Read Maru PHAO: THUG' 21 Bible Online

PHAO: THUG' 21 - Maru bible

PHAO: THUG' 21

¹Israel byu qere o mae" tarha" jham re byid: wa,-

²Nao wa Hebre jeim dayaug re vai: yu: re- yao: wa ni" qhid' mae" khyaug' zin mau" zaui: byid: nae" ngad: ra". Nhad' zin: ein: zin re yao: wa pe" aphug' mabyid: lo: nhao: ke' ru qhug' ca" ra".

³Yao: wa ni" jeim boe" lo: au:- yao: wa myi: mayu shi" ru ngad: re- yao: thug' lo" ra" au: re yao: wa yham sang myhi" re magai: jhui" lo" ngad: ra". Ngadqere: yao: wa ni" jeim boe" lo: au: myi yu va" yaug ngad: re wa yao: we' daga" yao" yham sang myhi" re gai jhui" lo" ra".

⁴Yao" jeim sang wa yao: re yham sang myhi" yu byid: mung: yao: wa yao" qhid' mae" yauggai zo:- myiqe: zo:khau byid: yang: ngad: re- ai myiqe we' yao" zoshao qe wa jeim: nho: ngad: ra". Aimung: ai: jeim pho" wa yao: za: thug' lo" ca" ra".

⁵Ngadqere: ai: jeim pho" wa yao" jeim sang- yao" yham sang myhi"- yao" zoshao qere jhid'de; mung: yao: wa jeim mae" manug: loe; beim ga: ta" re wa-

⁶Yao" jeim sang wa yao: re caung:pa" ra" jo, qo khyo jhui" ye: nae" ngad: ra". Aimae yao: re kham: zang we' tau" te' mae- mangad: lao"- kham: baung zang we' tau" te' mae ye; jo, nhao mung:- yao" no: re thung: byid: ca" ra". Ailao" ai: jeim pho" wa dapyad yao" jeim ngad: li" nae".

⁷Byu dayaug wa yao" myiqe: zo: re jeim khyo" aung" pye' re- yao: re yauggai jeim qere we' dakhyo:- magai: lhoe' ke' ngad: ra".

⁸Myiqe: nau" wa yao: re yham sang myhi" kad' nae" seim" yang: vai: yu qhug' mung:- ai: yauggai wa yao: re ma o ngad: re ai: myiqe: nau" re yao: pho" re dam: tug' aung: byid: ca" ra". Yao" jeim sang wa yao: re taung bug byu qere magai: aung: zo: ngad: ra". Pe"mung:ga"re yao: airu kad' ru wa ai: myiqe: nau" re tarha" manyang: ra" khyo" kad' ru ngad: ra".

⁹Byu dayaug wa yao: zo: re byid: nae" jeim myhi" dayaug re vai: yu: ngad: re- yao: wa ai: jeim myhi" re yao" myiqe: zo: re we' dakhyo: kad' qo: ra".

¹⁰Byu dayaug wa myingai yu: ngad: re- yao: wa yao" myiqhid' yaug re qhid' phyao: yao: qo" ra" zo:ve- mai bau: akho: akhang" jham azhao: mae" nho" xo' yang: byid: qo: ra".

¹¹Yao: wa yao" myiqhid' re ce: qo jham re makad' byid: ngad: re wa yao: wa ai: myiqe: re pe" aphug' re: mayu lo: lhoe' ke' ca" ra".

¹²Byu dayaug re dae te' mung: se' pye' ra" yaug khag' ngadqere: yao: wa se' pye' ru qhug' ca" ra".

¹³Ngadqere: airu wa yao: re se' nae" thaug kad' ru mangad: re wa yao: wa naonhaung" qhid' mae" ngo khyin: to: byid' ra" jo, qo khyo qo" phao: loe; ye" ra". Ai: jo, qo mae yao: wa gug:gam: li" nae".

¹⁴Ngadqere: byu dayaug wa nhag' yo: mung:- byu dayaug re thaug kad' yang: se' pye' ngad: re- yao: wa nga" phan khyo yephao: khug: na sho' ngadqere: yao: wa se' pye' ru qhug' ca" ra".

¹⁵Yao: myhi" we' yao: pho" tao re dae te' ra" yaug khag' ngadqere: se' pye' ru qhug' ca" ra".

¹⁶Byu re khug' ra" yaug mangad: lao" yao: re aung: zo" ra" yaug- jeim khyo" yao: re zam" ci: ra" yaug khag' ngadqere: se' pye' ru qhug' ca" ra".

¹⁷Yao: myhi" we' yao: pho" tao re nhang" ra" yaug khag' ngadqere: se' pye' ru qhug' ca" ra".

¹⁸Jho" byo; mung: byu dayaug wa laug baui: yang- mangad: lao"- yao" lo, zhab' yang gatau dayaug re dae te' ngadqere: mashid ngad: re wa yao: wa qobo dae byid' ru magai: qhug' ngad: ra". Dae de; qhug' ra" yaug wa yab jaung: dao mae na: jo, ca" ngadqere: thao re qo" to" li" mung: zaung: bao" yang thaug' yang: taung gaung khyo qo" su" thug' ye" re wa- yao: re dae te' ra" yaug wa ai: dae de, yaug: okaung gyo phug' re byid: mung: yao: gai: li" sho' gun caung byid: qo: ra".

