Read Maru PHAO: THUG' 18 Bible Online

PHAO: THUG' 18 - Maru bible

PHAO: THUG' 18

¹Moshe nho: yaug pho" Midian khinjaung pho" Yethro wa Israel byu qere Mao"So Egutu mung" mae" jhui" thug' lo: ra" au:- Moshe re we' Israel byu qere Mao"So pe" kad' byid' lo: ra" khyo ja:khao: ngo" re the' gyo" ra".

²Airumung: yao: wa Moshe nha: to: co' ra" Moshe nho: yham sang myhi" Zippora we' yao" yauggai zo: Gershom we' Eleaza tao re jhui: yang: Moshe jhao" joe" li" ra".

³(Moshe wa- ngo majoe" qu" ra" mung"dan: mae ngo taung bug byu dayaug boe" va"- ga: ta" mung:- yao: wa yauggai zo: dayaug re Gershom ga: mhang" byid' ra".

⁴Yao: wa- nga" pho" nho: Mao"So Egutu kho:kham: yang ngore se' nae" rumae" ngore bao" thaug' yu mung: khyad' yu: ra"- ga: re: ta" mung:- yao: wa yauggai zo: gatau yaug re Elieze ga: mhang" byid' ra".)

⁵Yethro wa Moshe nho: yham sang myhi" we' yao" yauggai zo: tao re jhui: mung:- Moshe thang: na: ra" jo, qo gyang" lho" bam din"pyad' yo khyo joe" ye" ra".

⁶Yethro wa yao: bam li" na: ra" khyo re Moshe re dao: pyang: ke' ra".

⁷Airumung: Moshe wa yao: re yetug: yu nae" qhid' mae" thug' ye" lo" mung:- yao" qhid' kheim: mae ye goe; gyo" yang: yao: re bobaug baug: ra". Yao: shid' ug zo: wa yao: cao: qao" zin" khyo jho" myid: mung:- ai:thao Moshe nho: zaung khyo vao ye" lo" ako".

⁸Israel byu qere khyad' yu nae" qhid' mae" Egutu byu qere we' kho:kham pho" re ASANG pe" kad' lo: ra" khyo ja: khao: ngo" Yethro re Moshe ta" kyo" ra". Moshe wa Israel byu qe khyole; mae thaung" qhug' ko" ra" qug: khai: jham jau we' ASANG yao: bam re khoru: khyad' yu: ra" khyo rere: ta" kyo" ra".

⁹Yethro cekhyo alhab' re the' gyo: lao"- yao: wa bau: mung:-

¹⁰Egutu byu qe we' kho:kham pho" lo, mae" naonhaung" re khyad' yu: ra" ASANG re caung:khin" byid: ge,. Yao" byumyu" re jeim kad' na: rumae" khyad' yu: ra" yaug ASANG re caung:khin" byid: ge,.

¹¹Ana" ASANG wa So alhab' tho' je: qi" qhang yaug ngad: rure ngo ba va". Pe"mung:ga"re yao: wa Egutu byu qeyang Israel byu qe airu" ra" maphug' makhyad' kad' ko" au: yao: ceru: kad' ru ngad: ra"- ga: ta" ra".

¹²Ai: thao Yethro wa phad' ngaui' byid' ra" xeim: we' ASANG re ngaui byid: nae" gatau ngaui" xeim: jham re wa caung:pa" ra" lo, mau" khyo" ai: gyang" lho" ra" zo:ve re zo: nae" qhid' mae" alhab' mo, yao: we' daga" cao" ye" ako".

¹³Thao: ba re Moshe wa mo,byu qe: agaung: mae jho" ta" ngag: ra" khyo jham re dao: phyid' byid' na mung:- yao: wa mug: bo" mae"- mug: cad' sho' mau" laug: na: ra".

¹⁴Yethro wa Moshe pe" kad' ca" rure myao lao"- yao: wa- mo,byu qe: qhid' mae" ce: nao kad' na: ra" khyo wa pe" ru: i? Ai: mau" alhab' re nao dayaug za: mo,byu qere cetau ye; jo, nhao yang:- nao we' jho" qham nae" qhid' mae" ne, kao mae" myi" joe" sho' pe"mung: kad' na: i? ga: myid' ra".

