Read Maru ESTHA 9 Bible Online

ESTHA 9 - Maru bible

ESTHA 9

¹Amyin" lau: dao: jao dang boe" lo nae" ra" Ada lho" xin: daxe: sam ba: ba Yuda byumyu" qenho: gyevo qeyang yao: bam: re qo" zaui" pye' nae" ga: myid: lao" to" ra" ba na joe" li" va". Ngadqere: ai: atha" Yuda byu qeyang yao: bam re lam: aung: pye' ako".

²Khosin" mung"dan: khug mae" vomo" khao: ngo" Yuda byumyu" qe na: ra" vo khug mae Yuda byumyu" qe wa yao: bam re khe' zin" lo nae" mo, re gyelham: tug' khe' nae" qhid' mae" zang" ham: na: ako". Khyi" khao: ngo" mae" byu qe wa yao: bam re gyaug mung: khag' dayaug re: yao: bam re gye maqo" kad' ngad: ako".

³Gaigai: yao: ga" re- mung"dan: zug: ade, mung" eib zug: mo" alhab' we' kho:kham pho" nho: gaung tha" lagyo: alhab' mo, wa Modekhai re gyaug mung: Yuda byumyu" qere bobao" ako".

⁴Modekhai wa mung"dan: mae kheim: so' qi" ra" byu dayaug boe" na: jo,va" ru we' yao: wa je yang: je yang: kheim: so' qi" li" na: rure mung"dan: geim" khyi" khao: ngo" ceim" ba mung: mang qi" jo; va".

⁵Aimung: Yuda byumyu" qe wa yao: bam nug: khyo: yao: bam: gyevo qere qo" kad' ako". Yao: bam wa shae pyang: ci mung: ai bam re khe' se' tam" pye' ako".

⁶Susa vogaung: mo" mae yao: Yuda byumyu" qeyang yauggai ngo" yo yaug re se' pye' ako".

⁷Aibam: phaung mae- Yuda byumyu" qenho: gyevo- Hamedatha nho: yauggai zo: Haman nho: yauggai zo: daxe yaug ngad ko" ra"- Parshandatha- Dalphon- Aspatha- Poratha- Adalia- Aridatha- Parmashta- Arisai- Aridai we' Vaizatha bam boshid: ako". Ngadqere: lanyab jo,nho" malhad' yu ngad: ako".

¹¹Ai: ba na mae yao: Susa mae se' pye' ra" byu khonho" yaug ngad: ru kho:kham pho" re lau dao: kyo: byid' ako".

¹²Ailao" yao: wa kho:kham myhi" Estha re- Susa mae za: Yuda byumyu" qe wa Haman nho: yauggai zo: daxe yaug bobo: mung: byu ngo" yo re se' pye' avako". Mung" dau jham mae yao: bam pe" khoru: kad' vako" laug maba nao ana" pe" o: i? Nao qo" yu nae" za: ngad:- nao gatau pe" o shi" ru ngore ta" la,. Aire nao qo" yu nae"- ga: ta" ra".

¹³Estha wa- Asang kho:kham nao myid: ngaui: ngad: re- Susa mae" Yuda byumyu" qere ana" ba kad' nhao: ru we' dakhyo: ne, mo" ba re: dam: kad' nae" akhang" byid: wa,- aimung: Haman nho: yauggai zo: daxe yaug: maogaung jham re byuse' ginbyae: mae lao" jo, nhao wa,- ga: tau" ra".

¹⁴Kho:kham pho" wa ceru re kad' nae" amyin" khyo" byid' ra". Aimung: Susa mae ai: amyin" hau: dao: pyo: sin" ke' ra". Haman nho: yauggai zo: daxe yaug: maogaung jham re vobyu qenho: qhid' kheim: mae qhu" to" ra".

¹⁵Ada lho" xin: daxe: byid ba: ba mae Susa mae" Yuda byumyu" qe daga" dam: ham phaung mung: ai: vomo" khug' mae byu sam yo yaug re se' pye' ako". Ngadqere:- lanyab jo,nho" lhad' yu: ru majo, ngad: ra".

¹⁶Mung" dau jham mae" Yuda byumyu" qere: ham phaung mung:- yao: bam yao" gug: gam khyo gye vha: ru kad' ako". Yao: bam wa yao: bam re nghang" ra" byu nhad' tug: ngo" taung yaug re se' pye' mung: yao: bam: gyevo qe: lo, mae" loe, lo: ako". Ngadqere: -yao: bam wa- lanyab jo,nho" lhad' ru makad' ngad: ako".

¹⁷Ceru wa Ada lho" xin: daxe: sam ba: ba boe" ru ngad: ra". Thao: ba daxe: byid ba: ba wa- byu mase' lomung: ngaui bau: ngaui lho" zo: shaug' poe kad' ako".

¹⁸Ngadqere: Susa mae" Yuda byu qe wa daxe: sam ba: ba we' daxe: byid ba: ba mae zang" ham mung: daxe: ngo" ba: ba re thang yang:- zo: shaug' poe kad' ako".

