Read Maru PHAO: THUG' 23 Bible Online

PHAO: THUG' 23 - Maru bible

PHAO: THUG' 23

¹Madang: ra" lau dao: re dahau: wa- madangman" ra" khyo" sagse: kham byid: yang: qobo qo" yaug re dabao" dathaug' byid:-

²Yao: bam shad' ra" khyo" kad' ko" au:- byu laug: ra" shad' khyo dabo cao" mangad: lao"- tarha" din: vang" ra" khyo re nghung" lo" nhao: ra" khyo" yao: bam sagse kham byid: ko" au:- byu laug: ra" shad' khyo dabocao"-

³Myaung sho: yang re dao: kho' rumae yao" bo: dabode,-

⁴Ni" nho: gyevo pho" nho: nung:- mangad: lao"- loze khyonghung: nghung" rure nao myao: ngad: re- yao: jhao" jhui" tug' lo byid: ca" ra".

⁵Yao" nho: loze qo: yang nhai" to" rure nao myao: ngad: re- ai: loze re qo" to" ye; sho' bao" thaug' byid: wa,- aimae" dasu" lai: lo"-

⁶Myaung sho: yaug tarha" yung" mae thug' li" ra" au:- ai: myaung sho: yaug qhid' mae" tarha" din: vang" ra" khyo re daha: pye'-

⁷Majo: ra" khyo" qobo dazhaug'- qobo maqo" yaug re dase'- pe"mung:ga"re ngo wa airu" ra" makhyang" ra" mau" kad' yaug khag' re ngadqere: dao: phyid' nae".

⁸Khug vag: re dakhae: yu- pe"mung:ga"re khug vag: wa byu re jo: ra" khyo mae myo, jid nhao mung: qobo maqo" ra" mo, re byo; qeim" lo" nhao: ra" khyo ngad: ra".

⁹Taung bug byu re mangad mangung: dakad' taung bug byu ngad yaug khoru: kham zo: nae" khyo re naonhaung" ba: ako". Pe"mung:ga"re naonhaung" wa Egutu mung" mae taung bug byu qe ngad: lai: lo: ako".

¹⁰Khyaug' zin: geim" ni" nho: mug: myid mae qhovo: qho: mung:- aijham re yad: yu wa,-

¹¹Ngadqere: nhad' zin ein: zin re wa ai mug: myid re thang nhao wa,- ai: mug: myid mae yaug ja: pe" rere: dayad yu- myaung sho" ra" mo, wa ai: mug myid mae yaug ra" gu: re yad zo: vageshao:- seyo: gug'nyhug' jham wa tang" to" rure gai: zo" ako". Naonhaung" nho: sabyi khyae we' zhanlun shi: gae jham rere: ai we' dakhyo: za: kad' ge,.

¹²Dalaban mae khyaug' ba mau" zaui: ge,. Ngadqere: naonhaung" jeim qe- naonhaung" qhid' mae" mau" zaui: byid' ra" taung bug byu qe we' naonhaung" gug'nyhug' jham lhao" re: qo" thang: na geshao:- nhad' ba ein: ba re wa mau" dazaui: ge,.

¹³Naonhaung" re ASANG ngo ta" to" ru ja: khao: ngo" re tae" gyo: ge,- gatau: so qere akyu" damho' ge,. Yao: bam: mang jham re lhao" re: data" ge,.

¹⁴Ngo re nga: yhe' byid: nae" dazin re poe sam lam: kad' ge,.

¹⁵Naonhaung" Egutu mung" mae" thug' lo: ra" lho" khye' ngad: ra" Abib lho" khye' mae- naonhaung" re ngo amyin" byid' to" ra" khyo" Man" make' Mug Poe re kad' ge,. Ce: poe nhad' ba gyo: mae man" ke' yang: kad' ra" mug dajhid' re: dazo: ge,- xeim: maci lo: ngore caung:pa" byid: nae" khonhae" re: dali" ge,.

¹⁶Naonhaung" nho: gaug zo maui: lam jham re yad: qhid: ra" au:- gaug yad poe kad' ge,. Naonhaung" nho: sabyi khyae jham mae" sabyi shi we' shi: khyae jham mae" shi: jham re phyo' zhang: yu: au:- xaung thug' so' mae Zaung Poe kad' ge,.

¹⁷Zin khao: ngo" ce: poe sam lam mae naonhaung" yauggai qe alhab' wa naonhaung" Mao"So ASANG ngore caung:pa" byid: nae" qhid' mae" ngojhao" li" ca" ako".

