Read Maru ESTHA 2 Bible Online

ESTHA 2 - Maru bible

ESTHA 2

¹Ai: thao kho:kham pho" nho: nhag' yo: gyo" byaug thao lhao" re: Vashti kad' lai: lo: ru we' yao: re khoru: amyin" khyo" to" rure myid: beim" na: ra".

²Aimung: kho:kham pho" we' te' te' na: ra" pha,jhi" byid: mo, damyo" wa ceru: ga: pha,jhi" byid' ako". Yao: bam wa yaung" ra" zomyi: gyang" damyo" re qho: re magai i?

³Nao khyo" yang mung" dau khao: ngo" mae" zug: ade, qere khyin: nha: to: mung: yaung" ra" zomyi: gyang" qe alhab' re ce: vogaung: mo" Susa mae" ni" myiqe: qe na: ra" kho:kham yham khyo jhui" li" nhao nae" amyin" gai: khyo" ke' ra". Ce: mau" zo" re ni" myiqe: qere qu" caung byid: yaug unug Hegai re zaui: nhao wa,- aimung: yao: bam re shaung nhao wa,.

⁴Ailao"- nao qu" ngaui: thao" ra" myiqe: nau" re khyin: yu mung: Vashti nho: jo, qo mae kho:kham myhi" kad' nhao wa,- ga: ta" ako". Kho:kham pho" wa ce: pha,jhi" byid: dao: re gai: ra" ga: myid mung: cao" kad' ra".

⁵Ai: Susa mae Yaira nho: yauggai zo: Modekhai ga: mang: ra" Yuda byu dayaug na: ra". Yao: wa Kisha we' Shimi nho: myid:zo: ngad: ra".

⁶Babelon kho:kham Nebugkhaneza wa Yuda kho:kham Yehoiakhin re kyam: byu damyo" we' daga" Yerusalem mae" pyaung" jhui" yu: au: re Modekhai re: yao: bam we' daga" bobo: lo: ra".

⁷Yao: mae Hebre mang khyo" Hadasa ga: mang: ra" yao: nhae: mo" abye" Estha qo" ra". Yao: wa yaung" ra" myiqe: nau" ngad mung:- byu dau: ga" qu" yaung" taung" ngad: ra". Yao: myhi" we' yao: pho" shid lao" Modekhai yang yao: re yao" myiqe: zo: toe' yu mung: yao" myiqe zo: we' dakhyo: khau: qhi" yu: ra".

⁸Kho:kham wa yao" lau dao: asag' re pyo: ke' thao myiqe: nau" myo: sho' yaug re Susa khyo jhui" li" ko" re Estha re: aibam: phaung mae bobo: ra". Yao: rere: kho:kham nho: myiqe: qere qu" caung byid' ra" Hegai nho: lo, mae kho:kham vang" khyo yenha: to" ra".

⁹Hegai wa Estha re ngaui mung: Estha wa yao" yang myo, nho byid' ru qhug' yu: ra". Yao: wa Estha re gaung deim:- gaung myhag' shaung byid nae" qhid' mae" we' gakai: lai zo: shaug' zho: nae" qhid' mae" ayo, mamyao" nhao lo: sho' hin hin seim" byid' ra". Yao: wa Estha re kho:kham myiqe: qe na: ra" jo, qo mae" gai: thao" ra" jo, qo byid: mung: yao: re caung da" byid: nae" qhid' mae" kho:kham kho" vang" mae na: ra" gakai: lai khyin: to" ra" myiqe: nau" nhad' zo: khyin: san: to: byid' ra".

¹⁰Ana" Modekhai pha,jhi" byid' to" ru we' dakhyo: Estha wa yao: Yuda myiqe: ngad: rure zug' to" ra".

¹¹Ba khao: ngo" Modekhai wa- Estha khoru: na: ru we' yao: mae pe" qhug' lo nae" rure ba sho' ga: kho:kham myiqe: qere nha: ra" vang" jao: kheim: khyo" ye: ye: lo lo su" qin" ra".

