Read Maru ESTHA 8 Bible Online

ESTHA 8 - Maru bible

ESTHA 8

¹Aiba mae yao: kho:kham Ahasuru wa Yuda byumyu" qenho: gyevo Haman nho: jo,nho" alhab' kho:kham myhi" Estha re byid' pye' ra". Estha wa Modekhai we' ba nam sang: cao: dau: ra" khyo kho:kham pho" re ta" kyo: mung: aiba mae" thao phyao: Modekhai re kho:kham pho" nho: qhid' kheim: khyo vao ye: nae" akhang" byid' ra".

²Kho:kham pho" wa (Haman mae" dam: yu pye' byid' ra" lo,pin:) yao" dazid de; ra" lo,pin re khyad' yu mung: Modekhai re byid' ra". Estha wa Haman nho: jo,nho" re qu" caung nae" qhid' mae" Modekhai re au: jhaung kad' nhao: ra".

³Ai: thao Estha wa yao: yao" gaung re kho:kham pho" nho: khyid qao: mae goe; gyo" mung: gyi: ngug yang: dam: jhau: ra". Yao: wa Yuda byumyu" qere magai: ru kad' nae" ga: Agag nho: myid:zo: Haman khug' nyan" to" ra" mau" re tam" pye' byid: nae" qhid' mae" kho:kham pho" re mho' ra".

⁴Kho:kham pho" wa yao" qhang zaung: bao" re Estha jhao" yheim" ke' re- Estha to" ye; li" mung:-

⁵Asang kho:kham nao myid: o mung: ngore akhyag to" ru we' nao khyo" yang gai: ein: myao: ngad: re- khosin" mung"dan: geim" mae" Yuda byumyu" re phyo' qheim" se' tam" pye' nae" qhid' mae" Agag myid:zo:- Hamedatha nho: yauggai zo: Haman amyin" khyo" to" rure maqo" kad' boe" sho' tam" pye' byid: la,-

⁶Nga" byumyu" qe: dao mae kyi" khyag' ru joe" mung: ngo yao" amyu" ba nam sang: cao: qe se' pye' qhug' ngad: re ngo khoru: tho' kham nae" i? ga: ta" ra".

⁷Ailao" kho:kham Ahasuru wa kho:kham myhi" Estha we' Yuda byu Modekhai re- qu" shige,- ngo wa Yuda qere gye kad' nae" khug' nyan" ra" Haman re cui" lao" se' pye' mung: yao" jo,nho" Estha re ngo byid' pye' ra".

⁸Ngadqere: kho:kham mang khyo" tung" pyo mung: kho:kham dazid thaung" pye' ra" amyin" lau dao: re magai: dam: tug' yu lo:- ngadqere: ni" shid' zo: khyo" yang Yuda byumyu" qere tung" byid: nug: ru pe" ngadqere: tung" ge,- aimung: ai: rure nga" mang khyo" tung" mung: kho:kham dazid thaung" te' ge,- ga: ta" ra".

⁹Ceru wa lho" sam khye' ein nae" Sivan lho" shid phyao: shid' xe: sam ba: ba boe" ru ngad: ra". Modekhai wa kho:kham nho: yung" mau" zaui" ra" mau" sang qere khai: yu mung: Yuda byumyu" qejhao" India mae" Ethiopia joe" sho' jo; ra" mung"dan: 127 lam: geim" mae" mung" eib zug: qe- mung" zug: ade, qejhao" tung" pyo: ke' nae" amyin" re nhad' khyo" ta" byid' ra". Ai: mugsug' jham re mung"dan: khao: ngo" mae" myan" we' tung" ce' yang tung" nhao mung: Yuda byumyu" qere wa yao: bam: myan" we' tung" ce' khyo" tung" byid: nhao: ra".

¹⁰Modekhai wa- ai: mugsug' jham re kho:kham Ahasuru nho: mang khyo" tung" nhao mung:- aijham re kho:kham dazid thaung" te' nhao: ra". Ai: mugsug' jham re- kho:kham myao: yham mae" qao: ra" myao: jham zaung mo; yang vin: pyo byid' ako".

¹¹Ce: mugsug' jham mae- vomo" khao: ngo" mae" Yuda byumyu" qe wa yao: yao" gaung re gug: gam yu: ra" khyo" gye tug' phaug' nae" qhid' mae" khai: zhang: ham ca" ga: kho:kham pho" yang akhang" byid' rure sho' kyo" to" ra". Mung"dan: dalam: lam: mae" shae lhae ci: ra" byu damyu" myu" yang Yuda byu we' yao: bam myiqe: zoshao qere- khe' zin" lo ko" ngad: re- Yuda byumyu" qeyang yao: bam re gye dam: tug' khe' se' geshao:- yao: bam re dayaug re: madang losho' se' tam" pye' mung: yao: bam: jo,nho" jham re qo" sham" yu pye' genae" ngad: ra".

¹²Ce: amyin" dao: re Persia khosin" mung"dan: geim" mae jao: sho'- Yuda byumyu" qere se' tam" pye' nae" qhid' mae" dang: to" ra" ba na- lho" daxe: shid' khye' ein nae" Ada lho" xin: daxe: sam ba: ba mae" jao dang ngad vashao:-

¹³Ai: amyin" dao: re tarha" khyo" to: mung: -ai: ba na joe" lao" Yuda byumyu" qeyang yao: bam: gyevo qere lage, phaug' nae" qhid' mae" jin" jin" qo" seim" to: genae" qhid' mae" mung" dau khao: ngo" mae" yaug khao: ngo" re ba nhao: to: ca" nae".

¹⁴Kho:kham pho" yang amyin" byid' ke' lao" myao: zaung mo, wa kho:kham myao: jham mae zaung mung: qao: thao" ra" khyo" zaung: thug' lo: ako". Vogaung: mo" Susa mae re: ai: amyin" tarha" re khyo" to" ako".

¹⁵Modekhai wa- Kho:kham bau: qhang ama" we' aphyu tung" ru ve,- khalhae: nyhug pin gai: yang khyab' ra" adao: bau: ve,- qhang ba maug: qhi qhi mung: ru zhaung: mung: kho:kham kho" mae" phao thug' lo" ra". Ailao" Susa vogaung: mo" nho: hau" mo" khyo mae ngaui bau: ngaui lho" hug' yao thoe byang" byaug: ra".

¹⁶Yuda byumyu" qe: qhid' mae" ngaui bau: ngaui lho" khyo we' so' ha" ke' ru qhug' mung: aung doe; ra" mathao mae ngaui bau" na: ako".

¹⁷Vomo" khao: ngo" we' mung"dan: khao: ngo" kho:kham pho" nho: amyin" hau: dao: nghe' kyo" ra" jo, qo khao: ngo" mae- Yuda byumyu" qe wa zo: shaug' poe kad' mung: ngaui bau" ra" Dugno: Ba yu: ako". Gaigai: yao: ga" re- gaja" byumyu" myo: sho' mo, re: ana" yao: bam re gyaug geyang:Yuda byu qe boe" lo: ako".