¹⁸Naonhaung" wa gug'nyhug' xeim: re ngaui" byid' au:- man" ke' yang kad' to" ra" mug we' daga" daqhaug' byid: ge,- ce: poe gyo: mae ngore ngaui" byid' ra" gug'nyhug' xau re thao: ba ne, kao joe" sho' datang" to: ge,-

¹⁹Zin khao: ngo" nao yad: yu: ra" sao qhid' mhang" ra" gaug zo maui: lam re ni" nho: Mao"So ASANG: yham khyo ciye: byid: wa,- Yao nau" mangad: lao"- cad' be, nau" re yao: myhi" nho: nug' we' dabokyug'-

²⁰Nao gyaung: su" au: nao re gug' gam byid: mung:- ngo nyhang" jaung: to" ra" jo, qo khyo nao re jhui" ye: nae" qhid' mae" ni" qhid' au: mae mug: lagyo: dayaug re ngo nhao: ke' nae".

²¹Yao" dao: re gelho: tae" gyo: mung: phug' cao" wa,- yao: re gye kad' yang geim lau dakad'- pe"mung:ga"re yao: re ngoyang nhao: to" ru ngad: ruyang yao: wa airu" ra" geim lau kad' rure qobo khyad' byid: nae" mangad:-

²²Ngadqere: nao wa yao" nho dao: re tae" gyo: mung:- ngo amyin" byid' to" ra" gu: ja: khao: ngo" re kad' ngad: re wa ngo wa ni" nho: gyevo qe alhab' re gye kad' yang: gye bokhe' byid: nae".

²³Nga" mug: lagyo: wa ni" qhid' au: khyo ye" lo" mung:- nao re Amori- Hiti- Perizi- Khanan- Hivi- Yebusi- byu qe: mug: khyo jhui" ye" li" nae". Ngo wa yao: bam re phyo' qheim" pye' nae".

²⁴Yao: bam: so jham re dagoe; pa" mangad: lao"- dacaung:pa" byid:- yao: bam nho: caung:pa" thung" we' sin" ra" lo, mau" jham re dacao" kad'- yao: bam: so jham re phyo' qheim" pye' mung: yao: bam nho: gyang" lho" ra" laug zang baung: jham re adau dau kad' pye' ge,.

²⁵Naonhaung" Mao"So ASANG ngore naonhaung" caung:pa" ko" ngad: re- ngo wa naonhaung" re zo:ve we' qid shaman" byid: mung: naonhaung" no phyo: alhab' re yu: pye' byid: nae".

²⁶Naonhaung" mung"dan: mae myiqe: dayaug re: zo: mavin: shoe' khyo" nae"- mangad: lao" zo: dau maqo" ru mana nae". Ngo wa naonhaung" re kao qhang nhao nae".

²⁷Naonhaung" re gye kad' ra" byumyu" re ngore gyaug nhao nae". Ngo wa naonhaung" gye kad' yang: lhe" ra" byumyu" qe: phaung mae atug' akhyug boe" nhao nae". Amung: ngo wa naonhaung" gyevo qe alhab' re nhaung thao" phaug' nhao mung:- naonhaung" mae" phao: lo" nhao nae".

²⁸Ngo wa naonhaung" gyevo qere byodin byosho: khyo pye' zaui: pye' nae". Naonhaung" qhid' khyo ce" ye" lo" au:- ngo wa Hivi byu- Khanan byu- Hiti byu qere aimae" khe' thug' ke' nae".

²⁹Ngo wa yao: bam re dazin khug mae za: khe' thug' ke' nae" mangad:- ngo airu: kad' re mung"dan: wa cae: jhug tag boe" lo" mung: naonhaung" qhid' mae" seyo: gug'nyhug' lhe: jham saung" laug: li" nae".

³⁰Ai: atha"- ai: mug: myid re naonhaung" ga" laug: nho" qo" sang: yu gesho' ngo wa yao: bam re zo" zo" mae" khe' thug' pye' nae".

³¹Naonhaung" mung"dan: mug: kyo: re- Tham: Ne mae"- Mug:gaung: panglai: joe" sho'- din"pyad' yo mae" Uphrad gyaung: joe" sho' ce: byid: nae". Aimung" mae na: ra" byu qe: dao mae aung: pye' ra" qam so' ngo naonhaung" re byid: nae" naonhaung" jhin" ye" lo" au:- naonhaung" wa yao: bam re khe' thug' pye' li" genae".

³²Naonhaung" wa yao: bam we' mangad: lao"- yao: bam nho: so jham we' myid vang" khyo dato: ge,.

³³Naonhaung" mung"dan: mae ai: byumyu" qere dana nhao ge,- naonhaung" airu: na nhao ko" ngad: re- yao: bam wa naonhaung" re ngore shad' ra" qobo kad' nhao li" genae". Yao: bam so jham re naonhaung" caung:pa" ko" re airu wa naonhaung" qhid' mae" myi" shid nae" lha" ngad: li" nae".