Read Maru NEHEMIA 6 Bible Online

NEHEMIA 6 - Maru bible

NEHEMIA 6

¹Ngonhaung" wa- kham: mo" jham mae kham: jham maqo" te' to: shi: ngadqere:- vang re dam: bin: zao mung:- mabang: ru majo, lo: ga" rure- Sanbalad- Tobia- Geshem we' dang: ra" ngonhaung" nho: gyevo qe the' gyo" lo" ako".

²Aimung: Sanbalad we' Geshem wa Ono pa: din" mae jo; ra" vogaung: dalam: lam: mae ngo we' jho" qhug' gelang: ga: pha,jhi" byid: zo" re" ngore dao: pyang: ke' ako". Ceru wa yao: shid' zo: khyo" ngore dae te' nae" qhid' mae" pha,jhi" mha" khyug' ru ngad: ra".

³Ngo wa yao: shid' zo: jhao" lagyo: qere nhao: ke' mung: ceru: ta" nhao: ke' va". Ngo wa akhyag: mau" zaui" na: rumung: ai: khyo ngo maqo" gyo" ye:- ni" shid' zo: re li" qhug' nae" qhid' mae" za" yang mau" re maqo" thang: to: nhao nae"- ein: pyang: ke' va".

⁴Yao: shid' zo: wa pyang dao: daru: za: ngojhao" byid lhang pyang: ke' ako". Ngo re: lhang khao: ngo" daru: za: yao: shid' zo: re dao: dam: tug' pyang: ke' va".

⁵Ailao" Sanbalad wa yao" daui daui byu qe mae" dayaug re- ngo" lhang ein nae" lau dao: we' daga" nhao: ke' byid' ava". Ce: lau dao: wa dazid mathaung" ra" mugsug' khyo" pyang: vhin: ke' ru ngad: ra".

⁶Aiwa ceru: de; ra". Nao we' Yuda byumyu" qe wa tau: lhan: nae" yaung mung: vang re dam: zao: na: ako" ga" ra" lau dao: lae" wa avai: ayae yham kyo: byumyu" qenho: phaung gaung: mae lau dao: yang" thug' na: ra" ga: Geshem ngore ta" kyo" ra". Nao wa naoyao" gaung re kho:kham kad' yu nae" ga: re: yao: ta" ra".

⁷Aimung: nao wa Yerusalem mae Yuda kho:kham ngad: ga: ceim" ta" hau: nae" lapa damyo" re jaung: to" ra"- ga: ta" ra". ASANG kho:kham wa ceru re the' gyo" lo" nae" za: ngad: ra". Aimung: nao we' ngo ce: boe" na: rure ta" qham nae" qhid' mae" pha,jhi" byid: nug: ra" ga" ru ngad: ra".

⁸Ngo wa yao: jhao" ceru: ein: mugsug' dakhye' tung" pyang: ke' va". Nao ta" na: ru daja: re: madang- aigu: alhab' re nao yao: yao: myid: thug' yang: ta" ru ngad: ra"- ein: tung" ke' va".

⁹Yao: bam wa ngonhaung" re mau" tam" pye' nae" qhid' mae" kyaug' tin" khyo qho: ako". Ngo wa- Mao"So we"- ana" ngore qam: bo nhao la, ein: akyu" mho' ra".

¹⁰Ce: ayo, mae ngo wa yao" yham mae" maqo" thug' su" qin" ra" yaug- Mehetabe nho: yao: myid:- Delaia nho: yauggai zo: Shamaia jhao" lae" ye: va".

¹¹Ngo wa phaug' tau: mung:- ngo wa airu: phao: vho' qin" nae" byu mangad:- Caung:pa" Yham mae yevho' na: ra" khyo" yang ngo yao" kao so' re khyad' yu nae" seim" na: ra" ein: nao jho: i? Ngo wa airu: makad' nae" ein: ta" va".

¹²Aire ngo myid: ca: qu" ke' re- Mao"So: yang Shemaia re dao: jhau ru mangad:- Tobia we' Sanbalad yang khug vag: ngaui byid: mung: ngore ceru: ta" peim: nhao: ru ngad: ein: the' myid: beim" ra".

¹³Nga" mang qeim mung: ngo nga: yeim vashao: ga: ngore qobo kad' sho' kyaug' nhin" nae" qhid' mae" yao: re yao: shid' zo" yang ngaui byid: mung: lhaung: to" ru ngad: ra".

¹⁴Ngo wa ceru: akyu" mho' va". Mao"So we"- Tobia we' Sanbalad kad' rure myid: beim: mung: yao: shid' zo: re qobo dae byid: wa,- ai: myiqe: Noadia we' lapa gaje qe alhab' ngore kyaug' nhin" rure myid: beim: byid: la,- ein: mho' va".

¹⁵Ba na ngo" xe: shid' ba mau" zaui: thao re- Elu lho" khye' shid' xe: ngo" ba ein: ba vang dalam" geim" bin: zao: pye' va".

¹⁶Avai: ayae mae" mung"dan: khaung: mae" ngonhaung" nho: gyevo qe wa ceru re the' gyo: gelao"- ai: mau" re Mao"So bao" ruyang: bin: kad' pin" pye' rure yaug khao: ngo" ba geyang: yao: bam nga: yeim va" rure yao: bam myid: beim" ako".

¹⁷Ce: ayo, geim" mae- Yuda au: jhaung qe wa Tobia we' mugsug' jho" tung" byid' na: ako".

¹⁸Ara nho: yauggai zo: Shekania mang: ra" Yuda byu wa yao" yaug pho" ngad: ruyang- Yuda mung" mae" byu myo: sho' mo, wa- yao" shad' khyo bode; ako". Ai: tho' mago"- yao" yauggai zo: Yehohanan wa Berekhia nho: yauggai zo: Meshulam nho: myiqe: zo: re lo, xo' yu: ra".

¹⁹Amyu" byu qe wa- Tobia kad' ra" mau" gai jham: nho: khyo alhab' ngore ta" kyo: mung: ngo ta" ru ja: khao: ngo" rere: yao: re ta" shid' ako". Aimung: yao: wa- ngore kyaug' nhin" nae" qhid' mae" mugsug' jham xo' yang: ce vhin: na: ra".