Read Maru NEHEMIA 13 Bible Online

NEHEMIA 13 - Maru bible

NEHEMIA 13

¹Mung" byu qere- thoe qi: khyo" Moshe nho: tarha" nghe' kyo" au:- yao: bam wa Amon byumyu" mae" ngad ngad- Moba byumyu" mae" ngad ngad khag' dayaug re: Mao"So: byumyu" phaung khyo maqo" vhao" yu nae" ga" ra" dau mae nghe' joe" lo" ako".

²Ceru wa- Israel byumyu" qe Egutu mae" phao: thug' lo: ra" khyo mae yao: bam re Amon we' Moba byumyu" qeyang zo:ve we' shaug' qid mabyid: mung: ngad: ra". Ai: atha" yao: bam wa- Israel byumyu" qere nhang: kheim: yeke' nhao nae" qhid' mae" Balam re ngaui byid' ako". Ngadqere:- ngonhaung" nho: Mao"So wa nhang: kheim: re shaman" dao: phaug' tha" pye' byid' ra".

³Ce: tarha" re nghe' kyo" rure Israel byumyu" qe the' gyo: gelao" yao: bam wa taung bug byu alhab' re ai: phaung gaung: mae" khe' thug' pye' ako".

⁴Caung:pa" Yham mae" zai to: qe, jham re qu" caung yaug khinjaung Eliashib wa- ayo, ga" go" zo: myao" sho' Tobia we' jho" ako".

⁵Yao: wa- Tobia re qhaug' byid' ra" gaug zo khaung: we' nae pyo: xau- Caung:pa" Yham mae ci: ra" zai jham- khinjaung qe: qhid' mae" ngaui" xeim: Levi byu qe Caung:pa" Yham mae- be; nghaui" mo, we' Caung:pa" Yham gug: gam re byid' to" ra" gaug zo khaung:- sabyi- qang: we' zhanlun xau xebam dabam jham re za: shaung: ke' to: nae" qe, aqi: re ci nae" akhang" byid' ra".

⁶Ceru: xo' boe" na: au:- ngo wa Yerusalem mae mana: ang- pe"mung:ga"re- Babelon mae Artazaze kho:kham boe" ru sam xe: shid' zin ein: zin mae ngo wa yao: jhao" lau lo" shid' nae" qhid mae" dam: tug' ye: va". Khomyhao" mamyao" re ngo wa yao: mae" akhang" dam: qo" yu: ci mung:-

⁷Yerusalem khyo dam: tug' lo: ra"- ai: mae- Eliashib yang Tobia re Caung:pa" Yham mae" qe, daqe , re ci yhung: nhao: to" ru lothe' myao mung: din: mug' pye' ra".

⁸Ngo nhag' jam: yo: mung: Tobia nho: jo,nho" alhab' re taung gaung khyo shalhaui" pye' byid: va".

⁹Ngo wa- ai: qe, jham re caung:pa" tarha" khyo" kyang" san: pye' nae" amyin" byid: mung:- Caung:pa" Yham mae" ci zai jham- gaug zo xeim: jham we' nae pyo: xau jham re dam: ke' to: nhao va".

¹⁰Caung:pa" Yham mae" be; nghaui" mo; we' gatau: Levi byu qe wa mung" byu qeyang yao: bam re qo" zo" na nae" nho" mabyid: geyang: yao: bam yao" yo khyo dam: tug' phao: lo" byaug: rure lomyao: ra".

¹¹Ngo wa- zug: ade, qere Caung:pa" Yham re airu: qu" lhaui" to: gali" ein: qeim va". Aimung: ngo wa- Levi byu qe we' be; nghaui" mo, re Caung:pa" Yham khyo dam: jhui" yu mung: yao: bam re mau" dam: byid: va".

¹²Ailao" Israel byumyu" alhab' mo, wa- Caung:pa" Yham zai to: qe, jham khyo yao: bam: gaug zo sabyi qang: we' zhanlun xau xebam dabam re cili" ako".

¹³Ngo wa o mae mang bo mo, re zai to: qe, jham qu" caung nae" qhid' mae" san: to: va". Khinjaung Shelemia- tarha" jhao yaug Zadog we' Levi byu Pedaia bam ngad: ako". Matania nho: yao: myid:- Zaku nho: yauggai zo: Hanan wa yao: bam: bao" thaug' yaug ngad: ra". Cebam wa yao: bam: mau" zaui: cao: qere zokho gae byid: nae" qhid' mae" lam ga" mo, ngad: ein: ngo: ba: ra".

¹⁴Nga" Mao"So we"- ni" Caung:pa" Yham we' ai: caung:pa" mau" qhid' mae" ngo cegu: alhab' re kad' lai: lo: rure myid: beim: byid: la,-

¹⁵Ai: ayo, re- Yuda mung" mae" mung" byu qe wa Dugno: Ba mae sabyi shi: jham mae" aqang: pyag' na ko" rure ngo the' myao:- gaje damyo" wa- yao: bam: loze jham: dao mae gaug zo- sabyi qang:- sabyi shi: jham- pho' ham" shi: jham we' gaja: jham re qo seim" mung: Yerusalem khyo ye" lo" ko" ra". Ngo wa yao: bam re Dugno: Ba mae pe" re: maaung: zo: nae" qhid' mae" yao: bam re ngo ta" peim: va".

¹⁶Ture vogaung: mae" byu damyo" wa Yerusalem mae na: bam gemung:- yao: bam wa ngo: we' gatau: aung: xan: aja: ja: re Dugno: Ba mae ngonhaung" byumyu" qejhao" aung: byid: nae" qhid' mae" vomo" khyo tai: li" ako".

