Read Maru EZRA 6 Bible Online

EZRA 6 - Maru bible

EZRA 6

¹Aimung: khosin" Dari wa- Babelon mae zam" to" ra" kho:kham tung" xam: jham re ca: qu" nae" qhid' mae" amyin" khyo" ke' ra".

²Ngadqere: ai: mugsug' dang: re qho: myao: ru wa- Media mang: mae" Ecbatana vomo" mae ngad: ra". Ai: mugsug' dang: mae o mae" tung" xam: jham bo: ra".

³Aijham khosin" Kuru wa yao: kho:kham boe" qhid: ra" zin re gug'nyhug' xeim: jham ngaui" byid: mung: phad' ngaui" nae" qhid' mae" jo, qo dalam: khyo"- Yerusalem mae Caung:pa" Yham dalam: zhaug' nae" amyin" khyo" ke' ra". Caung:pa" Yham wa 60 daung" myhao mung: 60 daung" lae ca" ra".

⁴Khinqae jham re wa- laug zang sam pyae: zao: to" ra" dao mae sag' yang dapyae: zhaug' kai: ca" genae". Gyo" gan: ra" aphug' alhab' re kho:kham ngaui ban" mae" phoe' ca" nae".

⁵Kho:kham Nebugkhaneza yang Yerusalem Caung:pa" Yham mae" Babelon khyo tai: yu: lo: ra" qhang keim kang: we' ngaui keim kang: jham rere: Yerusalem mae" Caung:pa" Yham mae yao" jo, qo mae yao: to: ca" genae".

⁶Ai: thao khosin" Dari wa o mae" dao: phaug' re vhin: ke' ra" Uphrad ba vao shad' mang: mae" mung" zug: mo" Tatenai- Shetha- Bozenai we' Uphrad ba vao shad' mang: mae" ni" shid' zo" nho: zug: byin cao: qejhao"- Caung:pa" Yham mae" va: khyo na ge,.

⁷Aimung: ai: Caung:pa" Yham zhaug' ra" mau" re daye: bolhau: shug ge,. Yuda mung" zug: mo" we' Yuda au: jhaung qe wa Mao"So nho: Caung:pa" Yham re azhao jo; ra" jo, qo mae dam: zhaug' vageshao:-

⁸Ai: caung:pa" yham dam: zhaug' rumae yao: bam re bao" thaug' byid: nae" ngo re amyin" byid: ra". mau" nhaung" manhaung" nae" qhid' mae" yao: bam ci: yhung" pye' rure Uphrad ba vao shad' mang: mae" khang: qo" gaug: yu: to" ra" kho:kham ngaui ban" mae" phoe' ci ca" nae".

⁹Malhaui: losho' Yerusalem mae" khinjaung qere yao: bam ca" ga: naonhaung" re ta" ra" ja: pe" ngadqere: Mug: khaung mae" Mao"So re phad' ngaui" byid: nae" qhid' mae" nung: jaung nau" jham- yao jham- ngad ngad Nung: lo: nau" jham ngad ngad- jung:- cin- xo:- sabyi qang: ngad ngad- zhanlun xau ngad ngad yao: bam re naonhaung" byid: ca" genae".

¹⁰Mug: khaung: mung"dan: mae" Mao"So re khae: yu man" ra" ngaui" xeim: jham re yao: bam qo" ngaui" byid: nae" qhid' mae" ceru kad' ca" ako". Amung: nga" yauggai zo: qe we' nga" dao mae yao" shaman" jeju qo" yu sho' akyu" mho' byid: la,.

¹¹Ngo khyo" xo' yang: amyin" byid' ru wa- ce: amyin" re dayaug yaug: yang maphug' cao: ngad: re yao" yham mae" sag' pye: qae khyao" phyo' yu mung: dathao ceim yang: yao" gaung re thug' kyao" pye' ca" nae". Aimung: yao" nho: yham re basad bam kad' pye' ca" nae".

