Read Maru NEHEMIA 3 Bible Online

NEHEMIA 3 - Maru bible

NEHEMIA 3

¹Ce wa vomo" vang re dam: zao: ra" khyo ngad: ra" khinjaung yin" Eliashib we' yao" Khinjaung byin cao: qe wa yao kham: mo" re dam: zao mung: qhaug' byid' ru we' ai: kham: mo" re yao" jo, qo mae te' ako". Yao: bam wa gyebyu zaung dayo we' Hanane gyebyu zaung joe" sho' vang re qhaug' byid' ako".

²Yerikho mae" byu qe wa ai we' xo' ra" dau re dam: zao: ako". Imri nho: yauggai zo: Zaku wa ai: thao mae" xo' ra" dau re zao: ra".

³Hasena kaung boe: wa ngo: kham: mo" re zao: ako". Yao: bam wa sag' qhang jham we' kham: mo" jham re yao: yao" jo, qo mae te' to: mung:- kham: mo" re kyao" jhid' nae" qhid' mae" kham: kyao" we' sag' khyaung: jham re te' to" ako".

⁴Hakoza nho: yao: myid:- Uria nho: yauggai zo: Meremod wa ai: thao mae" xo' ra" dau re zao: ra". Meshezabe nho: yao: myid: Berekhia nho: yauggai zo: Meshulam wa ai:thao mae" dau re xo' zao: ra". Baana nho: yauggai zo: Zadog wa ai: thao mae" xo' ra" dau re zao: ra".

⁵Tekoa mae" byu qe wa- ai:thao mae" xo' ra" dau re zao: ako". Ngadqere: ai: vogaung: mae" au: jhaung kad' mo, wa mau" pyo mo; yang yao: bam re kho' gae byid' ra" qam: jam: ke' mau" re makad'- ga: ngag: ha: ako".

⁶Pasea nho: yauggai zo: Yoiada we' Besodeia nho: yauggai zo: Meshulam wa Yeshana kham: mo" re zao: ako". Yao: shid' zo: wa sag' qhang jham we' kham: mo" jham re yao: yao" jo, qo mae te' to: mung: kham: mo" re kyao" to: nae" qhid' mae" kham: kyao" jham we' sag' khyaung: jham re- te' to" ako".

⁷Gibeon mae" Melatia- Meronod mae" Yadan- Gibeon we' Mizpa mae" byu qe wa Uphrad ba vao shad' mung" eib zug: na yham joe" sho' xo' jo; ra" dau re zao: ako".

⁸Harhaia nho: yauggai zo: Uzie- mang ra" qhang be, mau" zaui: yaug wa ai:thao mae" xo' ra" dau re zao: ra". Nae pyo: xau lhag' yaug Hanania wa Vang Lu mae joe" sho' xo' joe" lo" ra" dau re zao: ra".

⁹Hura nho: yauggai zo: Rephaia ga: mang: ra" Yerusalem vomang: agaung: kho' eib yaug wa ai:thao mae" xo' ra" dau re zao: ra".

¹⁰Harumab nho: yauggai zo: Yedaia wa yao" yham nhae mae" xo' ra" dau re zao: ra". Hashabneia nho: yauggai zo: Hatu wa ai:thao mae" xo' ra" dau re zao: ra".

¹¹Harim nho: yauggai zo: Malkhiya we' Pahad- Moba nho: yauggai zo: Hashub wa- ai:thao mae" xo' ra" dau we' Zhokoe jham: nho: Gyebyu zaung re zao: ako".

¹²Halohe nho: yauggai zo: Shalum mang: ra" Yerusalem mang: gatau dakhyae: re eib yaug wa ai:thao mae" xo' ra" gu: re zao: ra". (Yao" nho: myiqe: zo: qe wa yao: re ai: mau" mae bobao" ako".)

¹³Hanun we' Zanoa vomo" mae" vobyu qe wa lao: khaung: kham: mo" re zao: ako". Yao: bam wa kham: mo" re yao" jo, qo mae te' to: mung: kham: mo" kyao" nae" kham: kyao" we' kang lam: jham re te' ako". Aimung: Basad kham: mo" joe" sho' dayo daung" va: sho' dam: zao: ako".

¹⁴Rekhab nho: yauggai: zo: Malkhiya ga: mang: ra" Bed Hakherem mang: mae" zug: pho" wa- Basad kham: mo" re dam: zao: ra". Yao: wa kham: mo" re yao" jo, qo mae te' to: mung: kham mo" kyao" jham we' kang lam: jham re te' to" ra".

¹⁵Kholhoze nho: yauggai zo: Shalum ga" ra" yaug Mizpa mang: mae" zug: pho" wa qid thug' kham: mo" re dam: zao: ra". Yao: wa kham: mo" re zao: mug: mung: kham: mo" re yao" jo, qo mae te' to" ra". Aimung: kham kyao" jham we' kang lam: jham te' ra". Yao: wa- Shela qid tham: mae- Davi nho: vogaung: mae" gyo" lo: ra" xam mhai" joe" sho' kho:kham khyae we' te' jo; ra" gu: re dam: zao: ra".

