Read Maru PHAO: THUG' 14 Bible Online

PHAO: THUG' 14 - Maru bible

PHAO: THUG' 14

¹Ai: thao ASANG wa Moshe re-

²Israel qere tug' lo mung:- Bala Migdo we' Bala Zephon nhae mae" Tham: Ne agyo: mae" Pi Hahirod qhid' au: mae thang genae" qhid' mae" ta" wa,-

³Kho:kham pho" wa- Israel byu qe wa mung"dan: khug mae du" lae" qin" gemung:- din" pyad' yo: yang lhang" kham" to" ra" akhug mae ngad: genaeva"- ga: myid: jho: li" nae".

⁴Ngo wa yao: re nhag' lam: qao nhao nae". Yao: wa naonhaung" thao khyo cao" khe' li" nae". Ngo wa kho:kham pho" re aung: pye' mung:- yao" gyetab wa ngore nga: yhe' nhao: li" nae". Ailao" ngo wa ASANG ngad: rure Egutu byu qe ba: li" genae"- ga: ta" ra". Israel byu qe wa yao: bam re ta" ru we' dakhyo: kad' ako".

⁵Israel byu qe phao: loe; lo" vako" ra"- ga" rure Egutu kho:kham pho" the' gyo: lao"- yao: we' yao" zug qe wa yao: bam: nhag' lam: re lhai" pye' gemung:- ngonhaung" pe" kad' gava" laug i? Ngonhaung" wa Israel byu qere phao: loe; lo" nhao: bam va". Ngonhaung" nho: jeim qekhyo" yao: bam re seim" pye' va"- ga: ta" ako".

⁶Kho:kham pho" wa yao" gyekhe' myao: lhin" re we' yao" gyetab re jin" jin" kad' nhao: ra".

⁷Yao: wa gai: thao" ra" myao: lhin" khyaug' yo re yao: bam re eib: ra" zug: qe bobo mung:- yao" gyekhe' myao: lhin" alhab' we' ye" lo" ra".

⁸ASANG wa kho:kham pho" re nhag' lam: qao nhao mung:- aung doe; ra" khyo" phao: thug' lo" na ko" ra" Israel byu qere cao" khe' ra".

⁹Egutu gyetab wa myao: jham alhab'- gyekhe' myao: lhin" jham- myao: lhin" keim: mo, we' yao: bam re cao" khe' mung:- yao: bam thang: na ko" ra" Pi Hahirod we' Bal Zephon nhae mae" Tham: Ne ayae mae yao: bam re ye myhi: ako".

¹⁰Israel byu qe wa kho:kham pho" we' yao" gyetab yao: bam jhao" li" na ko" rure myao gelao" yao: bam myo, shid noshid gyaug gemung: bao" thaug' yu nae" qhid' mae" ASANG re mho' yao: ako".

¹¹Yao: bam wa Moshe re- Egutu mung" mae ngonhaung" nho: lab majo, i? Nao wa ngonhaung" re ce: din"pyad' yo mae shid nhao nae" qhid' mae" ngonhaung" re jhui" thug' lo va" i? Qu" wa, ngonhaung" re Egutu mung" mae" jhui" thug' lo yang: nao: pe" kad' to: va" i?

¹²Ngonhaung" to" lo" nae" qhid' re ceru boe" li" nae" ein: nao re ngonhaung" ta" va" mangad: i? Ngonhaung" re to: co' la,- Egutu byu qe: jeim xo' yang kad' na nhao la,- ein: nao re ngonhaung" ta" va". Ngonhaung" wa ce: din"pyad' yo mae shid nae" tho'- ai: mung" mae jeim kad' na ru wa je: gai: ra" ga: ta" ako".

¹³Moshe wa- dagyaug ge,- naonhaung" yao" jo, qo mae ye; jo, ge,- ana" ba- ASANG naonhaung" re khyad' yu nae"qhid' mae" pe" kad' nae" rure naonhaung" myao: li" genae". Ai: Egutu byu qere naonhaung" khonhae" re: madam: myao lo: genae".

¹⁴ASANG wa- naonhaung" qhid' mae" gyekhe' byid' li" nae". Naonhaung" alhab' mo, kad' ca" ko" ru wa- sae za: na genae" ru ngad: ra" ga: tau" ra".

