung Ezra wa byumyu" kaung qemae" au: jhaung qere san: jaung: to: mung: yao: bam: mang jham re tung" xam" to: byid' ra". Lho" daxe khye' ein: khye' lho" xin daba: ba mae yao: bam wa- myid' ca: qu" qhid: ako".

¹⁷Ai: thao lho" sam khye' agyo: mae yao: bam wa taung bug myhi" yu: to: mo; nho: mau" zo" alhab' re bin myid' ca: pin" ako".

¹⁸Ceru wa taung bug myhi" qo" to: mo; nho: mang japhin: ngad: ra". Byumyu" kaung cao" yang: japhin: bo: ra" khinjaung qe- Yehozadag nho: yauggai zo: qe ngad ko" ra" Yoshu we' yao" mao:nhaung: bam: kaung jham mae" mo, wa- Maaseia- Elieze- Yarib we' Gedalia-

¹⁹Yao: bam wa yao: bam: myhi" zang qere kao" pye' nae" ga: dao:so: byid: mung:- yao: bam: qobo jham: qhid' mae" yao lo: dadau: qhaug' byid' ako".

²⁰Imma kaung- Hanani we' Zebadia.

²¹Harim kaung- Maaseia- Elia- Shemaia- Yehie we' Uzia-

²²Pashu kaung- Elioenai- Maaseia- Ishmae- Nethane- Yozabad we' Elasa.

²³Levi byuqe- Yozabad- Shimi- Kelaia- (Kelita re: mang:) Pethahia- Yuda we' Elieze.

²⁴She mad be, nghaui" mo,- Caung:pa" Yham zaung" mo,- Shallum- Telem we' Uri.

²⁵Gaje gu: Paro kaung- Ramia- Izzia- Malkhiya- Mijamin- Eleaza- Makhiya we' Benaia-

²⁶Elam kaung boe:- Matania- Zekharia- Yehie- Abdi- Yeremod we' Elia-

²⁷Zatu kaung- Elioenai- Eliashib- Matania- Yeremod- Zabad we' Aziza.

²⁸Bebai kaung- Yehohanan- Hanania- Zabbai we' Athlai.

²⁹Bani kaung- Meshulam- Malug- Adaia- Yashub- Shea we' Yeremod-

³⁰Pahad Moba kaung- Adna- Khelala- Benaia- Maaseia- Matania- Bezale- Binui we' Manashe-

³¹Harim kaung- Elieze- Ishiya- Malkhiya- Shemaia- Shimeon- Benyamin- Malug we' Shemaria.

³³Hashum kaung- Matenai- Matata- Zabad- Elipheled- Yeremai- Manashe we' Shimi.

³⁴Bani kaung- Maadai- Amram- Uela- Benaia- Bedeia- Kheluhi- Vania- Maremod- Eliashib- Matania- Matenai we' Yaasu.

³⁸Binui kaung- Shimi- Shelemia- Nathan- Adaia- Maknadebai- Shashai- Sharai- Azare- Shelemia- Shemaria- Shallum- Amaria we' Yoseb-

⁴³Nebo kaung- Yeiela- Matithia- Zabad- Zebina- Yadai- Yoela we' Benaia.

⁴⁴Cebam alhab' wa taung bug myhi" yu mo, ngad: ako". Yao: bam wa aibam re kao" pye' mung: yao: bam we' yao: bam: myid:zo: qere kao" pye' ako".