¹⁶Azbug nho: yauggai zo: Nehemia ga: mang: ra" Bedzu mang: agaung: kho' eib: ra" zug: pho" wa ai:thao mae" xo' ra" dau Davi lab- qid tham: we' gyetab zaung jham joe" sho' zao: ra".

¹⁷O mae mang bo: ra" Levi qe wa ai: thao mae" xo' ra" vang re zao: ako". Bani nho: yauggai zo: Rehum wa ai: thao mae" xo' ra" dau re zao: ra" Keila mang: agaung: kho' eib: ra" zug: pho" Hashabia wa yao" mung" dau: nho: gaung tha" khyo" ai:thao mae" xo' ra" dau re zao: ra".

¹⁸Henadad nho: yauggai zo: Bavai ga: mang: ra" Keila mung"dan: gatau agaung: kho' gu: re eib: ra" zug: pho" wa- ai:thao mae" xo' ra" dau re zao: ra".

¹⁹Yeshua nho: yauggai zo: Ezra ga: mang: ra" Mizpa re eib: ra" zug: pho" wa- gyezai to" ra" jao: qhid' kheim: dau vang lo" khyug' ra" mae" joe" sho' xo' ra" dau re zao: ra".

²⁰Zabbai nho: yauggai zo: Barug wa ai:thao mae" xo' ra" dau- Khinjaung Yin" Eliashib nho: yham vang" kham: joe" sho' zao: ra".

²¹Hakoza nho: yao: myid:- Uria nho: yauggai zo: Meremod wa- ai:thao mae" xo' ra" dau Eliashib nho: yham thao" sho' zao: ra".

²²O mae mang bo: ra" khinjaung qe wa- ai:thao mae" xo' ra" vang myo: sho' dau re dam: zao: ako". Yerusalem avai: ayae mae" khinjaung qe wa ai:thao mae" xo' ra" dau re zao: ako".

²³Benyamin we' Hashub wa yao: shid' zo" yham kheim: dau re zao: ako". Anania nho: yao: myid:- Maseia nho: yauggai zo: Azaria wa- yao" yham kheim: mae ang: ra" xo' ra" dau re zao: ra".

²⁴Henada nho: yauggai zo: Binnui wa- Azaria nho: yham mae" vang jheim joe" sho' xo' ra" dau re zao: ra".

²⁵Uzai nho: yauggai zo: Pala wa vang jheim mae"- vogaung: lhaug' ra" gyezo: qe: jo, qo nhae mae" kho:kham kho" tho' mae" gyebyu zaung joe" sho' xo' ra" dau re zao: ako". Paro nho: yauggai zo: Pedaia wa qid kham: mo" nhae mae" ba thug' shad' athao joe" sho'- Caung:pa" Yham lhaug' zaung" mo; zaung gu: re zao: ako". (Ce: jo, qo wa Caung:pa" Yham kad' mo, na: ra" jo, qo- vomo" mae" Ophela ga: mang: ra" dau ngad: ra".)

²⁷Tekoa mae" mo, wa shid' lhang ein: lhang- ai:thao mae" xo' ra" dau- Caung:pa" Yham lhaug' mo, na: ra" gyebyu zaung mae" Ophela joe" sho' dam: li" zao: ako".

²⁸Khinjaung daphung: wa- ai:thao mae" xo' ra" gu:- Myao: kham: mo" mae" mug: am: shad' khyo yao: yaug yao" yham kheim: ang ang mae zao: ako".

²⁹Imma nho: yauggai zo: Zadog wa ai:thao mae" xo' ra" dau- yao" yham kheim: ang ang mae zao: ra". Shekhania nho: yauggai zo: Shemaia wa- ba thug' kham: re zaung" yaug ngad mung: thao mae" dau re xo' kad' ra".

³⁰Shelemia nho: yauggai zo: Hanania we' Zalab nho: khyaug' yaug ein nae" yauggai zo: Hanun wa- shid' lam: ein: lam: thao: dau re xo' zao: ako". Berekhia nho: yauggai zo: Meshulam wa- ai:thao mae" xo' ra" dau- yao" yham kheim: ang ang mae zao: ra".

³¹Qhang be, mau" zaui: yaug Malkhiya wa- ai:thao mae" xo' ra" dau- mug: am: ba thug' shad' vang khyae jheim- mug: tho' mae jo; ra" qe, nhae Caung:pa" Yham khyo ye" ra" Mibkhad kham: mo" nhae mae jo; ra" phaga: pho" qe we' Caung:pa" Yham mau" zaui: mo, na: ra" jo, qo joe" sho' zao: ra".

³²Qhang be, lo, mau" zaui: mo, we' phaga: zai aung: mo, wa- lo" thao" ra" dau ngad: ra" vang jheim- qe, khyi" mae" yao kham: mo" dung: joe" sho' zao: ako".