Read Maru PHAO: THUG' 12 Bible Online

PHAO: THUG' 12 - Maru bible

PHAO: THUG' 12

¹ASANG wa Egutu mung" mae Moshe we' Arun tao re-

²Lho" ce khye' wa naonhaung" qhid' mae" sao qhid' mae" lho" khye' ngad: li" nae".

³Israel byu phung: geim" re ce: khyo re mho" byid: wa,- lho" ce khye' daxe ba: ba re yauggai yaug khao: ngo" wa yao" yham byu qe qhid' mae" yao nau"- mangad: lao" cad' be, nau" dadau: re khyin: yu ca" ra".

⁴Yao" yham byu qe ai: gug'nyhug' dau: geim" re zo: nae" byu saung" nang: gelao" wa- yao: we' yao" yham khyo: cao: wa gug'nyhug' dadau: re jho" myho" mung:- Khoyaug khonho" qo" zo" ru we' yham byu qere nghe' yang: qo" jho" myo" zo" ra".

⁵Naonhaung" wa yao- mangad: lao" cad' be, re gai: khyin: yu: ra". Ngadqere: airu wa dazin byang" mung:- dajhid' re: maqeim: ru ngad ca" ra".

⁶Ailao"- ai lho" khye' daxe: byid: ba: ba myi" thao re Israel byu qe mo, phung" geim" wa ai: gug'nyhug' jham re se' genae" ngad: ra".

⁷Mo,byu qe wa sa: dajhid' re yu: yu mung:- ai: gug'nyhug' jham re zo: genae" ra" yham mae" kham baung zang jham mae we' kham: au: jham re gyad genae" ngad: ra".

⁸Ai: myi re sho: re kao mung:- man" mabo: ra" mug we' akho: vho' we' zo: nae" ngad: ra".

⁹Sho: jam: mangad: lao"- xaug' pye' rure dajhid' re: dazo: ge,. Ngadqere: au:- khyid jham- khug lam khug sang: jham bobo mung: alhab' re kao yang: zo: ca" ra".

¹⁰Ne, kao mug: bo" sho' ai sho: re dajhid' re: magai: tang" to: nae"- tang" to" ngad: re wa aire ngha" pye' ca" nae".

¹¹Naonhaung" wa gyaung: su: nae" qhid' mae" mai bau: ve,- naonhaung" khyid mae khyid zhaung: zhaung" ci naonhaung" lo, mae zaung: bao" ci yang: ai sho: re phyad phyad zo: ca" genae" ngad: ra". Airu wa ngo ASANG re phug' myao: nga: yhe' byid' ra" lai co' poe ngad: ra".

¹²Ai: myi re ngo wa Egutu mung" geim" khyo jao: sho' ye: mung:- byu zoqhid' yauggai zo: yaug khao: ngo" we' sao qhid' xao" ra" gug'nyhug' lo: dau: khao: ngo" re se' pye' mung:- Egutu mung" mae" so jham alhab' re qobo dae byid: nae". Ngo wa ASANG ngad:-

¹³Kham: baung zang mae de; ra" sa: wa naonhaung" na: ra" yham jham re xam: so" to" ra" aso: ngad: li" nae". Ngo wa ai: sa: re myao lao"- ngo naonhaung" re lai: to: co' nae". Airu: Egutu byu qere ngo qobo dae byid' ra" au:- ngo wa naonhaung" re dae mate' nae".

¹⁴Naonhaung" wa ce: ba na re ASANG ngo kad' va" ra" mau" re naonhaung" re myid: beim: nhao nae" qhid' mae" caung:pa" thung" li poe dalam: khyo" poe kad' ca" genae" ngad: ra". Airu joe" lo nae" ayo, alhab' mae poe kad' ge,.

¹⁵Nhad' ba lam: lam: man" ke' ra" mug re dajhid' re: magai: zo: genae"- man" make' ra" mug re za: zo: ca" ra". Sao qhid' ba re naonhaung" yham jham mae" man" jham alhab' re yu: pye' ca" ra". Pe"mung:ga"re dayaug yaug ai: nhad' ba agyo: mae man" ke' ra" mug zo" ngad: re- yao: re nga" byu dayaug ngad: ein: sun" yu lo nae" mangad:-

¹⁶Sao qhid' ba mae we' nhad' ba: ba mae naonhaung" wa caung:pa" nae" qhid' mae" ham phaung kad' qo: ako". Ai: shid' ba mae mau" magai: zaui: nae". Ngadqere: zo:ve re wa naonhaung" gai: nyhang" seim" ra".