¹⁵Ailao" Moshe wa mo,byu qe Mao"So myid o: rure ngo mae" li" ba: yu genae" qhid' mae" li" na ko" ruyang ngo ce rure kad' qo: ra".

¹⁶Byu shid' yaug jho" ngag nae" mung bo gelao"- yao: shid' yaug wa ngojhao" li" mung:- ngo wa khoyaug lam: jo: rure dao: phyid' byid: mung:- yao: shid' yaug re Mao"So: amyin" dao: jham re we' tarha" jham re ta" kyo: byid' ra"- ga: ta" ra".

¹⁷Ailao" Yethro wa nao ceru: kad' na: ru wa majo ngad: ra".

¹⁸Nao wa nao yao" gaung re we' ce: mo,byu qere myaung: yang: gyoe;- lo" nhao: li" nae". Nao dayaug za: ceru: kad' ru wa ni" qhid' mae" mau" saung" laug: ra".

¹⁹Ana" ngo nao re gai: ra" pha,jhi" daqhae: re byid: li"- Mao"So wa nao we' daga" ngad vashao:- nao wa mo,byu qe: gaung tha" Mao"So: qhid' kheim: khyo yao: bam: khyo re ciye: byid: mung:- yao: bam: nho jho" ta" ngag ra" mung jham re yao: jhao" ci vao ye: byid: nae" ru wa nao: kad' ang: ra" khyo ngad: ra".

²⁰Nao wa Mao"So: amyin" dao: jham re yao: bam re mho" byid: mung:- yao: bam khoru: kao so' daui ang: ra" khyo re we' yao: bam pe" kad' ang: ra" khyo yao: bam re sho' kyo: byid: ang: ra".

²¹Ngadqere: nao wa boe" ra" byu daqhae: re khyin: yu mung:- mo,byu qe: au: jhaung qekhyo" yao: bam re san: to: wa,- Dataung yaug: nho: au: jhaung- dayo: yaug nho: au: jhaung- ngo" xe yaug nho: au: jhaung daxe yaug: nho: au: jhaung- khyo" san: to: wa,- yao: bam wa lam ga" mung: khug vag: mayu: zo" ra" Mao"So re gyaug phug' ra" byu qe ngad qo: ra".

²²Yao: bam wa mo,byu qe: qhid' mae" khonhae: re: malab, lo: tarha" agyi qekhyo"- Caung da" byid: vageshao:- yao: bam wa qug' ra" mung alhab' re nao jhao" qo" cili" ako". Ngadqere: yao: bam wa ngai: ra" jho" ta" ngag: ra" mung alhab' re wa yao: bam yao: qo" ta" phyid' ako". Yao: bam ni" qo re bomyho" vin byid' ra" khyo" yang nao re laui nhao: li" nae".

²³Mao"So: amyin" jham we' dakhyo:- nao ceru: kad' re wa nao wa nao yao" gaung re myaung" gyoe; lo" nhao nae" mangad:- amung: ce: mo,byu qe alhab' wa yao: bam: mung jho" nyang yang: yham khyo qo" lo" li" genae"- ga: ta" ra".

²⁴Moshe wa Yethro nho: pha,jhi" byid: dao: re khae: yu mung:-

²⁵Israel byu qe alhab' mae" boe" ra" mo, re khyin: yu: ra". Yao: wa yao: bam re- dataung yaug- dayo yaug- ngo" xe yaug- daxe yaug: nho: au: jhaung khyo" yao: bam re san: to" ra".

²⁶Yao: bam wa mo,byu qe: qhid' mae" khonhae" re: malab, lo: tarha" agyi qekhyo" caung da" byid' ako". Qug' ra" mung jham re wa Moshe jhao" cili" byid' ako". Ngadqere: ngai: ra" jho" ta" ngag: ra" mung jham re wa yao: bam yao: ta" phyid' byid' ako".

²⁷Ai: thao Moshe wa Yethro re au" ke' mung:- Yethro wa yham khyo tug' phao: lo" ra".