Read Maru PHAO: THUG' 19 Bible Online

PHAO: THUG' 19 - Maru bible

PHAO: THUG' 19

¹Israel byu qe wa Rephidim mae" to" mung:- yao: bam Egutu mung" mae" thug' lo thao lho" sam khye' ein: khye' sao qhid' ba mae yao: bam wa Sina din"pyad' yo khyo joe" ye" ako". Yao: bam wa Sina bam khyid mae thang mung:-

³Moshe wa Mao"So we' ye qhug' nae" qhid' mae" bam dao khyo do, ye" lo" ra". ASANG wa bam dao mae" yao: re khai: yu mung:- Yaku nho: myid:zo: qe ngad ko" ra" Israel byu qere-

⁴Egutu byu qere ngo ASANG pe" kad' lo: rure we'- zeim baung: wa yao: zo: angai re yao" daung dao mae ba; ci ru we' dakhyo:- naonhaung" re ngo khoru: ba yang:- ngoyang cekhyo jhui" lo: rure naonhaung" myao: ako".

⁵Ana" naonhaung" nga" mho dao: re tae" gyo: mung:- nga" dao: thang" re zam" ci genae" ngad: re wa- naonhaung" wa nga" byumyu" ngad: li" genae". Myid gaung geim" wa nga" nho: ngad: ra". Ngadqere: naonhaung" wa khyin: san: to" ra" nga" byumyu"-

⁶Nga" qhid' mae" za: jaung: to" ra" byumyu" ngad: li" nae". Amung: khinjaung qekhyo" naonhaung" wa ngore caung da" byid' li" genae" ein: ta" wa,- ga: yao: re ta" ra".

⁷Airumung: Moshe wa gyo" lo" mung:- byumyu" au: jhaung qere khai: zhang" yu mung:- ASANG yao: re amyin" byid' to" ra" khyo: ja: khao: ngo" yao: bam re ta" kyo" ra".

⁸Ailao" mo,byu qe alhab' wa ASANG ta" ra" gu: ja: khao: ngo" re ngonhaung" kad' nae"- ga: daga" za: phaug' tau" ako". Moshe wa cekhyo re ASANG re lau dao: lo" shid' ra".

⁹ASANG Moshe re- nao we' ngo jho" jhau: ra" nga" thoe re mo,byu qe the' gyo: mung:- ana" mae" thoe gu: yao: bam nao re lam" genae" qhid' mae" ngo wa thau: ra" jham thaui: khug mae nao jhao" li" nae"- ga: ta" ra". Moshe wa mo,byu qe phaug' tau" to: ko" ra" dao: ASANG re lo" ta" kyo" ra".

¹⁰Ailao" ASANG wa yao: re- mo,byu qejhao" gyo" lo" mung:- yao: bam re- caung:pa" khyo kad' nae" qhid' mae" ana" ba we' ne, mo" ba mae yao: yao" gaung re kyang" san: pye' ru kad' yang: na: jo; ge,. Yao: bam wa yao: bam: mai bau: jham cid' san mung:-

¹¹Sao pho" ba jin" jin" seim" to: ca" ako". Ai: ba mae ngo wa Sina bam dao khyo" gyo" li" nae"- ai: mae mo,byu qe alhab' ngore qo" myao: genae".

¹²Mo,byu qe malai: li" genae" qhid' mae" bam lhang" yang: kyo: axam: kad' to: wa,- amung: yao: bam re bam dao khyo malai- mado, ye: genae"- mangad: lao"- aikhyo te' lhao" mate' ye: genae" qhid' mae" ta" wa,- aimae khyid yezab: ra" yaug khag' ngadqere: yao: wa se' pye' ru qhug' ca" ra".

¹³Yao: re laug baui: yang pye' se' mangad: lao"- myo" yang bag: se' qo: ra". Yao: re khag' re: magai: tin: ngad: ra". Ce: ru wa byu qe we' gug'nyhug' jham shid' ja" geim" re kad' ca" ra". Yao: bam re se' pye' ca" ra". Ngadqere: labo" mad: ke' lao" wa mo,byu qe wa bam dao khyo do, ye: ca" ko" ra".

¹⁴Ailao" Moshe wa bam mae" gyo" lo mung:- caung:pa" khyo kad' nae" qhid' mae jin" jin" seim" to: genae" qhid' mae" mo,byu qere lota" ra". Airumung: yao: bam wa yao: bam: mai bau: jham re cid' san: ako".

¹⁵Amung: Moshe wa yao: bam re- sao phao" ba jin" jin" seim" ge,- ai: ayo, gyo: mae gaung sho: dajho" zam" ge,.

¹⁶Sam ba ein: ba: ne, kao re mug: gyug: gyug:- lhe' cad' cad' li" mung:- bam dao mae thaui" ra" jham thaui: thug' li" mung: thoe gyai qi: sho' labo" mad: rure the' gyo" ra". Thang: na: ra" mo,byu qe alhab' wa gyaug: nin" ako".

¹⁷Moshe wa thang: na: ra" jo, qo mae" ASANG we' ye qhug' nae" yao: bam re jhui" thug' lo" mung:- yao: bam wa bam khyid mae ye ye; jo; ako".

¹⁸Sina bam geim" re myikhug' yang nghoe' to" ra". Pe"mung:ga"re ASANG wa myi:khug' mae ai: bam dao khyo" gyo" lo: ra". Myikhug' wa khyeim" mo" myi: mae" myikhug' we' dakhyo: do, lo" mung:- mo,byu qe alhab' wa ko, ko, nin" ako".

¹⁹Labo" thoe wa je je yang: qi" li" ra". Moshe wa dao: jhau mung:- Mao"So wa mug: gyug: we' phaug' tau: byid' ra".

²⁰ASANG wa Sina bam au: khyo joe" gyo" li" mung:- Moshe re bam au: khyo khai: to' yu: ra".

²¹Moshe wa aikhyo do, lo" mung:- ASANG wa yao: re- gyo" lo" mung: mo,byu qere kyo: re malai: phyid' li" genae" qhid' mae" we' ngore maqu" genae" qhid' mae" lo" ta" peim: byid: wa,- yao: bam airu kad' ko" re wa- yao: bam mae" myo: sho' shid: li" genae".

²²Ngo jhao" te' li" nae" ra" khinjaung qe lhao" re: yao: bam yao" gaung re kyang san: pye' ca" ako" mangad: lao" wa- yao: bam re ngo qobo dae byid: nae"- ga: ta" ra".

²³Moshe wa ASANG re- mo,byu qe wa maqo" do, li" genae"- pe"mung:ga"re nao wa ngonhaung" re gyang" lho" ra" bam khyo" myid: jho: to: mung:-ai: lhang" gam: mae kyo: kad' to: nae" qhid' mae" amyin" byid' to" ra"- ga: ta" ra".

²⁴ASANG wa- gyo" lo" mung: Arun re nao we' daga" jhui" do, lo ri:- ngadqere: khinjaung qe we' mo,byu qe wa ngojhao" do, li" nae" qhid' mae" kyo: re magai: lai: do, li" nae"- mangad: re wa- ngo yao: bam re qobo dae byid: nae"- ga: tau" ra".

²⁵Ailao" Moshe wa mo,byu qejhao" gyo" lo" mung:- ASANG ta" ra" dao: re yao: bam re lo" ta" kyo" ra".