¹⁵ASANG wa Moshe re- nao pe"mung: bao" thaug' yu nae" qhid' mae" hug' yao: i? Qhid' khyo qui" ye: genae" qhid' mae" mo,byu qere ta" wa,-

¹⁶Ni" zaung: bao" re to' mung: tham: dao khyo yheim" ke' wa- Qid wa jho" kho' lo" genae". Israel byu qe wa myid ho yo mae tham: gaung: khyo" qo" su" phyid' lo" li" genae".

¹⁷Ngo wa Egutu byu qere gyai nhag' lam: qao nhao mung: yao: bam wa Israel qe: thao khyo cao" khe' li" genae". Ngo wa yao" gyetab yao" gyekhe' myao: lhin" jham- yao" myao: lhin" keim: mo, we' daga" kho:kham pho" re aung: pye' ra" khyo" yang ngo wa nga: yhe' ru qhug' yu: li" nae".

¹⁸Ngo yao: bam re aung: pye' lao"- ngo ASANG ngad: rure Egutu byu qe ba: li" genae".

¹⁹Israel gyetab qhid' au: mae na: lo: ra" Mao"So: mug: lagyo: wa nhaung thao" shad' khyo qui" na: jo; ra". Nhag' qhid' zang re: Israel byu qe we' Egutu byu qe: agyo: mae ngad sho' qui" lo" ra".

²⁰Jham thaui: wa Egutu byu qere mug: cad' cad' byid: ra". Ngadqere: Israel byu qere wa bo" bao bao byid' ra". Airumung: gyetab shid' lam wa myi geim" yao: cao maqo" jho" te' ye: ngad: ako".

²¹Moshe wa yao" lo, re tham: dao khyo yheim" ke' mung:- ASANG wa qam: gai: ra" ba thug' shad' la: yang tham: re hug' tug' ke' ra". Ai: la wa myi geim" hug' mung:- tham: wa myid ho yo boe" lo" ra". Qid wa jho" kho' lo" ako".

²²Israel byu qe wa shid' shad' geim" mae qid khinqae: qae: to" ra" agaung: myid ho yo khyo" ye" lo" ako".

²³Egutu byu qe wa yao: bam re cao" khe' mung: Israel byu qe: thao- yao: bam: myao: alhab'- gye myao: lhin" jham- myao: lhin" keim: mo, alhab' we' cao" khe' ye" lo" ako".

²⁴Mug: mabo" shire ASANG wa myi: zang we' nhag' qhid' zang mae" Egutu gyetab re qu" ke' mung:- yao: bam re byodin byosho boe" nhao: pye' ra".

²⁵Yao: wa yao: bam: gye myao: lhin" jham: lhin" ce' jham re qae" nhao: ra". Airumung: yao: bam wa gyai aqug: akhai: boe" mung:ye" lo" ako". Ailao"- Egutu byu qe wa ASANG wa Israel byu qe: qhid' mae" ngonhaung" re gyekhe' yang: gyekhe' na: ra" cemae" phao: thug' gelang: ga: ta" ako".

²⁶ASANG wa Moshe re- ni" lo, re tham: dao khyo yheim" ke' wa,. Qid wa Egutu byu qe: dao- yao: bam: gye myao: lhin" jham- keim: mo; dao mae tug' lo li" nae"- ga: ta" ra".

²⁷Moshe wa yao" lo, re tham: dao khyo yheim" ke' mung:- mug: bo" lao"- qid wa azhao: mae" ru: dam: tug' lo: ra". Egutu byu qe wa qid mae" phao: loe, nae" qam: ke' ako". Ngadqere: ASANG wa yao: bam re tham: khyo pye' zaui: pye' ra".

²⁸Qid wa dam: tug' lo mung:- gye myao: lhin" jham- myao: lhin" keim: mo,- tham: shad' khyo Israel byuqere cao" khe' ra" Egutu gyetab alhab' dao mae lonhai" pye' ra". Dayaug re: ma loe, ko" ngad: ra".

²⁹Ngadqere: Israel byu qe wa shid' shad' geim" mae qid khinqae qae: to" ra" tham: gaung: myid ho yo khyo" su" lai: lo" ako".

³⁰Ai: ba mae ASANG wa Isreal byu qere Egutu byu qe lo, mae" khyad' yu: ra". Israel byu qe wa Egutu byu qe: qid yae mae shid: lang" jo; bam ko" rure myao: ako".

³¹ASANG wa qi" qhang: ra" qam: so' yang Egutu byu qere aung: pye' rure myao gelao"- yao: bam wa ASANG re gyaug phug' ru we' ye; jo; ako". Yao: bam wa ASANG re we' yao" daui daui yaug Moshe re lam khug: ra" myid qo" yu: ako".