Read Maru NEHEMIA 12 Bible Online

NEHEMIA 12 - Maru bible

NEHEMIA 12

¹O mae" japhin: wa- Shealtie nho: yauggai zo: Zerubabela we' khinjaung yin" Yoshu tao we' daga" pyaung" nha: to" rumae" dam: tug' phao: lo: ra" khinjaung qe we' Levi byu qenho: japhin: ngad: ra".

²Khinjaung qe- Seraia- Yeremia- Ezra- Amaria- Malug- Hatu- Shekania- Rehum- Meremod- Ido- Ginethoi- Abiya- Miyamin- Maadia- Bilga- Shemaia- Yoiarib- Yedaia- Salu- Amog- Hilkia we' Yedaia bam ngad: ako". Cebam wa- Yoshu pyad mae" yao: bam: khinjaung mao:nhaung: phaung gaung: qemae au: jhaung boe" mo, ngad: ako".

⁸Levi byu qe- O mae mang bo mo, wa jeju nghaui"caung" rumae qu" caung mo, ngad: ako". Yeshua- Binnui- Kadmie- Sherebia- Yuda we' Matania bam ngad: ako".

⁹O mae mang bo mo, wa- Phaug' tau" ra" Nghaui"caung: phung: boe" mo, ngad: ako". Bagbukia- Uno we' yao: shid' zo" nho: Levi byin cao: qe ngad: ako".

¹⁰Yoshu wa Yoiakim nho: yao: pho" Yoiakim wa Eliashib nho: yao: pho"- Eliashib wa- Yoiada nho: yao: pho"

¹¹Yoiada wa Yonathan nho: yao: pho"- Yonathan wa Yadua nho: yao: pho" ngad: ra".

¹²Yoiakim khinjaung yin" boe" au: re o mae mang bo: ra" Khinjaung qe wa khinjaung qe mae" au: jhaung qe ngad: ako". [Khinjaung] — Amyu" Kaung Meraia — Seraia Hanania — Yeremia Meshulam — Ezra Yehohanan — Amaria Yonathan — Malukhi Yoseb — Shebania Adna — Harim Helkai — Meraiod Zekharia — Ido Meshulam — Ginethon Zikhri — Abiya Piltai — Miniamin- Moadia Shamua — Bilga Yehonathan — Shemaia Matenai — Yoiarib Uzi — Yedaia Kalai — Salai Eber — Amog Hashabia — Hilkia Nethane — Yedaia

²²O mae mang bo: ra" khinjaung yin" qe daui: na ra" ayo, gu: mae" Levi byu yham khaung jham we' khinjaung qe: yham khaung jham: au: jhaung qenho: japhin: re tung" xam" to" ra"- khinjaung yin" Eliashib- Yoiada- Yonathan we' Yadua bam ngad: ako". Ce: tung"xam re- Persia mung" mae Dari khosin" boe" ra" au: tung" pin" ra".

²³Ngadqere:- Levi yham khaung jham mae" au: jhaung qe: japhin: re Asuya yung" tung" xam: jham mae- Eliashib nho: yao: myid: Yonathan pyad joe" sho' za: atung" xam" to" ako".

²⁴Levi byu qe wa- Hashabia- Sherebia- Yeshua- Binnui we' Kadmie bam: khyoshid' ra" khyo" cao" yang: mau" vin phung: kho' to" ako". Mao"So: byu ngad: ra" Davi kho:kham: yang byid' to" ra" khyo shid' ru we' dakhyo:- dalhang re shid' phung: khyo" yang: Mao"So re daphung: dalhang tha" lho tha" caung:khin" byid' na: ako".

²⁵O mae mang bo: ra" caung:khin" yham lhaug' mo, wa- kham: mo" jham: nhae Caung:pa" Yham: agyo: mae jo; ra" zai to: qe jham re lhaug' zaung" ra" mau" mae qo yu mung: kam" na: ako". Matania- Bagbukia- Obadia- Meshulam- Talmon we' Akub bam ngad: ako".

²⁶Ce: byu qe wa- Yehozadag nho: yao: myid:- Yeshua nho: yauggai zo: Yoiakim nho: apyad ayo,- Mung" eib zug: mo" Nehemia nho: apyad ayo, we'- Tarha jhao: ra" khinjaung Ezra nho: apyad ayo, mae na: lai: lo: ako".

²⁷Yerusalem vang re qhaug' byid' ra" au:- Levi byu qere- ai: qhaug' byid' ra" poe mae jeju caung:khin" ra" nghaui" caung: jham khyo" we'- jhe' cang" jham she tang: ci mung: qo" bobo nae" qhid' mae"- yao: bam na: ra" jo, qo khyi" khao: ngo" mae" jhui" vhao" yu: ako".

²⁸Nghaui"caung: ra" Levi yham khaung jham wa- yao: bam yao: te" na: bam: ra" Yerusalem avai: ayae khaung: mae" we' Netopha avai: ayae mae" vogaung: jham mae"-

²⁹Bedgidga- Geba we' Azmaved mae" zang" ham: lo: ako".

³⁰Khinjaung qe we' Levi byu qe wa- yao: bam yao" qhid' mae"- mung" byu qe: qhid' mae"- kham: mo" jham: qhid' mae" we' vomo" vang qhid' mae" caung:pa" tarha" khyo" kyang" san: ru kad' ako".

³¹Ngo wa- Yuda au: jhaung qere vang dao mae zhang" nha: to: mung: shid' phung: kho' yang: vomo" lhang" gam: yang: Mao"So re jeju caung: byid' rumae qu" nhao: to: va". Sao qhid' mae" phung: wa vang adao khyo" lo, yo shad' khyo Basad kham: mo" joe" sho' su" gam" lo" ako".

