Read Maru PHAO: THUG' 1 Bible Online

PHAO: THUG' 1 - Maru bible

PHAO: THUG' 1

¹Egutu mung" khyo Yaku we' daga" ye: ko" ra" Yaku nho: yauggai zo: qe we' yao: bam yaug khao: ngo" nho: yham byu qe wa-

²Rubin- Simon- Levi- Yuda

³Isakha- Zebulun- Benyamin

⁴Dan- Nabhtali- Gad- Ashe bam ngad: ako".

⁵Yaku mae" myhung: gyo" li" ko" ra" myid:zo: qe alhab' wa nhad' xe yaug ngad: ako". Yao" yauggai zo: Yoseb wa Egutu mung" mae joe" na gau ngad: ra".

⁶Apyad aqae: myo" lo: ru we' dakhyo:- Yoseb- yao" yao: mao: yao:nhaung: qe we' dang: ra" ai: qae: mae" gu: alhab' shid: byaug: ako".

⁷Ngadqere: yao: bam: myid:zo: qe ngad ko" ra" Israel byu qe wa zo: dau myo: sho' qo" gemung:- gyai myo" laug: li" ko" ru we' qam: bo: li" mung: Egutu mung" byang" sho' na: jo; ako".

⁸Ai: thao Yoseb khyo re pe" maba: ra" kho:kham asag' dayaug wa Egutu mung" mae kheim: so' qo" li" ra".

⁹Yao: wa yao" mung" byu qere- Ce: Israel byu qe wa ngonhaung" tho' mae gyai myo" laug: li" ko" ru we' qam: bo: li" ako".

¹⁰Gye khe' poe mae yao: bam wa ngonhaung" re gyekhe' nae" qhid' mae" ngonhaung" nho: gyevo qe we' qhan: mung: mung"dan: mae" phao: loe; lo" li" genae". Ngonhaung" wa yao: bam myo" laug: li" na ko" rure tam" pye' nae" khyo qho ca" ra"- ga: ta" ra".

¹¹Airumung: Egutu byu qe wa mau" jam: phin" zaui: nhao mung: yao: bam: ayo, nhag' lam: jham re khyoe' pye' byid: nae" qhid' mae" jeim be; keim: mo, san: to" ako". Israel byu qe wa kho:kham pho" qhid' mae" zai to: vogaung: Phitom we' Ramese vogaung: re te: byid' ako".

¹²Ngadqere: Egutu byu qe Israel byu qere je: deim" zag: re je: yao: bam je: yang: myo" je" li" gemung:- mung"dan: geim" mae je: va: sho' byo: lo" ako". Egutu byu qe wa Israel byu qere gyaug: li" ako".

¹³Yao: bam re nhag' khyag' myid mabo lasho' jeim deim" zag: kad' geyang:-

¹⁴yao: bam: nhag' lam: re nhag' kaug' nhag ngai boe" nhao: ako". Yao: bam wa Israel byu qere yao: bam: yham zhaug' mau" jham mae we' yothaung: jham mae mau" zaui: nhao mung: Egutu byu qe wa yao: bam re dajhid' re: nhag' makhyag' ko" ngad: ra".

¹⁵Ai: thao Egutu kho:kham pho" wa Hebre myiqe: qere zonau" bao" khau byid' ra" Hebre zo:khau bao" myhi" zang shid' yaug ngad ko" ra" Shiphra we' Pua re dao: jhau mung:-

¹⁶Ni" shid' yaug Hebre myiqe: qere zonau" bao" khau byid: gelao"- yauggai nau" ngad re wa ai: zonau" re se' pye' ge, ngadqere: myiqe: nau" ngad: lao" wa daui: na nhao ge,- ga: yao: shid' yaug re ta" ra".

¹⁷Ngadqere: ai: zonau" bao" khau: ra" myiqe: shid' yaug wa Mao"So re gyaug phug' ra" tao ngad: gemung:- Kho:kham pho" dao: re matae" gyo: ko" ngad: ra". Airu: kad' nae" atha"- yao: shid' yaug wa yauggai nau" qere daui: na nhao: ako".

¹⁸Airumung: kho:kham pho" wa ai: zonau" bao" khau byid' ra" myhi" zang shid' yaug jhao" byu nhao: ke' mung:- yao: shid' yaug re- ni" shid' yaug pe"mung: ceru: kad' i? Ni" shid' yaug pe"mung: yauggai nau" qere daui: na nhao: to: ko" i? ga: myid: nhao: ra".

¹⁹Yao: shid' yaug wa Hebre myiqe: qe wa Egutu myiqe: qe we' madau ko" ngad: ra". Yao: bam wa zonau" re laui laui za: khau mung:- yao: bam: zonau" jham re nga" shid' yaug majoe" ye: shire khau: pye' pye' mung: ako"- ga: tau" ako".

²⁰Zonau" bao" khau byid: ra" shid' yaug wa Mao"So re gyaug phug' ru tao ngad: gemung:- Mao"So wa yao: shid' yaug re gai kad' byid: mung:- yao: shid' yaug: re ug khug' dinkhu: byid' ra". Israel byumyu" qe wa xo' yang: myo" je" li" ru we' qam: bo: li" ako".

²²Lo" thao" mae kho:kham pho" wa- yao" mung" byu alhab' mo, re Hebre zonau" yauggai yaug khao: ngo" re jhui" yu mung: Nila gyaung: khug khyo pye' zaui: pye' ge,. Ngadqere myiqe: nau" alhab' re wa daui: na nhao: to: ge,- ga: amyin" dalam: khyo" ke' ra".