Read Maru EZRA 5 Bible Online

EZRA 5 - Maru bible

EZRA 5

¹Ai: ayo, mae- Lapa Hagi we' Ido nho: yauggai zo: lapa Zekharia wa Israel nho: Mao"So: mang khyo" yang Yuda we' Yerusalem mae na: ra" Yuda qere ta" qhid: ako".

²Shealtie nho: yauggai zo: Zerubabela we' Yehozadag nho: yauggai zo: Yoshu wa- yao: bam: lau dao: re the' gyo: lao"- yao: shid' zo: wa- Yerusalem mae" Caung:pa" Yham re dam: zhaug' qhid: ako". Aimung: lapa shid' zo: wa yao: shid' zo: re bao" ako".

³Ailao" jao" yao:- Uphrad ba vao shad' mang: mae" mung" zug: mo" Tatenai- Shetha Bozenai we' yao: shid' zo" nho: zug: byin cao: qe wa Yerusalem khyo joe" li" mung: ceru: ga: mho' ako". Ce: Caung:pa" Yham re zhaug' mung: pin" nae" qhid' mae" naonhaung" re khag' yang amyin" byid' i?

⁴Yao: bam wa- Caung:pa" Yham re zhaug' rumae bo: bao" ra" mo; alhab' nho: mang: jham rere: mho' ako".

⁵Ngadqere: Mao"So wa Yuda au: jhaung alhab' mo; nho: dao mae lhaug' qu" na mung:- Persia mung" zug: ade, qe wa- yao: bam khyo" yang khosin" Dari jhao" mugsug' tung" mung: dam: phaug' tau" ru mathe' yu nae". Pe" daja: re: makad' nae" qhid' mae" myid: phyid' ako".

⁶Ceru wa khosin" jhao" yao: bam tung" vhin: ke' ra" lau dao: ngad: ra".

⁷Khosin" Dari jhao"- ngaui pyo: yaug yo cae: tae" ru we' eib: na vashao: wo"-

⁸ASANG Kho:kham nao khyo" ceru re ba: to: ca" nae" ngad: ra". Ngonhaung" wa Yuda mang: khyo ye: mung: qi" qhang: ra" Mao"So: Caung:pa" Yham re- laug zang qi: jham we' khinqae re sag' pye: qae khyao" jham: yang zhaug' na: rure yeqhug' myao va". Mau" zo" wa gyai jang" ra" khyo" kad' gemung: zo" mae" yin yin za: qhid' khyo lo" na: ra".

⁹Aimung: ngonhaung" wa ai: mung" byu qenho: au: jhaung qere- khag' yang Caung:pa" Yham re dam: zhaug' mung: ca" ru shaung: pin" nae" amyin" byid' i?- ein: myid: va".

¹⁰Ce: mau" nho: au: jhaung kad' mo, khag' khag' ngad: ru nao re lau dao: qo" kyo: nae" qhid' mae" yao: bam re aibam: nho: mang jham myid' yu va".

¹¹Yao: bam khyo" yang- ngonhaung" wa mug:hkaung we' myidgaung: nho: Mao"So: daui daui lagyo: qe ngad mung: ganhae" gaco' yo, mae" Israel nho: kheim: so' qi" ra" kho:kham dayaug: yang shi" sao qhid' zhaug' mung: ca" ru jhab' pyang" to" ra" Caung:pa" Yham re dam: zhaug' na: ru ngad:-

¹²Ngadqere: ngonhaung" nho: phug' pho" qe wa mug: khaung mae" Mao"So re nhag' yo: nhao ko" ra" mathao mae- Khalde kho:kham yham khaung mae" kho:kham dayaug ngad: ra" Babelon kho:kham Nebugkhaneza khyo" yang yao: bam re gyekhe' aung: pye' nhao: ra". Caung:pa" Yham re phyo' qheim" pye' mung:- mung" byu qe wa Babelon khyo pyaung" jhui" phao: lo" ru qhug' ako".

¹³Aimung: Babelon nho: khosin" khyo" Kuru kho:kham eib: ra" sao qhid' zin mae Kuru wa Caung:pa" Yham dam: zhaug' nae" amyin" khyo" ke' ra".

¹⁴Yao: wa Nebugkhaneza yang Yerusalem caung:pa" yham mae" tai: yu mung: Babelon mae" Caung:pa" Yham mae lo" to" ra" Caung:pa" Yham mae" qhang we' ngaui keim kang: jham re dam: qo" yu: ra". Khosin" Kuru wa ce: keim kang: jham re- yao" yang Yuda mung" eib zug: mo" khyo" san: to" ra" Shebaza mang yaug: lo, khyo lhai: ke' byid' ra".

¹⁵Khosin" wa- aijham re yu: lo" mung: Yerusalem mae" Caung:pa" Yham khug khyo dam: lo" to: nhao yang:- Caung:pa" Yham rere: azhao jo; ra" khu mae dam: zhaug' nae" qhid' mae" yao: bam re pyang: ke' ra".

¹⁶Aimung: Shebaza joe" li" yang: ainho: apan aqao: kyae: to" ra". Ai: ayo, mae" zhaug' qhid: va" ana" ba joe" sho' mabin shi: ngad: ra".

¹⁷Ana"- Khosin" ASANG nao myid: ngaui: ngad: re- ce: Yerusalem mae" ce: Caung:pa" Yham re dam: zhaug' nae" qhid' mae" Kuru khyo" yang amyin" byid' to" ru ngad: la,- mangad: la,- ein: rure Babelon kho:kham tung" xam: mae ca: qu" nhao wa,- amung: cemau" we' sin: yang: nao pe" ru: myid: o: ra" khyo ngonhaung" re kyo" ke' wa,- ga: bo: ra".