Read Maru PHAO: THUG' 16 Bible Online

PHAO: THUG' 16 - Maru bible

PHAO: THUG' 16

¹Israel byu phung: geim" Elim mae" to" lo" mung:- yao: bam Egutu mung" mae" thug' lo thao lho" shid' khye' ein: khye' daxe: ngo" ba re Elim we' Sina agyo: mae jo; ra" Sin ga" ra" din"pyad' yo khyo joe" ye" ako".

²Ai: din"pyad' yo mae yao: bam alhab' wa Moshe we' Arun tao re nyhung mung:-

³Yao: shid' tao re- Egutu mung" mae ngonhaung" re ASANG: yang se' pye' nae" rure ngonhaung" o: ra". Ai: mae nang" thao" ngonhaung" wa zaung: jo; mung: nung: sho: we' gatau zo:ve re ngonhaung" o: ra" nho" qo" zo" ra". Ngadqere: naotao wa ngonhaung" alhab' re vae: moe' shid nhao nae" qhid' mae" ce: din"pyad' yo khyo jhui" thug' lo: ava"- ga: ta" ako".

⁴ASANG wa Moshe re- Ana" naonhaung" alhab' mo; qhid' mae" zo:ve re mug:gaung mae" qu: khyo" byid: nae" mo,byu qe wa ba khao: ngo" thug' ye: mung: ai ba: qhid' mae" laug sho' ye gaug: zhang: yu ca" genae". Ceru:- yao: bam nga" mho dao: re phug' cao"- maphug' cao" genae" rure ngo yao: bam re qo" jham" qu" ra".

⁵Khyaug' ba ein: ba mae wa yao: bam wa ganhae" nho" shid' nho" gaug: yu mung: aire nyhang" to: ca" genae"- ga: ra" ra".

⁶Airumung: Moshe we' Arun tao wa Israel byu alhab' mo, re- ASANG wa naonhaung" re Egutu mung" mae" jhui" thug' lo yaug ngad: rure ana" myi" thao naonhaung" ba: li" genae".

⁷Ne, kao re ASANG: qhid' kheim: mae" bao qhui: ra" bo" bao re the' myao: li" genae". Yao: re gye kad' yang: naonhaung" nyhung: ra" dao: re yao: the' gyo" ava". Ngad: va"- yao: re gye kad' ako". Pe"mung:ga"re nga" shid' tao wa yao" mho dao: re za: tae" gyo: yang: kad' ru tao ngad:- ga: ta" ako".

⁸Ai: thao Moshe wa- ASANG wa myi" thao re naonhaung" re sho: byid: zho" li" nae"- Ne, kao re wa naonhaung" qo: nho" mug byid: zho" li" nae"- pe"mung:ga"re naonhaung" yao: re khoqhi" sho' gye kad' yang: nyhung: ko" ra" dao: re yao: the' gyo" ava". Naonhaung" nga" shid' tao re nyhung: ru wa gaigai: yao: naonhaung" wa ASANG re gye kad' nyhung: ru ngad: ako"- ga: ta" ra".

⁹Moshe wa Arun re- byu phaung geim" re ASANG qhid' kheim: khyo li" ye; jo, genae" qhid' mae" ta" wa,- pe"mung:ga"re ASANG wa yao: bam: nyhung thoe re the' gyo" ava"- ga: ta" ra".

¹⁰Arun byu phung: geim" re dao: jhau: na: au: yao: bam wa din"pyad' yo shad' khyo lhang: qu" ke' ko" re- nyag din taung" ASANG: bao qhui: ra" bo" bao wa jham thaui: khug mae thug' li" ra".

¹¹ASANG wa Moshe re-

¹²Ngo wa Israel byu qenho: nyhung thoe re the' gyo: va". Yao: bam re- yao: bam wa ba vao zo" re sho: qhug' zo" li" genae". Aimung: ne, kao re wa yao: bam o: nho" mug qo" zo" li" genae". Airulao" yao: bam wa ngo wa yao: bam: Mao"So ASANG ngad: rure ba: li" genae" ein: ta" wa,- ga: ta" ra".

¹³Myi" thao re ai: ngho' tau" jham mo" zang wa jamu mae byang" sho' dao" vao lo mung:- ne, kao re wa jamu lhang" gam: mae nghin byang" sho' gyo" jo; ra".

¹⁴Nghin baui" lo" lao"- Ngai ngai mung: akye' kye' mung: ru daja: din"pyad' yo myid gaung mae dang: jo; ra". Aiwa nghin khai" we' dakhyo: nau" nau" ru ngad: ra".

¹⁵Israel byu qe wa aire myao gelao"- ai ru pe" ja: ngad: rure yao: bam maba gemung:- pe" ngad: ra" i? ga: yao: cao: jho" myid' ako". Moshe wa yao: bam re- ceru wa naonhaung" zo: genae" qhid' mae" ASANG byid' ra" zo:ve ngad: ra".

¹⁶Naonhaung" yaug khao: ngo" yao: qo ca" ra" nho" gaug: zhang: yu mung:- yao" yham byu yaug khao: ngo" qhid' mae" shid' khug' khug' gaug: zhang: yu genae" qhid' mae" ASANG amyin" byid' to" ra"- ga: ta" ra".

¹⁷Israel byu qe wa airu: kad' ako". Daqhae: wa jan" sho' gaug: yu mung:- daqhae: wa mathae lo: gaug: zhang: yu: ako".

