Read Maru NEHEMIA 8 Bible Online

NEHEMIA 8 - Maru bible

NEHEMIA 8

¹Lho" nhad' khye' ein: khye' joe" re Israel byumyu" qe wa yao: yaug yao" vogaung: jham re qo" te" na: bam: avako". Ai: lho" khye' lho" xin: daba: ba: mae" yao: bam alhab' mo, wa Yerusalem Qid kham: mo" akhug shad' shava jao: mae zang" ham: na: bam: ako". Yao: bam wa- khinjaung ngad mung:- ASANG: yang Moshe khyo" Israel byumyu" qere byid' ra" tarha" jhao yaug Ezra re- Tarha" mugsug' paug' yu byid: nae" mho' ako".

²Aimung: Ezra wa- yauggai qe- myiqe: qe we' ba: gyo: naeqhi" qao" va" zoshao qe zang" ham: na: ra" jo, qo khyo ai: tarha" paug' re cili" byid' ra".

³Ai: kham: mo" nhae mae" shava jao: mae- ne, kao ne, seim mae" ba khaung tau sho' yao: bam re tarha" nghe' kyo" ra". Aimung: yao: bam alhab' mo, wa zhaug' za: tae" gyo" yu: ako".

⁴Ezra wa- ai: mau" qhid' mae" zhaug' to" ra" sag' ginbyae: dao mae ye; jo; ra". O mae mang bo: ra" yauggai qe wa yao" lo, yo shad' mae ye; jo; ako". Matithia- Shema- Anaia- Uria- Hilkia- we' Maaseia bam ngad: ako". Yao" nho: lo, kaung: shad' mae ye; jo; mo, wa- Pedaia- Mishae- Malkhiya- Hashum- Hashbadana- Zekharia we' Meshulam bam ngad: ako".

⁵Ai: jo, qo mae mung" byu qe: au: tho' ginbyae: dao mae Ezra ye; jo; ra" au: re- yao: bam alhab' mo; myo, jid' jham wa yao: re zhaug' qu" na: ako". Yao" yang ai: mugsug' paug' re phung" ke' we' daga"- yao: bam alhab' to" ye; li" ako".

⁶Ezra wa- qi" qhang: ra" Mao"So ASANG re caung:khin" ge,- ga: ta" ra". Mung" byu alhab' mo, wa yao: bam: lo, jham re mug: khyo tau: to' ke' mung: Amen- Amen ga: phaug' tau" ako". Yao: bam wa pad' thaug' thaug' mung: myid gaung khyo yao: bam: myo, khung: re goe; gyo" mung: caung:pa" ako".

⁷Ai: thao yao: bam to" li" mung: yao: yaug yao" jo, qo mae ye; jo; ako". Aimung: o mae bo: ra" Levi byu qe wa yao: bam re ai: tarha" sho' kyo" ako". Yeshua- Bani- Sherebia- Yamin- Agkub- Shabethai- Hodia- Maaseia- Kelita- Azaria- Yozabad- Hanan we' Pelaia bam ngad: ako".

⁸Yao: bam wa Mao"So: tarha" re nhad' khyo" myan" phaug' kyo: mung: mung" byu qere aire ba: gyo: sho' ta" sho' kyo" ako".

⁹Amyu" byu qe wa ai: Tarha" yang mho' rure the' gyo: gelao" nhag' lam: re gyo" zao" mung: gyi: ngug: li" ako". Aimung: mung" eib zug: mo" Ezra- khinjaung we' Tarha" ba jhao yaug Nehemia we' Tarha" re sho' kyo" ra" Levi byu qe wa mung" byu qere ceru: ta" shid' ako". Ce: ba na wa naonhaung" Mao"So ASANG: qhid' mae" gyang" lho" ra" ba na ngad: rumung: naonhaung" magai: kaug' magai: ngug genae".

¹⁰Ana" yham phao mung: zo: shaug' poe lo" poe ge, Mathae: zo: shaug' mo, re naonhaung" zo:ve we' sabyi qang: gae byid: ge,. Ana" ba wa ngonhaung" nho: ASANG: qhid' mae" gyang" lho" ra" ba na ngad:- aimung: dakaug' ge,. Naonhaung" re ASANG: yang byid' ra" ngaui bau: ngaui lho" khyo wa naonhaung" re qam: bo nhao: li" nae"- ga: ta" ako".

¹¹Levi byu qe wa mung" byu qere tae" jo, nhao mung: airu" ra" gyang" lho" ba na mae makaug' genae" qhid' mae" cao" ta" shid' ra".

¹²Aimung: mung" byu qe wa yham phao mung: ngaui bau: ngaui lho" zo: shaug' poe kad' mung:- yao: bam qo" rure gaje qe we' jho" gae zo: mung: na: ako". Pe"mung:ga"re- yao: bam wa yao: bam re nghe' kyo" rure ba: gyo" ako".

¹³Thao: ba- amyu" kaung qemae" au: jhaung qe wa khinjaung qe- Levi byu qe we' daga" tarha" mae mho" shid' to" gu: re mho" zhao: yu nae" qhid' mae" Ezra jhao" ye" ako".

¹⁴Yao: bam wa ASANG: yang Moshe khyo" byid' to" ra" Tarha" mae- Israel byumyu" qere zaung poe ayo, gu: mae dazab daso' mae" zaung jham mae na nae" qhid' mae" amyin" byid' to" rure qhug' myao: yu: ako".

¹⁵Aimung: yao: bam wa- Yerusalem we' gatau: vomo" jham we' vogaung: jham khyo o mae bo: ra" mho" shid' ru jham re tung" pyo: ke' ako". Bug gaung jham khyo thug' ye: mung: qhoje; gae jham- zhanlun gae jham- mai: thin" jham- the' gae jham we' gatau: sag' gae jham mae" sag' kaung jham re yu: yu mung:- Tarha" mae bo: ra" mho" shid' ru jham re cao" mung: zaung jham re kad' ge,- ga: ta" ako".

¹⁶Aimung: mung" byu qe wa sag' kaung jham re yu mung: yao: bam: yham khaung dao jham tho' mae- yao: bam: khyae vang" jham mae- Caung:pa" Yham vang" khug mae we' Qid kham: mo" we' Ephrim kham: mo" nhae mae" shava jao: jham mae zaung kad' ako".

¹⁷Taung" yu qhug' rumae" dam: tug' lo mo, alhab' wa- zaung jham kad' mung: laung" ako". Ceru wa- Nun nho: yauggai zo: Yoshu nho: pyad mae" ai: ayo, joe" sho' mae sao qhid' lhang dam: kad' ru ngad: ruyang yaug khao: ngo" wa nhag' lam: to" mung: ngaui bau" ako".

¹⁸Poe sao qhid' ba mae" lo" thao" ba joe" sho' Mao"So: Tarha" mae" dadau dau re ba khao: ngo" nghe' ako". Yao: bam wa nhad' ba poe kad' mung: she' ba ein: ba mae- Tarha" mae bo: ru we' dakhyo: poe pin" ru kad' ako".