¹⁷Ngo wa Yuda au: jhaung qere qeim mung: ceru: ta" va". Naonhaung" kad' na: ra" makhyang: mashab: mau" re qu" qu" shi: ge,- naonhaung" wa- Dugno: Ba re magyang" malho" kad' na: ako".

¹⁸Mao"So: yang ce: vomo" re phyo' qheim" pye' mung: naonhaung" nho: phug' pho" qere qobo dae byid' ru wa ce: mathao: yang: yao: ngad va". Ngad sho' ngadqere:- naonhaung" wa Dugno: Ba re phoe sho' kad' mung: Israel byumyu" qe: dao mae Mao"So: nhag' yo" ru je: gyo" zao" nhao nae" khyo" jhin: yang: kad' na: ako"- ein: ta" peim: va".

¹⁹Aimung: ngo wa- Dugno: Ba joe" lo khao: ngo" myi" thao ba vao we' vomo" kham: jham re pyid' pye' mung: Dugno: Ba lai sho' madam: phung" genae" qhid' mae" amyin" byid' to: va".

²⁰Dugno: Ba mae vomo" khug khyo pe" daja: re: matai: vhao" ru dang madang ba nae" qhid' mae" nga" byu damyo" re ai: kham: mo" jham mae lhaug' nhao: to: va". Aung: xan: aja: ja: aung: zo" ra" phaga: byu qe wa laban ngo" myi: myi mae vomo" vang taung gaung shad' mae li" yab: ako". Yao: bam wa airu: dalhang shid' lhang kad' ako".

²¹Ngo wa yao: bam re- aimae mug: bo" sho' lao" qere: pe" akyu" mabo genae" lhe"- naonhaung" ceru: dam: kad' ko" re ngo wa naonhaung" re se' da: be, khyad' kad' nae"- ein: ta" peim: va". Ai: ayo, mae" wa Dugno: Ba re yao: bam madam: li" lo:ngad: ako".

²²Ngo wa- Levi byu qere yao: yaug yao" gaung re kyang" san mung: Dugno: Ba re gyang" lho" nhao nae" qhid' mae" ai: kham: mo" jham mae ye: lhaug' nhao: to: va". O" Mao"So we" ceru" rure re: myid beim: mung: xam" to: byid: la,- aimung: ni" nho: qi" qhang: ra" jhid'de; myid: mathao mae ngore nhag' khyag' yu la,-

²³Ai: ayo, mae- Yuda yauggai myo: sho' yaug wa Ashdod- Amon we' Moba mae" myiqe: qere lo, xo' yu: to: gau ngad vako" rure ngo myao va".

²⁴Yao: bam: zoshao qe agaung: dano" mo, wa Ashdod myan" la, mangad: lao" daja: ja" myan" jhau mung: ngonhaung" yao" myan" maba: jhau ngad: ako".

²⁵Ai: yauggai qere ngo qeim mung: yao: bam: dao mae nhang: kheim: ke' ru we' yao: bam re be, mung: yao: bam: xae jham re lao" phan" pye' byid: va". Ai: thao ngo wa- yao: bam we' yao: bam: zoshao qe khonhae" re: taung bug: byumyu" qe we' myibyid: myiyu makad' lo: nae" ga" ra" jham tang: dao: re Mao"So: mang lao: yang: to: nhao va".

²⁶Ngo wa- kho:kham Sholamon re qobo shad' nhao: ru wa taung bug myiqe: qe ngad: ako". Yao: wa gatau: byumyu" nho: kho:kham alhab' tho' je: qi" qhang: ra" byu dayaug ngad: lai: lo va". Mao"So wa yao: re jhid'de; mung: yao: re Israel byumyu" qe alhab' dao mae kho:kham boe" nhao sho' ngadqere:- yao: wa ce: qobo khug khyo gyo" vao lo" va".

²⁷Aire ngonhaung" wa- naonhaung" aso: re lag qu" yu mung: taung bug: myiqe: qere lo, xo' ra" khyo" Mao"So re maphug' cao" gai: kad' nae" i? ein: ta" va".

²⁸Yoiada wa Khinjaung Yin" Eliashib nho: yauggai zo: ngad: ra". Ngadqere: Yoiada nho: yauggai zo: qemae" dayaug wa Bethoron vogaung: mae" Sanbalad nho: myiqe: zo: re lo, xo' yu: ra". Aimung: ngo wa Yoiada re Yerusalem mae" khe' thug' pye' va".

²⁹O" Mao"So we"- ai: byumyu" wa khinjaung: aya: rere:- nao: yang khinjaung qe we' Levi byu qere byid' to" ra" dao: thang" rere:- khoqhi" phoe nhao: ako" i?

³⁰Ngo wa mung" byu qere taung bug we' sin" ru alhab' mae" kyang" shao: pye' byid: mung:- khinjaung qe we' Levi byu qe yaug khao: ngo" yao: yao: vin vo, ang: ra" qo re ba genae" qhid' mae" cao" ye: ca" ra" tarha" re nyhang" to: byid: va".

³¹Yao" ayo, we' ayo, mae cili" ca" ra" ngaui" xeim: jham re phad' ngaui" nae" qhid' mae" thao: we' mung" byu qe: xeim: gaug zo ameim" we' shi: ameim" jham cili" nae" tarha" jham re nyhang" jaung byid: va". O" Mao"So we"- ceru alhab' re myid: beim: mung: ai: qhid' mae" ngore jeju byid: la,.