¹⁷Ce: poe re khonhae" re: kad' ge,- pe"mung:ga"re naonhaung" byumyu" qere Egutu mung" mae" ngo jhui" lo: ra" ba na wa ce ba na ngad: ra". Joe" lo nae" ayo, alhab' mae re: ce: ba na re poe khyo" naonhaung" kad' ca" genae".

¹⁸Lho" sao qhid' khye daxe: byid: ba: ba myi" thao mae" ai:lho" khye' shid' xe: daba: ba joe" sho' man" ke' ra" mug re naonhaung" magai: zo: genae".

¹⁹Nhad' ba lam: lam: naonhaung" yham jham mae mau" magai: myao nae". Aimung" mae khau yaug- mangad: lao" taung bug byu dayaug yaug man" ke' ra" mug zo" ngad: re yao: re nga" byu dayaug ngad: ein: sun" yu lo nae" mangad:- ein: cekhyo re mho" byid: wa,- ga: ta" ra".

²⁰

²¹Moshe wa Israel qenho: au: jhaung qe alhab' re khai: yu mung:- naonhaung" byumyu" qe lai co' poe qo" kad' genae" qhid' mae"- naonhaung" yaug khao: ngo" wa yao nau" mangad: lao"- cad' be, nau" dadau: dau: re khyin: yu mung: aire se' ge,.

²²Husub akyao dakyao re yu yang:- gug'nyhug' sa: bo: ra" jarung: mae deim" jam: yu mung:- sa re kham: baung jham mae we' naonhaung" yham kham: au: mae deim" boe; gyad: to: wa,- ne, seim joe" sho' khag' re: yham mae" magai: thug' nae".

²³ASANG wa Egutu byu qere se' nae" qhid' mae" Egutu mung" jao: sho' ye" ra" au:- yao: wa kham: baung au: jham mae we' kham: baung zang mae de; ra" sa: re myao: li" nae". Ailao"- shid: zug: lagyo: re naonhaung" re se' nae" naonhaung" yham jham khyo mavao ye: nhao nae".

²⁴Naonhaung" yao: we' naonhaung" zo: dau qe wa ce: tarha" re apyad ato phug' cao" ca" genae".

²⁵ASANG naonhaung" re byid: nae" ga: dao:so: byid' to" ra" mung"dan: khyo naonhaung" vao ye" lo" ko" ra" au:- naonhaung" wa ce: caung:pa" thung" li re kad' qo: ako".

²⁶Naonhaung" nho: zo: dau qe ce: caung:pa" thung" li" wa pe" lajheim: bo: i? ga: naonhaung" re myid: gelao"-

²⁷Naonhaung" wa ceru wa Egutu mung" mae ASANG wa Israel byu qenho: yham jham re lai: to: co' ruyang ASANG re phug' myao: nga: yhe' byid: nae" qhid' mae" kad' ra" lai co' poe: nho: ngaui" xeim: ngad: ra". Yao: wa Egutu byu qere se' pye' ngadqere: ngonhaung" re wa tang" to" ra"- ga: tau" li" genae"- ga: ta" ra". Israel byu qe wa pad' thaug' thaug' yang: caung:pa" ako".

²⁸Ai: thao yao: bam wa ye" lo" mung: Moshe we' Arun tao re: ASANG amyin" byid' to" ru we' dakhyo: kad' ako".

²⁹ASANG wa myi" gae gaung: mae kho:kham xo' kad' nae" kho:kham pho" nho: yauggai zo: mae"- myid khyaung mae thaung: laung" jo; ra" yaug: nho: yauggai zo: joe" sho' Egutu mung" mae" zoqhid' yauggai zo: qere se' pye' ra". Sao qhid' xao" ra" gug'nyhug' jham rere: se' pye' ra".

³⁰Ai: myi re- kho:kham pho"- yao" zug: qe gatau Egutu byu qe alhab' wa so" li" ako". Egutu mung" geim" mae gyi: hug' ngug thoe byang" jo; ra". Pe"mung:ga"re yauggai zo: mashid: lang" jo; ra" yham dayham re: majo, yang: ngad: ra".

³¹Ai: myi re yao:- kho:kham pho" wa Moshe we' Arun tao jhao" byu nhao: ke' mung:- ni" shid' tao we' naonhaung" Israel byu qe thug' lo" ge,- nga" mung"dan: mae" phao: lo" ge,- ni" shid' tao mho' ko" ru we' dakhyo:- ASANG re ye caung:pa" byid: ge,-

³²Naonhaung" nho: yao- cad' be,- nung: jham re jhui: mung: thug' lo" ge,- ngo rere: akyu" mho' shaman" byid: co' gela,- ga: ta" ra".