¹²Yao: re caung:pa" ra" jo, qo boe" nae" qhid' mae" Yerusalem re khyin: yu: ra" Mao"So wa ce: amyin" re maphug' cao" re ai: jo, qo mae" Caung:pa" Yham re phyo' qheim" pye' nae" seim" ra" kho:kham re ngad ngad- byumyu" mung"dan: re ngad ngad- tau: khyo" pye' vashao:- ngo Dari wa ce: amyin" re byid: va" nga" amyin" dao: re bin sho' phug' cao" ca".

¹³Ailao" mung" zug: mo" Tetenai- Shetha Bozenai we' yao: shid' zo" nho: zug: byin cao: qe wa khosin" amyin" byid' ru we' dakhyo: jhaug' za: kad' ako".

¹⁴Yuda au: jhaung qe wa- Lapa Hagi we' Lapa Zekharia shid' zo" yang qam: byid: mung: Caung:pa" Yham zhaug' ra" mau" zo" re mau" bye: bye: za: qo" xo' kad' ako". Yao: bam wa- yao: bam re Israel nho: Mao"So: yang we' Persia khosin" jham ngad ko" ra" Kuru- Dari we' Artazaze bam: yang amyin" byid' ru we' dakhyo: Caung:pa" Yham re kyab' sho' qo" kad' ako".

¹⁵Yao: bam wa- Kho:sin" Dari eib: ra" khyaug' zin: ein: zin Ada lho" khye' lho" xin: sam ba: ba re Caung:pa" Yham bin: kad' ako".

¹⁶Ailao" Israel byumyu" qe- Khinjaung qe- Levi byu qe we' pyaung" nha: to" rumae" dam: lo mo, alhab'- Caung:pa" Yham re ngaui bau: ngaui lho" qhaug' byid' ako".

¹⁷Caung:pa" Yham vao poe mae qhaug' byid: nae" qhid' mae"- nung: jaung lo: 100 dau:- yao 200 dau:- yao nau" 400 dau: re xeim: ngaui" byid: mung: cad' be, 12 dau: re wa- Israel byumyu" dakaung: qhid' mae" dadau: dau: khyo" qobo khyad' xeim: ngaui" byid' ako".

¹⁸Moshe nho: mugsug' mae bo: ra" mho" shid' tarha" we' dakhyo: Yerusalem mae" Caung:pa" Yham mae caung da" byid: nae" qhid' mae" khinjaung qe we' Levi byu qere khyin: san: to" ako".

¹⁹Pyaung" nha: to" rumae" dam: phao: lo mo, wa- ai:thao: zin- zin sag' khye' daxe: byid ba: ba re lai co' poe kad' ako".

²⁰Khinjaung alhab' we' Levi byu alhab' mo, wa yao: bam yao" gaung re kyang" san: pye' mung: yao: bam wa lalam lakhug thung" khyo" kyang" san: pye' ako". Levi qe wa- Dam: tug' phao: lo mo, alhab' qhid' mae" khinjaung qe: qhid' mae" we' yao: bam yao" qhid' mae" lai co' poe mae ci nae" gug'nyhug' jham re se' ako".

²¹Pyaung" nha: to" rumae" dam: phao: lo mo, alhab' we' ai: mug: mae na: ra" gaje: byu qenho: yui zho: khyo re to: mung: Israel nho: Mao"So ASANG re caung:pa" lo mo, alhab' wa- ai: ngaui" xeim: sho: jham re zo" ako".

²²Yao: bam wa- nhad' ba lam: lam: man" make' mug poe re kad' ako". Yao: bam wa ngaui bau: ngaui lho" we' byang" jo; ako". Pe"mung:ga"re- yao: bam re Asuri khosin" pho" yang myo,nho byid: nae" khyo: ASANG kad' ke' mung: Israel nho: Mao"So: Caung:pa" Yham dam: zhaug' nae" mau" zo" mae yao: bam re yao" yang bao" byid' ra".