Read Maru PHAO: THUG' 2 Bible Online

PHAO: THUG' 2 - Maru bible

PHAO: THUG' 2

¹Ce: ayo, mae Levi kaung mae" byu dayaug wa yao: yao" byumyu" kaung mae" myiqe: dayaug re lo, xo' yu: ra".

²Ai: myiqe: wa yao" qhid' mae" yauggai zo: dayaug khau byid' ra". Ai: myiqe: wa ai: zonau" gyai yaung" rure myao lao"- yao: wa ai: zonau" re lho" sam khye' nyham" to" ra".

³Ngadqere: ai: zoshao: re yao: maqo" nyham" to: lo lao"- yao: wa qid phaung" yang kad' to" ra" gyan dalam: re yu mung:- aire qid mavao nae" qhid' mae" nhai" yang shan" jhid' ra". Yao: wa zonau" re ai: gyan khug mae ke' mung: qid yae mhin: paung" yo mae yeto" to" ra".

⁴Ai: zonau" nho: yao: bai: wa ai: zonau" pe"mung: rure qu" nae" qhid' mae" mataung" va" ra" jo, qo mae ye; jo; ra".

⁵Kho:kham nho: myiqe: zo: wa gaung cid' nae" qhid' mae" qid gyaung: khyo gyo" ye: mung:- yao" daui daui mo, qid yae mae su" na: ako". nyag din taung" yao: wa mhin: paung" mae" gyan re the' myao mung:- ai: rure jeim myhi" dayaug re yu nhao: ke' ra".

⁶Kho:kham nau" wa ai gyan re phung" ke' mung:- yauggai nau" re myao: ra". Ai: zonau" wa ngug: na mung: kho:kham nau" wa yao: re nhag' qu" khyag' ra". Aimung: yao: wa ce wa Hebre zonau" dayaug ngad: ra"- ga: ta" ra".

⁷Ai: thao yao" yao: bai: wa kho:kham nau" re ni" qhid' mae" zonau" re caung byid: nae" Hebre myiqe: dayaug re ngo ye khai byid: nae" i? ga: myid' ra".

⁸Kho:kham nau" wa- Jeju khyo" ye khai: lo ri:- ga: phaug' tau" ra". Airumung: myiqe: nau" wa ai: zonau" yao" yao:myhi" re lo" jhui" lo byid' ra".

⁹Kho:kham nau" wa ai: myiqe: re- Ce: zonau" re jhui" lo" mung: nga" qhid' mae" lo" khau byid: la,- nao re ngo aphug' byid: nae"- ga: ta" ra". Airumung: ai: myiqe: wa zonau" re jhui" yu mung: yao: re khau: ra".

¹⁰Ai: thao re zoshao qi" li" lao"- yao: wa ai: zoshao re yao: zo: khyo" mhang" yu ra". Kho:kham nho: myiqe: zo: jhao" yao: re jhui" ye: byid' ra". Ailao" kho:kham nau" wa- ngo wa yao: re qid mae" xoe: yu: ru ngad mung: Yao: re Moshe ein: mhang" nae"- ga: yao: yao: re ta" ra".

¹¹Moshe qi" li" lao"- yao: wa yao" Hebre byumyu" qejhao" lae" ye: mung: yao: bam mau" jam khoru: deim" zag: kad' nhao: ru qhug' ko" rure yao: the' myao: ra". Yao: wa Egutu byu dayaug yaug Moshe nho: byumyu" qemae" dayaug ngad: ra" Hebre byu dayaug re se' pye' rure lhao" yethe' myao: ra".

¹²Moshe wa lhang" gam: qu" mung: khag' maqu" na: rere the' myao lao"- yao: wa Egutu byu re se' pye' mung: yao" mao gaung re ma coe bam" mae nyham" pye' ra".

¹³Thao: ba re yao: wa dam: tug: ye: mung:- Hebre byu shid' yaug jho" se' na: rure yethe' myao: ra" yao: wa shad' ra" yaug re- Nao wa naoyao" Hebre byin cao: pho" re pe"mung: be, na: i? ga: ta" ra".

¹⁴Ai: yaug wa nao re khag' nga" shid' yaug: nho: zug: we' tarha" agyi kad' to" ra" i? Nao wa Egutu pho" re se' ru we' dakhyo: ngore se' pye' nae" i?- ga: phaug' tau" ra". Ailao" Moshe wa- gyaug mung: ngo kad' ra" khyo re byu jham ba: pye' vaganhaung ga: yao: yao: za: ta" ra".

¹⁵Boe" ra" khyo re kho:kham pho" the' gyo: lao" yao: wa Moshe re se' pye' nae" seim" ra". Ngadqere: Moshe wa phao: lo" mung: Median mung" mae yena: ra". Daba mae Moshe wa qid thaung: dalam: nhae mae zaung: jo; ra".

¹⁶Median khinjaung pho" Yethro nho: myiqe: zo: nhad' yaug wa qid li" khe' yu mung: yao: tao ho' yao: pho" nho: yao jham we' cad' be, jham: qhid' mae" thaung: lhao: jham mae ke' byid' ako".

¹⁷Ngadqere: yao lhaug' mo, damyo" wa Yethro nho: myiqe: zo: qere khe' pye' ako". Ailao" Moshe wa yao: bam re ye khyad' yu mung: yao: bam: gug'nyhug' jham re qid khe' jhaug' byid' ra".

¹⁸Yao: bam wa yao: bam: yao: pho" jhao" dam: tug' lo" gelao"- yao: wa- ana" ba naonhaung" pe"mung: gyai no' tug' loko" ga: myid' ra".

¹⁹Yao: tao ho' wa- Egutu byu dayaug yang yao lhaug' mo; lo, mae" khyad' yu byid: mung: yao: wa ngonhaung" re qid lhao" re: khe' byid: mung:- ngonhaung" nho: gug'nyhug' jham re qid khe' jhaug' ra"- ga: tau" ako".

²⁰Ailao" yao: wa khai mae ngad: ra" naonhaung" pe"mung: yao: re aitau mae nha: to: co' ko" i? Ngonhaung" we' zo: nae" qhid' mae" yao: re yekhai: lo geri:- ga: yao: bam re ta" ra".

²¹Airumung: Moshe wa ai: mae na nae" myid: phyid' ra". Yethro wa yao" myiqe: zo: Zippora re lo, xo' xo' byid: mung:-

²²Zippora wa Moshe re yauggai zo: dayaug khau byid' ra". Moshe wa- ngo wa ce: mung" mae bang" vo dayaug boe" na:- airumung: ngo wa yao: re Gershom ein: mhang" nae"- ga: yao: yao: za: ta" ra".

²³Zin na myo: sho' thao re Egutu kho:kham pho" wa shid: lo" byaug: ra". Ngadqere: Israel byu qe wa yao: bam: jeim doe, na: ra" qao: mae nokyang: kyang" na shi gemung:- Bao" thaug' yu nae" mho' yao: na: ako". Yao: bam: mho' yao: ra" thoe wa- Mao"So jhao" joe" do, lo" mung:-

²⁴Mao"So wa yao: bam: nokyang: thoe re gyo: byid: mung: Abraham- Isag- Yaku we' to" ra" yao" dao: thang" re myid: beim: byid' ra".

²⁵Yao: wa jeim doe; na: ra" Israel byu qere the' myao mung: yao bam: qhid' mae" sang: bono: ra".