¹²Myiqe: qere shaung mung: qu" caung: ru dazin myao" ra". Lho" khyaug' khye' geim" mae mura xau ci mung: gaung myhag' byid' ra". Ai: thao gatau lho" khyaug' khye' xau gyad mung: gaung myhag' byid' ra". Ai: thao myiqe: nau" dayaug bin dayaug re kho:kham Ahasuru nho: qhid' kheim: khyo jhui" ye" ra".

¹³Myiqe: nau" wa kho:kham nho: myiqe: qe na: ra" yham mae" kho:kham kho" khyo ye" ra" au:- yao: yao: ve, nug: ra" mai bau: pe" ngadqere: gai: ve; ra".

¹⁴Yao: wa ai: khyo myi" thao zo" re ye: mung: thao: ba re gatau: myiqe: tab dalam: khyo jhui" lo" yang:- kho:kham nho: myingai qere qu" caung: ra" unug Shashga nho: lo, mae nha byid' ru qhug' ra". Yao: wa kho:kham pho" yang qu" ngaui yang: mang yao: lao" za: mangad: re- Kho:kham pho" jhao" madam: gai: ye: nae".

¹⁵Kho:kham pho" jhao" Estha ye: nae" ayo, joe" li" va". Estha wa Modekhai" nho: nhae: mo" bye" we' Abihai nho: myiqe: zo: ngad mung: Modekhai wa Estha re yao" myiqe: zo: khyo" mang mang" yu: ra". Estha re myao: ra" yaug khao: ngo" wa mug' sho' khin" ako". Estha nho: apyad joe" li" re- kho:kham myiqe: qere qu" caung: ra" Hegai pha,jhi" byid: mung: ve, nhao: rure za: ve; ra".

¹⁶Aimung: Ahasuru kho:kham boe" ra" nhad' zin ein: zin lho" dakhye' ein nae" Tebed lho" khye' mae- Estha re kho:kham Ahasuru nho: qhid' kheim: kho:kham kho" khyo jhui" ye" ako".

¹⁷Kho:kham pho" wa myiqe: nau" gaje qere tho' yao: re je: qu" ngaui mung: yao: wa kho:kham pho" yang myo,nho byid' ru we' jhid'de; rure gaje qe alhab' tho' re: je: qo" yu: ra". Kho:kham pho" wa yao" ba maug: re Estha nho: au: mae zhaung: byid: mung: yao: re Vashti nho: jo, qo mae kho:kham myhi" kad' nhao: ra".

¹⁸Ai: thao kho:kham pho" wa Estha re nga: yhe' ra" khyo" zo: shaug' poe qi: dalam: da" zho: mung: yao" mung" zug: qe we' zug: ade, qe alhab' re khai zho: khai jhaug' ra". Yao: wa kho sin" mung" geim" mae Dugno: Ba daba khyo" lau dao: pyo mung: kho:kham dayaug we' man: qi" ra" jhaung qhu" jham gae byid' ra".

¹⁹Ai: au: kho:kham pho" yang Modekhai re mung" eib mau" mae jaung: san: to" ra".

²⁰Estha kam" wa yao: Yuda byumyu" ngad: rure mata" thug' shi: ngad: ra". Khag' rere: mata" kyo: nae" qhid' mae" Modekhai yang yao: re ta" to: mung: yao: re ngai shi" au: yao" mho dao: gyo" ru we' dakhyo: ce: mau" mae yao: mho: khyo: cao" ra".

²¹Kho:kham kho" mae Modekhai mau" zaui" ra" ayo, mae- kho:kham pho" nho: qe, khyo vao ye" ra" kham: lhaug' ra" unug Bigthana we' Tere shid' zo: wa- Kho:kham Ahasuru re gye kad' li" mung: khug' se' pye' nae" lo, mau" kyae: ako".

²²Airu re Modekhai ba mung: Estha re ta" kyo" ra". Estha re: Modekhai ba va" rure kho:kham pho" no: rumae ta" kyo" ra".

²³Qho: myid' ca: qu" ko" re- ta" kyo" ra" lau dao: dang: ru the' myao mung: shid' zo" geim" re pyao: zang mae cui" lhao" se' pye' ako". Kho:kham pho" wa- ceru re kho: sin mung" mae" tung"xam mae tung" to: nae" qhid' mae" amyin" byid' ke' ra".