²⁰Byu dayaug wa thao: khyaung" yang yao" jeim pho"- mangad: lao"- jeim myhi" re be, mung:- jeim wa aimae yao: shid: ngad: re- ai: jeim sang wa qobo dae byid' ru qhug' ca" ra".

²¹Ngadqere: ai: jeim wa daba- mangad: lao"- shid' ba mae mashid ngad: re wa- ai: jeim sang wa qobo dae byid' ru magai: qhug' ngad: ra". Yao" nho: jo,nho" seim" lo" ra" qobo dae wa ai qhid' mae" ga" va" ra".

²²Byu daqhae: jho" byo; mung:- gaung la" ra" myiqe: re yao" zoshao qeim sho' yao: re no nhao ngadqere:- gatau: dae made; ngad: re wa- ai: myiqe: re no nhao: ra" yauggai wa yao" yham sang pho" mho' ra" nho" vag: khyug' byid: ca" mung:- Tarha" agyi qe: myid vang" jao dang byid' re kham: yu qo: ra".

²³Ngadqere: ai: myiqe: dae de; ngad: re wa- qobo dae wa kao so' qhid' mae" kao so'-

²⁴Myo, qhid' mae" myo,- zaui qhid' mae" zaui- lo, qhid' mae" lo,- khyid qhid' mae" khyid-

²⁵Myi: phad' ru qhid' mae" myi phad' ru- dae qhid' mae" dae- thaung" khyad' ru qhid' mae" thaung" khyad' ru- byid: qo: li" nae".

²⁶Byu dayaug wa yao" jeim pho"- mangad: lao" jeim myhi" nho: myo, jid' re the' be, mung:- myo, jid' dad: thug' lo" byaug: ngad: re- yao: re myo, jid' aphug' byid' ra" khyo"- jeim mae" lhoe' ke' ca" ra".

²⁷Yao: wa zaui dakhe' re thaung" phad' pye' byid' yang: ngad: re- zaui aphug' byid' ra" khyo"- yao: re lhoe' ke' ca" ra".

²⁸Nung: jaung lo: dadau: wa byu dayaug yaug re thaung" se' pye' ngad: re airu re laug baui: yang pye' se' pye' ca" ra". Yao" sho: re magai: zo: ngad: ra". Ngadqere: nung: sang yaug re wa qobo dae magai: byid: ngad: ra".

²⁹Ngadqere: ai: nung:jaung lo: wa byu re lhaung" khe' thaung" qu" ra" akyang bo mung:- nung: sang rere: ta" peim" qu" ngadqere: aire mataui" zam: yang:- ai nung" yang byu dayaug yaug re thaung" se' pye' yang: ngad: re ai: nung: re laug baui: yang: pye' se' pye' ca" ra". Ai: nung: sang rere: se' pye' ca" ra".

³⁰Ngadqere: nung: sang wa yao" kao so' re khyad' yu nae: akhang" qo" ngad: re wa- qo: ra" gu: byang" sho' ngaui byid: ca" ra".

³¹Nung: jaung lo: wa- yauggai nau"- mangad: lao"- myiqe: nau" dayaug yaug re thaung" se' pye' ngad: re- tarha" re dakhyo: za: ci qo: ra".

³²Nung: jaung lo: wa jeim pho"- mangad: lao"- jeim myhi" re thaung" se' ngad: re- nung: sang wa jeim sang re ngaui thang: the: sam xe khyug' qo: ra". Nung: jaung lo: re wa laug baui: yang: pye' se' pye' ca" ra".

³³Byu dayaug wa dungkhung: anghoe' re yu: pye'- mangad: lao"- yao: wa dungkhung: dalam: dau: mung manghoe' yang:- nung: jaung lo:- mangad: lao"- loze dadau: ai: khyo gyo" vao lo" ngad: re-

³⁴Yao: wa ai: gug'nyhug' qhid' mae" aphug' khyug' ca" ra". Yao: wa gug'nyhug' sang re ngaui khyug' mung:- ai: gug'nyhug' mao re gai: sang: yu ra".

³⁵Byu dayaug: nho: nung: jaung lo: wa- gatau dayaug: nho: nung: jaung lo: re thaung" se' pye' ngad: re- yao: shid' yaug wa daui: ra" nung jaung lo: re aung" pye' mung: ngaui re jho" gae: yu genae" ngad: ra". Yao: shid' yaug wa ai: gug'nyhug' shid sho: rere: jho" gae: yu genae" ngad: ra".

³⁶Ngadqere: ai: nung:jaung lo: wa lhaung" thaung" qu" ra" akyang de; rure ba mung:- nung: sang wa aire mataui" zam: yang: ngad: re aiyaug wa daui: ra" dau: yao: re xe' byid: qo: ra". Ngadqere: yao: wa shid: ra" dau: re sang: yu nae" ngad: ra".