³²Hoshaia wa nghaui"caung: mo; thao mae su: mung:- ai: bam: thao mae Yuda au: jhaung agaung: dano" cao" ye" ako".

³³O mae bo: ra" khinjaung qe wa labo" jham re mad mung: yao: bam: thao mae Azaria- Ezra- Meshulam- Yuda- Benyamin- Shemaia we' Yeremia cao" su" ye" ako". Ai: thao mae Shemaia nho: yao: myid:- Yonathan nho: yauggai zo: Zekharia bam cao: ye" ako". (Yao" nho: phug' pho" bam mae bobo mo, wa Asab kaung mae- Matania- Mikhaia we' Zaku bam ngad: ako".)

³⁶Yao" nho: thao mae yao" kaung mae" gaje- Shemia- Azare- Milalai- Gilalai- Maai- Nethane- Yuda we' Hanani- bam bo mung: yao: bam alhab' mo, wa Mao"So: byu kho:kham Davi be; nghaui" ra" tang: jham vo; ako". Jham: dao: ba yaug Ezra wa ce: phung: re au: she mung: jhui" jin: ye" ra".

³⁷Yao: bam wa Qid baug: kham: mo" mae- Davi nho: vomo" khyo do, ra" zam thao mae su" do, mung:- Davi nho: kho:kham kho" re lai: to: co' ako". Aimung: vomo" nho: ba thug' shad' qid kham: mo" khyo dam: tug' lo" ako".

³⁸Jeju caung:khin" byid' ra" gaphung: wa vang cao" yang: lo, kaung: shad' khyo su" ye" lo" ako". Aimung: ngo wa byu agaung: dano" we' daga" cao" ye" lo" va". Ngonhaung" wa zhokoe gyebyu zaung mae" lu: ra" vang khyo su" ye" lo" mung:-

³⁹Ai: jo, qo mae" Ephrim kham: mo"- Yeshana kham: mo"- Ngo: kham: mo"- Hanane gyebyu zaung we' Dayo gyebyu zaung mae" Yao kham: mo" joe" sho' lai: ye" lo" va". Ngonhaung" wa Caung:pa" Yham khyo vao ye" ra" kham: mo" mae lo" su" thang va".

⁴⁰Aimung: Mao"So re jeju caung:khin" byid' ra" shid' phung" geim" Caung:pa" Yham jo, qo khyo joe" ye" lo" va". Ngo we' daga" bobo: ra" au: jhaung qe mae" je yang:-

⁴¹Nga" phung: mae o mae mang bo: ra" khinjaung qe labo" jham re mad mo, ngad ko" ra" Eliakim- Maaseia- Miniamin- Mikhaia- Elioenai- Zekharia we' Hanania bam bobo: ako".

⁴²Aimung: yao: bam: thao mae Maaseia- Shemaia- Eleaza- Uzi- Yehohanan- Malkhiya- Elam we' Ezra bam cao" ako". Yezrahia yang jhui" ra" nghaui"caung: mo, wa yao: bam: thoe myhao: thao" mae" hug' caung" ako".

⁴³Ai: ba mae- ngaui" xeim: myo: sho' qhaug' byid: mung:- mung" byu qe gyai ngaui bau" ako". Pe"mung:ga"re- Mao"So: yang yao: bam re gyai ngaui bau: nhao: ava". Myiqe: qe we' zoshao qe wa ai: poe mae boleim mung: yao: bam hug' yhai: ra" thoe re gyai va" mae" the' gyo" ra".

⁴⁴Ai: ayo, mae- yauggai qere- xebam dabam we' zin khao: ngo" sao qhid' mhang" ra" gaug zo we' shi: jham Caung:pa" Yham qhid' mae" jhaung qhu" ke' to" ra" qe, jham re qu" gun nae" san: to" ako". Cebam wa- Tarha" mae mho" to" ru we' dakhyo: khinjaung qe we' Levi byu qe: qhid' mae" jhaung qhu" re vomo" myo: sho' nho: avai: ayae mae jo; ra" yo jham mae" khyui: zhang nae" qo vin: ako". Yuda mung" byu qe alhab' mo, wa khinjaung qe we' Levi byu qenho: dao mae nhag' dag: ako".

⁴⁵Pe"mung:ga"re- yao: bam wa kyang" san: ra" lalam lakhug: mau" we' Mao"So: yang amyin" byid' to" ra" caung:pa" thung" li jham re cao" kad' ako". Caung:pa" Yham mae" be; nghaui" mo, we' Caung:pa" Yham gug: gam qere kho:kham Davi we' yao: zo: Sholamon byid' to: co' ra" thung" li we' dakhyo: yao: bam: mau" re zaui" ako".

⁴⁶Ganhae" gaco' kho:kham Davi we' be; nghaui" yaug Asab apyad ayo, mae" cegu:- be; nghaui' mo, wa Mao"So re caung:khin" byid' ra" nghaui" caung: we' jeju beim: so" ra" nghaui" caung: jham re jhui" caung" lo: ako".

⁴⁷Zerubabela nho: apyad ayo, mae re:- Nehemia nho: apyad ayo, mae re: Israel byumyu" alhab' mo, wa Caung:pa" Yham mae be; nghaui" mo, we' Caung:pa" Yham lhaug' mo; qhid' mae" ba khao: ngo" jhaung qhu" bao" thaug' byid' ako". Mung" byu qe wa- Levi byu qere gyang" lho" ra" xeim: byid: mung: Levi byu qe wa khinjaung qere byid: ang: ra" gae bam re byid' ako".