Read Maru NEHEMIA 2 Bible Online

NEHEMIA 2 - Maru bible

NEHEMIA 2

¹Ai: thao lho" byid khye' kyo thao re daba: ba mae Artazaze khosin" pho" vae: zo" na: au: re- ngo wa yao: jhao" sabyi qang: ciye: byid'. Yao: wa qhid' phyao: ngo myo,nho sham: rure khonhae" re: mamyao: qu" mung:-

²Yao: wa- nao pe"mung: aiqhi" myo, nho sham: i? Nao wa no: ru wa mangad: nae"- aimung: nao myid mapyo" ru angad aja,- ga: ta" ra". Ngo gyai din: pye' va".

³Aimung: ceru: tau: va"- ASANG kho:kham apyad ato mae kao qhang: na vashao: wo"- nga" phug' pho" qere nyhab' to" ra" vomo" wa byo; qeim bam mae nhai" bam" nab: jo, mung:- ai: vomo" kham: jham re myi" yang ngha" jheim" pye' ru qhug' au: ngo wa khoru: mung: myo,nho masham khai: ba: mung nae" i? ein: tau: va".

⁴Khosin" pho" wa- nao o: ru pe" ngad: i? ga: myid' ra". Ngo wa mug:gaung mae" Mao"So jhao" akyu" mho' mung:-

⁵Khosin" pho" re ceru: ein: ta" va"- ASANG kho:kham pho" nao ngore ngaui: rumung: ngo mho' rure byid: nug: ngad: re- nga" phug' pho" qere nyhab' to" ra" Yuda mung" khyo ngore lo" nhao mung: ai: vomo" re dam: te: nhao la,- ein: ta" ra".

⁶Kho sin" pho" wa kho:kham myhi" we' daga" zaung: jo, mung: ngo mho' rure akhang" byid' ra". Yao: wa ngore khomyhao" myao" sho' lo" na: byaug mung:- khonhae" dam: tug' lo nae" ru myid' ra". Aimung: ngo wa yao: re ta" kyo: va".

⁷Ai: thao ngo wa- Uphrad ba vao shad' mang: mae" mung" eib zug: qere Yuda mung" khyo ngo gyaung: qo" su" lai: lo" nhao nae" qhid' mae" ta" shid' ra" mugsug' byid: la, ein: yao: re mho' ra".

⁸Ngo wa- Caung:pa" Yham lhaug' mo, na nae" gye Zaung" kham: mo" jham kad' nae" qhid' mae" we'- vomo" vang jham: qhid' mae"- aimung: ngo na nae" yham qhid' mae" sag' vo: bao" thaug' byid: nae" akhang" re kho:kham nho: sag' mo" yo lhaug' ra" Asab mae" qo" yu nae" mugsug' dakhye' re mho' yu va". Mao"So wa ngo we' daga" ngad mung: khosin" pho" wa ngo mho' ru alhab' ngore byid' ra".

⁹Khosin" pho" wa gye zug: damyo" we' myao: jui: gyezo: daphung: re ngo we' daga" nhao: ke' byid' ra". Airumung: ngo wa Uphrad ba vao shad' khyo gyaung: su" to" lo" va". Ai mae ngo wa mang: zug: qere khosin" pho" nho: mugsug' byid: va".

¹⁰Ngadqere:- Bed Horon mae" Sabalad we' Amon mang: mae" zug: ade, Tobia wa- Israel byumyu" qe: qhid' mae" gai kad' nae" byu dayaug joe" li" rure the' gyo: gelao"- xo sho' nhag' lam: gyo" laung: ako".

¹¹Ngo wa- Yerusalem khyo xo' ye: mung: sam ba lam: lam:

¹²Yerusalem qhid' mae" ngore Mao"So: yang pe" kad' nhao yang nhag' lam: mae nhug' to" ke' byid' rure khag' rere: ngo mata" shid'- ai:thao gae gaung: myi: mae ngo to" mung: nga" byin cao: dajhid' za: jhui: yang: thug' ye" lo" va". Ngonhaung" ciye" ra" gug'nyhug' wa ngo zaung: ra" loze za: angad:-

¹³Ba vao shad' lao: khaung: kham: mo" khyo" ngo vomo" mae" phao: thug' lo" mung: mug: thao shad' maojaung: qid thug' khyo" basad kham: mo" khyo ye" lo" ra" au: myi" ayo, angad: jo, ashi". Ngo ye" lo" zo" re" byo; qeim: jo; ra" vomo" vang jham we' myi" yang ngha" phyo' qheim" to" ra" kham: mo" jham re ca: qu" co' va".

¹⁴Ai: thao vomo" nho: ba thug' shad' khyo" mug: am: shad' qid thug' kham: mo" we' kho:kham nho: qid tham: khyo ye joe" co' va". Ngo zaung: ra" loze wa byo; qeim: jo; ra" laug basad bam khyo" su" lai: lo" khyo maqhug' myao yang:-

¹⁵Ngo wa Kidron lao: khaung: khyo gyo" ye: mung: myao: jui: yang: ye" lo" zo" mae" vang jham re qu" co' va". Ai: thao ngo ye" lo" ra" khyo khyo" dam: tug' lo mung: lao: khaung: kham: mo" khyo" vomo" khug khyo dam: phao: lo va".

¹⁶Ngo khai: khyo joe" ye: co' rure: ngo pe" kad' na: rure re:- ai: mung" mae" zug: ade, khag' dayaug: yang re: maba ngad: ako". Ana" joe" sho'- nga" Yuda byumyu" yao: cao:- khinjaung qe au: jhaung qe- zug: ade, qe- ai mau" mae bozaui: nae" gaje khag' re ngadqere: ngoyang pe" mata" kyo: shi:-

¹⁷Ngadqere: ana" kam" wa- ngoyang yao: bam re ceru: ta" va". Yerusalem byo; qeim: jo, mung: ai: nho: vomo" kham: jham wa phyo' qheim" pye' ru qhug' ruyang ngonhaung" khoru" qug: khai: mae leim zo" na: rure myao ge,- ein: ta" va". Ngonhaung" wa- vogaung: vang re dam: zao mung: ngonhaung" nga: yeim qho' phau" rure thao" lo" nhao gelang: ein ta" va".

¹⁸Aimung: Mao"So ngo we' daga" na: jo, mung: yao" yang ngore khoru: bao" lai: lo: ru we' khosin" pho" yang ngore pe" ta" to" rure ngo yao: bam re ta" kyo: va". Yao: bam wa- ngonhaung" dam: zhaug' qhid gelang: se,- ga: ta" ako". Aimung: yao: bam wa mau" zaui" qhid nae" seim" jin" ako".

¹⁹Ngonhaung" pe" kad' nae" byin phyo: seim" kyae: lo" na: rure Sanbalad- Tobia we' Geshem mang: ra" Arab bam the' gyo: gelao"- yao: bam wa ngonhaung" re qi: jung" pye' mung: ceru: ta" ako". Naonhaung" pe" kad' na: ein: jho ko" i? Naonhaung" wa khosin" pho" re tau: lhan: genae" ein: ko" i? ga: ta" ako".

²⁰Ngo wa- mug:gaung mae" Mao"So wa ngonhaung" re aung doe; ru byid' li" nae". Ngonhaung" wa yao" daui daui mo, ngad mung: zao: qhid: lo" naeva". Ngadqere:- naonhaung" wa Yerusalem mae" jo,nho" pe" dalam: we' re: mabo sin: ngad: ako". Aimung: naonhaung" wa- aimae" mhomyi: saung: seim maboqo" sang genae"- ein: tau: va".