¹⁸Yao: bam aire lag: qu" gelao" myo: sho' gaug; yu: ra" mo, wa gyai myo: sho' maqo" ngad: ako". Mathae lo: gaug: yu: ra" mo, re: gyai nang: sho' mangad: ko" ngad: ra". Yaug khao: ngo" wa yao: bam qo ca" ra" nho" gaug: yu: ako".

¹⁹Moshe wa yao: bam re- airu re khag' re: ne, kao: qhid' mae" dajhid' re: magai: tang" to: ngad: ra"- ga: ta" ra".

²⁰Ngadqere: daqhae: wa Moshe nho: mho dao re matae" gyo: lo:- aimae" kho' to" ako". Thao: ba ne, kao re airu wa laug za: byang" jo, mung: bab: nae: lo" byaug: ra". Aimung: Moshe wa yao: bam re gyai nhag' yo" ra".

²¹Ne,seim khao: ngo" yaug khao: ngo" wa yao: qo ca" ra" nho" gaug: yu: ako". Ba laung: li" lao"- myid gaung khyo yug: lo" byaug: ako".

²²Khyaug' ba ein: ba mae wa ganhae" mae" tho' shid' nho" yaug khao: ngo" qhid' mae" byid khug' khug' gaug: zhang: yu: ako". Byu phung: nho: au: jhaung qe alhab' mo, ai: khyo re Moshe re li" ta" kyo" ako".

²³Moshe wa yao: bam re- ne, mo" ba wa yao" qhid' mae" jaung: to" ra" gyang" lho" ra" myaung: ngho" ba na ngad: ga: ASANG amyin" byid' to" ra". Ana" ba naonhaung" kad' nug: ra" mug kad' mung:- xaug' nug: ra" ja: re xaug' ge,- dang: ra" gu: wa ne, mo" ba: qhid' mae" gatau kho' to: ge,- ga: ta" ra".

²⁴Moshe amyin" byid' ru we' dakhyo:- dang: ra" gu: re thao: ba joe" sho' tang" to" ako". Airu wa ma qeim- laug re mavao ngad: ra".

²⁵Moshe wa ce: ba re zo: ge,- pe"mung:ga"re ana" ba wa Dugno: Ba- ASANG qhid' mae" jaung: to" ra" myaung: ngho" ra" ba na ngad: ra". Thang: na: ra" jo, qo taung gaung shad' khyo zo:ve daja: re: naonhaung" magai: yeqho genae".

²⁶Naonhaung" wa zo:ve re khyaug' ba gu: mae qo" gaug: zhang: yu: ra". Ngadqere: nhad' ba ein: ba- myaung: ngho" ra" ba na mae wa khag' re: magai: gaug: yu genae"- ga: ta" ra".

²⁷Nhad' ba ein: ba mae mo,byu qe daqhae: wa- zo:ve ye gaug: yu nae" thug' ye" ako". Ngadqere: yao: bam pe" re" mamyao ko" ngad: ra".

²⁸Ailao" ASANG wa Moshe re- naonhaung" wa nga" amyin" dao: jham re phug' cao" nae" khomyhao" joe" sho' ha: na genae" i?

²⁹Ngo ASANG wa naonhaung" re myaung: ngho: ba na byid' to: yaug ngad: rure myid: beim: ge,- ce: mathao mae khyaug' ba ein: ba mae ngo wa- naonhaung" re shid' ba: qhid' mae" laug sho' zo:ve khonhae" re: byid' ra". Nhad' ba ein: ba mae yaug khao: ngo" wa yao: na: ra" jo, qo mae na: jo, mung:- yao" yham mae" magai: thug' ngad: ra"- ga: ta" ra".

³⁰Airumung: mo,byu qere: nhad' ba ein: ba mae mau" mazaui: ko" ngad: ra".

³¹Israel byu qe wa ai: zo: ve re Manna ga: mhang" ako". Airu wa ngai: ra" myug: shi jid' aphyu ru" ru: ngad mung:- byoyhid we' kad' to" ra" mug khye' po: ru" ru ngad: ra".

³²Moshe wa- yao: ngonhaung" re Egutu mung" mae" jhui" thug' lo: ra" au: yao: ngonhaung" re byid: zho" ra" zo:ve re yao: bam myao geshao:- ngonhaung" myid:zo: qe: qhid' mae" Manna daqhae: re- shaung: to: nae" qhid' mae" ASANG wa ngonhaung" re amyin" byid' to" ra"- ga: ta" ra".

³³Ailao" Moshe wa Arun re- yae: ngai dalam: yu: yu mung:- ai khug mae Manna shid' khug' ke' wa,- amung: ngonhaung" myid:zo: qe: qhid' mae" zam" to: byid: nae" ASANG qhid' kheim: mae to: wa,- ga: ta" ra".

³⁴Ai: rure zam" to: nae" qhid' mae" ASANG Moshe re- amyin" byid' to" ru we' dakhyo:- Arun wa ai: Manna yae: re Dao: Thang" Ban" qhid' au: mae to" to" ra".

³⁵Yao: bam yete" na nae" ra" Khanan mung" khyo yao: bam joe" ye: ko" ra" ba na joe" sho' Israel byu qe wa Manna mug re zin lam: byid xe zo" ako".

³⁶(Ai: ayo, mae akyaug' lag: ra" jo, lag wa khug' shid' xe we' daqi" ngad: ra".)