³³Egutu byu qe wa Israel qere- naonhaung" maphao: thug' lo" gere wa ngonhaung" alhab' mo, shid ru qhug' li" nae"- ga: ta" mung: mung"dan: mae" phyad thug' lo" genae" qhid' mae" jhan" ako".

³⁴Airumung: Israel qe wa yao: bam nho: mug kad' ra" ug' the" jham mae man" make' ra" cin man" jham ke' mung: aijham re mai bau" yang kag' yang: aire yao: bam lo, sin mae gaug; vo; ako".

³⁵Israel qe wa Moshe ta" ru we' dakhyo: bin: kad' mung:- Egutu byu qere qhang zai- ngaui zai jham we' mai bau: jham mho' ako".

³⁶ASANG wa Egutu byu qere Israel qere phug' myao: nhao mung:- Israel qe mho' ra" ja: alhab' byid' ako". Ceru: Israel qe wa Egutu byu qenho: jo,nho" jham re tai: thug' lo" ako".

³⁷Israel qe wa khyid khyo" Ramese mae" Sukhod khyo to" lo" ako". Myiqe: zoshao qere manghe' re yauggai za: khyaug' tig yaug ko ngad: ako".

³⁸Gatau byu phung: mo" zang we' yao- cad' be,- nung: jham myo: sho' re: yao: bam we' daga" ngad: ako".

³⁹Yao: bam wa Egutu mung" mae" vin thug' lo: ra" cin man" re man" make' lo: mug kad' ako". Pe"mung:ga"re yao: bam wa nyag din taung" za: Egutu mung" mae" khe' thug' ke' ru qhug' geyang: yao: bam: zo:ve re nyhang" seim" yu nae" we' man" ke' ra" cin re seim" yu nae" ayo, maqo" ko" ngad: ra"- Mangad: lao"- man" ke' ra" cin man" re nyhang" ci nae" ayo, maqo" ko" ngad: ra".

⁴⁰Israel byu qe wa Egutu mung" mae 430 zin na: pye' ako".

⁴¹430 zin gan: ra" ba mae ASANG: byumyu" kaung qe alhab' wa Egutu mung" mae" thug' lo" ako".

⁴²Yao: bam re Egutu mung" mae" jhui" thug' lo nae" qhid' mae" ASANG lhaug' qu" na: ra" au: wa myi" ngad: ra". Cemyi re yao:- joe" lo nae" yo, alhab' qhid' mae" Israel qe lhaug' qu" nae" myi khyo" ASANG re qhaug' byid' ra" myi ngad: ra".

⁴³ASANG wa Moshe we' Arun tao re- Cejham wa lai co' poe thung" tarha" jham ngad: ra". Lai co' poe zo:ve re taung bug byu khag' re: magai: zo: nae" ngad: ra".

⁴⁴Ngadqere: nao yao: re sao qhid' au: qid lhai: khyo kad' byid: yang: ngad: re- nao vai: yu: to" ra" jeim khag' ngadqere: aire gai: zo" ra".

⁴⁵Dazab daqo: na yaug- mangad: lao"- mau" zaui: okaung qe khag' re: aire magai: zo: ngad: ra".

⁴⁶Nyhang" jaung: to" ra" zo:ve re yham khug mae alhab' re zo" pye' ca" ra". Aire taung gaung shad' khyo magai: yu: thug' lo" ngad: ra". Aimung: gug'nyhug' khodau" nho: sho: qug: rere: magai: khyug' pye' ngad: ra".

⁴⁷Israel byu phaung geim" ce: poe re kad' qo: ra".

⁴⁸Ngadqere: au: qid lhai: khyo makham: yu: ra" yaug khag' re: aire magai: zo:- naonhaung" phaung mae na: ra" taung bug byu dayaug wa ASANG re phug' myao: nga: yhe' byid: nae" nug kao bau yang: ngad: re- naonhaung" wa yao" yham yauggai alhab' re sao qhid' au: qid lhai: khyo kad' byid: qo: ra". Ailao"- yao: wa ai: mug: mae khau: ra" Israel byu we' dakhyo:- kad' ru qhug' mung:- ai: poe mae bogai: leim: ra".

⁴⁹Aimung" mae khau: ra" Israel qe we' naonhaung" phaung mae na: ra" taung bug byu qe alhab' wa ai: thung" tarha" re dakhyo: za: ci ca" ra".

⁵⁰Israel byu qe alhab' wa phug' cao" mung:- Moshe we' Arun tao re ASANG amyin" byid' to" ru we' dakhyo:- kad' ako".

⁵¹Ai: ba mae ASANG wa Israel byumyu" qere Egutu mung" mae" jhui" thug' lo" ra".