Read Maru EZRA 4 Bible Online

EZRA 4 - Maru bible

EZRA 4

¹Yuda we' Benyamin byumyu" qenho: gyevo qe wa- pyaung" to" rumae" dam: phao: lo va" mo, wa Israel nho: Mao"So- ASANG: Caung:pa" Yham re dam: zhaug' na: ko" ra" thoe re the' gyo" ako".

²Aimung: yao: bam wa- Zerubabela we' byumyu" kaung jham mae" au: jhaung qere yeqhug' jhau mung:- naonhaung" Caung:pa" Yham zhaug' rumae ngonhaung" rere: bobo nhao gela,- ngonhaung" wa naonhaung" caung:pa" ra" Mao"So re caung:pa" bam mung:- Asuri khosin" Esarhadon yang ngonhaung" re cemae na nae" qhid' mae" nhao: ke' ra" au: mae" yao: re ngonhaung" ngaui" xeim: qhaug byid' lo va"- ga: ta" ako".

³Zerubabela- Yoshu we' byumyu" kaung qe au: jhaung qe wa yao: bam re- ngonhaung" Mao"So ASANG: qhid' mae" caung:pa" yham kad' nae" naonhaung" bao" maca" Persia khosin" Kuru yang ngonhaung" re amyin" byid' to: va" ru we' dakhyo: ngonhaung" zhaug' nae"- ga: ta" ako".

⁴Ailao" ai: mug: mae na: jo, mo, wa yao: bam re qam: shan nhao mung: Yuda qere kyaug' ru we' yham mazhaug' nae" qhid' mae" tam" ako".

⁵Yao: bam wa Persia Asuya zug: qere re: yao: bam re ngag: thaug' mau" zaui: nae" qhid' mae" khug vag: byid' ako". Yao: bam wa khosin" Kuru eib: ra" pyad mae" khosin" Dari pyad jao: sho' ce: mau" re xo' kad' ako".

⁶Ahasuru khosin" eib: qhid: ra" ayo, mae Yuda we' Yerusalem mae na: ra" byu qenho: gyevo qe wa yao: bam re qobo vhin: ra" mugsug' re tung" ciye" ako".

⁷Persia khosin" Artazaze eib: ra" ayo, mae re: Bishlam- Mithredad- Tabe we' yao: bam: mau" zaui: byin cao: qe wa khosin" jhao" mugsug' dakhye' tung" ako". Ai: mugsug' re Aramig khyo" tung" to" rumung:- nghe' ra" au: myan" phaug' yang: nghe' ca" ra".

⁸Mung" zug: mo" Rehum we' mang: zug: Shimshai re: Yerusalem we' sin: yang Artazaze jhao" o mae bo: ra" mugsug' re tung" ke' ako".

⁹Mung" zug: mo" Rehum mae" we' mau" sang Shimshai tarha" agyi jham we' Ereg- Babelon we' Elam mung" mae jo; ra" Susa mae" lo mo, ngad: ra" zug: ade, gaje alhab' wa-

¹⁰Qi" qhang mung: kheim: so' bo: ra" Ashurbanipa yang yao: bam: yham mug: mae" pyaung" yu mung: Samari vomo" mae we' Uphrad ba vao mang: gatau: jo, qo mae na nhao: to" ra" byu gaje we' daga" za: ceim" tung" ke' ra".

¹¹Ceru wa mugsug' mae bo: ra" khyo ngad:- khosin" Artazaze jhao" Uphrad ba vao mang: mae" yao" daui nhao lagyo: qeyang tung" ke' ra".

¹²Ngonhaung" yang nao ASANG re ba nhao nug: ru wa- ni" mug: myid gamang: khaung: mae" cekhyo lo: ra" Yuda qe wa Yerusalem mae te" na: bam mung: ai: makhyang" ru we' tau: lhan" ra" vomo" re dam: zhaug' na: ako". Yao: bam wa vang re dam: zhaug' mung: khomyhao" makyo re bin geneva" myao:.

¹³Khosin" zug: mo" we"- ce: vomo" re dam: bin: zhaug' mung: vang re qo" zhaug' pin" gelao" ai: byu qe wa khang: ke' ru thang: pye' li" genae"- khosin" zug: ni" nho: khang: ngaui yeim: lo" li" nae".

¹⁴Ana" ngonhaung" khosin" zug: nao re caung da" byid: nae" qo vin: bam: ru we' dakhyo:- ce: boe" lo: rure ngonhaung" manug: myao aimung: ngonhaung" khyo" yang-

¹⁵Khosin" zug: nao re ni" phug' pho" qe tung" to: co' ra" tung" xam: jham re qho: ca: qu" nae" amyin" dalam: khyo" ke' nae" pha,jhi" byid: nug:- nao airu: kad' re- ce: vomo" wa khonhae" re: tau: lhan" lai: lo: ru we'- ganhae" gaco' ayo, mae" ce: vomo" wa kho:kham qe we' mung" eib zug: qere qug: khai: byid' lai: lo: rure nao qhug' myao nae". Ai: vobyu qe wa khonhae" re: eib nae" gyai qug' ra". Ce: mathao mae ai: vomo" re phyo' qheim" pye' ru ngad: rure nao ba: li" nae".

¹⁶Aimung: ngonhaung" khyo" wa ce: vomo" re dam: zhaug' to: mung: ainho: vang jham re zhaug' pin" to" ngad: re- khosin" zug: nao wa- Uphrad ba vao shad' mug: re maqo" khang" nae" rure byu: myao byid' ra"- ga: tung" vhin: ke' ako".

¹⁷Khosin" pho" wa ce: dao: phyid re vhin: ke' ra". Mug" zug: mo" Rehum jhao" mau" sang Shimshai jhao" we' Samari we' Uphrad ba vao shad' mug: mae na: ra" yao: shid' zo" nho: mau" zaui: byin cao: qejhao" bang" se" ke' ra".

¹⁸Naonhaung" vhin: ke' ra" mugsug' re myan" bin: phaug' mung: ngore nghe' kyo: vako".

¹⁹Ngo wa myid' ca: qu" nae" amyin" dalam: re khyo" ke' mung: Yerusalem wa ganhae" gaco' yo, mae" yao: kho:kham kheim: so' re tau: lhan" lai: lo: rure re:- aimae lhau: zhung: mo, we' qug: khai: kad' thug' mo, byang" sho' na: lo: rure re: qhug' ca: myao va".

²⁰Ai: mae kheim: so' qi" ra" kho:kham qe eib: lai: lo mung:- Uphrad ba vao shad' mang: geim" re khang: gaug zo: mung: eib lai: lo: avako".

²¹Aimung: naonhaung" wa- ngo khyo" yang xo' yang: amyin" jham mabyid: byid: wa- ai: byu qe ai: vomo" re dam: zhaug' rure thang: to: nae" amyin" khyo" ca" genae".

²²Nga" nho: akyu" re kaung: kag' xo' yang: maboe" nhao nae" qhid' mae" ceru re aijao" yao: kad' ge,- ga" ru ngad: ra".

²³Artazaze mae" mugsug' re Rehum- Shimshai we' yao: shid' zo" nho: maui" zaui: byin cao: qere re: nghe' kyo: lao" jao"- yao: bam wa Yerusalem khyo hin hin ye: mung: Yuda qere vomo" dam: zhaug' ra" mau" tam" pye' ako".

²⁴Caung:pa" Yham mae mau" zaui" ru thang: pye' va" rumung: Persia khosin" Dari eib: ra" ban: pyad shid' zin ein: zin joe" sho' airu: yao: jo; jo; ra".