¹⁹Ceru: mung: yang:- vogaung: ngai jham mae na: ra" Yuda byumyu" qe wa Ada lho" xin: daxe: byid: ba: ba re ngaui bau" ra" dugno: ba we' zo: shaug' ayo, khyo" kad' mung: yao: cao: yao: zo: shaug' jhaung qhu" jho" gae byid' ako".

²⁰Modekhai wa ce: boe" lo: ra" khyo jham re tung" xam" to: nhao mung: Persia mung" gam: sho' mae" mug: va: mug: lin mae na: ra" Yuda byumyu" qere mugsug' vhin: ke' nhao: ra".

²¹Yao: bam re zin khao: ngo" Ada lho" xin daxe: byid ba: ba we' daxe: ngo" ba: ba gu: mae Dugno: Ba khyo" phug' cao" nhao: ra".

²²Ce: ba shid' ba: gu: wa Yuda byumyu" qe- yao: bam: gyevo qe: lo, mae" khyad' loe; yu: ra" ba na ngad: ra"- ce: lho" khye' wa kaug' qhui: ru we' nhag' lam: thao" rumae" ngaui bau: ngaui lho" we' pyo: pyo: mung: ra" ba khyo phaug' lo ra" lho" khye' ngad: ra". Yao: bam wa ce: ba na: gu: mae zo: shaug' poe kad' mung:- yao: cao: yao: we' myaung mo, re zo: shaug' jhaung qhu" gae byid: ca"- ga: mho" shid' to" ra".

²³Aimung: Yuda byumyu" qe wa Modekhai mho" shid' to" ra" khyo re phug' cao" mung:- ai: poe wa zin khao: ngo" poe kad' ra" thung" li dalam: boe" lo: ra".

²⁴Yuda byumyu" qenho: gyevo- Agag nho: myid:zo:- Hamedatha nho: yauggai zo: Haman wa- Yuda byumyu" qere phyo' qheim" pye' nae" ba na khyin: au: re- (Yao: bam Purim ga: mhang" ra") Pha" ce' khyo" ra". Yao: wa yao: bam re jhad' za: se' tam" pye' nae" yaung: to" ra".

²⁵Ngadqere:- Estha wa kho:kham pho" jhao" ye: mung: kho:kham pho" khyo" amyin" tung" pyo nhao: ra" mathao mae- Haman wa yao" yang Yuda byumyu" qe: qhid' mae" nyhang" yaung: to" ra" au: pa lo,kyo' mae the' leim zo" ra". Yao: we' yao" yauggai zo: qe wa byuse' ginbyae mae cui" lao" se' pye' ru qhug' ako".

²⁶Aimung: ai: Dugno: Ba shid' ba re Purim ga: mhang" ako". Modekhai nho: mugsug' mathao mae we' yao: bam mae boe" lo: ra" mau" zo" alhab' mathao mae-

²⁷Yuda byumyu" qe wa- yao: bam yao" qhid' mae" yao: bam nho: myid:zo: qe: qhid' mae" we'- Yuda byumyu" boe" lo: ra" yaug khao: ngo" qhid' mae" zin khao: ngo" yao" ayo, joe" lo lao" ce: shid' ba re Modekhai nho: mho" shid' khyo re cao" yang: abang mabyid phug' cao" nae" thung" li dalam: kad' to" ako".

²⁸Mung" dau khao: ngo" we' vomo" khao: ngo" mae" Yuda yham khaung ug' khug' khao: ngo" we' cethao: ne, na: ye" lo" nae" myid:zo: qae" khao: ngo" wa- joe" lo nae" ayo, alhab' mae Purim ba na shid' ba re myid: beim: mung: phug' cao" na nae" qhid' mae" myid vang" dao: thang" khyo" to" ako".

²⁹Ai: thao Abihai nho: myiqe: zo: kho:kham myhi" Estha wa- Modekhai we' daga" Purim poe we' sin: yang:- ce: mugsug' shid' khye' ein: khye' re- yao" kheim: so' byang" byang" ci: yang jao dang kad' ke' byid' ra".

³⁰Ai: mugsug' wa Yuda byumyu" alhab' re qang yang: tung" ru ngad mung: ai: mugsug' tung" dau jham re Persia khosin" mung"dan: mae" mung" dau 127 lam: khyo vhin: pyo: ke' ra". Ai: mugsug' mae wa- Yuda byumyu" qe yaug yo cae: tae" ru we' gug: gam: ru qo" yu genae" qhid' mae" au" ke' ra".

³¹Kaug' ngug: ra" ayo, we' zo:ve jao" ra" ayo, re- phug' cao" nae" qhid' mae" thung" li re yao: bam kad' lai: lo: ru we' dakhyo:- Purim poe ba re dau ang: ra" ayo, mae phug' cao" yang: kad' genae" qhid' mae" yao: bam re we' yao: bam myid:zo: qere mho" shid' to" ra". Ceru re Modekhai we' kho:kham myhi" Estha shid' yaug geim" yang amyin" byid' to" ru ngad: ra".

³²Purim qhid' mae" thung" li jham re jao dang byid' ra" kho:kham myhi" Estha nho: amyin" re mugsug' dang: mae tung" te' to" ako".