Read Maru ESTHA 7 Bible Online

ESTHA 7 - Maru bible

ESTHA 7

¹Aimung: kho:kham pho" we' Haman wa Estha we' daga" zo: shaug' nae" qhid' mae" shid' lhang ein: lhang dam: ye" lo" ako".

²Kho:kham pho" wa- sabyi qang: shaug' na: au: Estha re ceru: ga: dam: myid' ra". Kho:kham myhi" Estha we"- ana" nao pe" o: i? Ngo re ta" la,- nao aire qo" yu nae" khosin" mung"dan: agaung: daqi" re lhao" ngo nao re byid: nae"- ga: ta" ra".

³Kho:kham myhi" Estha wa- ngo mho' ra" khyo re byid: nae" qhid' mae" Asang kho:kham myid: ngaui: ngad: re wa- ngo o: ra" khyo wa ngore daui: na nhao mung: nga" byumyu" re: daui: na: bam vageshao:-

⁴Ngo wa nga" byumyu" qere se' tam" pye' nae" qhid' mae" aung: zo" pye' ru qhug' va". Jeim pyad khyo aung: zo" pye' ru tho' maje: xo ngad: re ngo sae za: tae" jo, mung: nao re cekhyo we' sin: yang: phabau li" pau" nae" mangad:- ngadqere: ngonhaung" wa se' tam" pye' qhug' nae" za: angad lo"- ga: tau" ra".

⁵Ailao" kho:kham Ahasuru wa kho:kham myhi" Estha re- airu" ra" mau" zo" re khag' vae" kad' ra". Ceru: kad' yaug wa khai: mae na: ra" i? ga: myid' ra".

⁶Estha wa- Ngonhaung" nho: gyevo- ngonhaung" re yhin" yaug wa- ce: makhyang" ra" byu Haman ngad: ra" lhe"- ga: tau" ra". Haman wa kho:kham pho" we' kho:kham myhi" re gyaug: din: ru we' zhaug' qu" na: ra".

⁷Kho:kham pho" wa nhag' jam: yo: mung: to" ye; ra"- ai: qe, mae" phao: thug' lo" mung: kho:kham vang" bin: khyae khyo thug' ye" lo" ra". Haman wa yao: re kho:kham pho" yang ce: mathao mae qobo dae byid: naeva" myao: ga: ba: qu" myao: pye' mung: kho:kham myhi" Estha nho: nhaung thao" mae na: jo, yang: yao" kao so' loe, nae" mho' na: ra".

⁸Yao: wa nhag' khyag' yu nae" ru mho' nae" qhid mae" Estha nho: yab jaung dao mae yao: yao" gaung re goe; gyo" lo" au: yao: kho:kham pho" wa bin: khyae jham khyo" dam: tug' lo: ra". Ceru re the' myao lao" kho:kham pho" wa- ceyaug wa nga" kho:kham kho" mae ngoyao" qhid' kheim: mae yao: kho:kham myhi" re deim" zag: yab nae" ga: nhaung i? ga: zag: hug' ke' ra". Kho:kham pho" airu: ga: ta" ke' we' unug jham wa Haman nho: au: lam: re nghoe' pye' byid' ako".

⁹Ai: thao yao: bam mae" Harbona ga: mang: ra" unug wa- Haman wa Asang kho:kham ni" kao so' re khyad' yu yaug ngad: ra" Modekhai re cui" se' pye' nae" qhid' mae" yao" yham nhae mae lhao" re: byuse' ginbyae: dalam: bin: zhaug' to" ava". Airu wa ngo" xe daung" myhao: ra"- ga: ta" ra". Kho:kham pho" wa- Haman re aimae cui" lao" se' pye' ge,- ga: amyin" byid' ke' ra".

¹⁰Aimung: Haman re yao" yang Modekhai qhid' mae" ga: zhaug' to" ra" byuse' ginbyae: mae cui" lao" se' pye' ako". Ai: thao re- Kho:kham pho" nhag' yo: gyo" byaug: ra".