Read Maru PHAO: THUG' 26 Bible Online

PHAO: THUG' 26 - Maru bible

PHAO: THUG' 26

¹Nga" qhid' kheim: mae" gyang" lho" ra" zaung akhug shad' re gai: ra" jid: mo" we' qo; to" ra" pin: mhai: nyhug amo, we' sug' gug ne daxe dau" yang kad' wa,- aijham re kherubin alho boe" sho' nag wa,-

²Pin: dau dadau re qhang phyao: shid' xe: she' daung"- lu phyao: byid daung" daung" mung: dakhyo: za: kad' wa,-

³Pin: ngo" dau khyo" khyab' xo' te' mung:- gatau ngo" dau rere: ai we' dakhyo: kad' wa,-

⁴Zam" khao: ngo" taung gaung shad' mae" mhai: nyhug pin: dau athao re akheim" te' wa,-

⁵Sao qhid' zam" mae" sao qhid' pin: dau re akheim" ngo" xe te' wa,- shid' zam" ein: zam" mae" lo" thao" pin: dau re sao qhid' mae" azam" mae" akheim" we' jho" zhaung: yang: akheim" ngo" xe te' wa,-

⁶Ai: pin: shid' zam" re dakhye' za: jho" xo' nae" ra" qhang nghoe: ngo" xe kad' wa,-

⁷Ai: Zaung mhao: mug: re cad' be, mug' yang qo; ra" mai daxe: dakhye' kad' wa,.

⁸Aijham alhab' re qhang phyao: sam xe daung"- lu phyao: byid daung" daqi" daqang" za: kad' wa,.

⁹Ngo" dau re dazam" khyo" khyab' xo' mung:- gatau khyaug' dau gu: re wa dazam" khyo" khyab' xo' wa,- ai: khyaug' dau ein: dau re wa shid' pyae kan mung: Zaung qhid' au: shad' tho' mae nghoe' to: wa,.

¹⁰Dazam" mae" lo" thao" dau athao mae akheim" ngo" xe te' mung:- gatau dazam" athao mae re: akheim" ngo" xe te' wa,.

¹¹Gyid: bo" nghoe: ngo" xe kad' mung:- mhao: mug: dakhye' ru: za: ngad sho' akheim" jham: akhug khyo ke' mung: xo' to: wa,.

¹²Jamu nhaung thao" shad' tho' mae adau agaung daqi" ajan" dadau lhao" to: wa,. Qhang phyao: shad' khao: ngo" mae aje dadaung" daung" ze: ru wa ai: Zaung ayae shad' mae lhao" to: nae" qhid' mae" ngad: ra".

¹³Qhang phyao: shad' khao: ngo" mae aje dadaung" daung" ze: ru wa ai: Zaung re mug: nae" qhid' mae" ayae mae lhao" to: zai ngad: ra".

¹⁴Taung gaung shad' mhao: mug: khyo" mug: nae" qhid' mae" mhaug' ne: yang xug' to" ra" yao lo: qid dakhye'- sho qid gai dakhye'- mhao: mug: shid' khye' kad' shi: wa,.

¹⁵Ai: Zaung qae nae" qhid' mae" vobaung jham re- qhoje; sag' yang kad' wa,.

¹⁶Ai: sag' khao: wa qhang phyao: daxe daung" lu phyao:- dadaung" dathu ngad qo: ra".

¹⁷Sag' khao: pye: khao: ngo" re davang" qo" gai: jho" xo' sho' zang thaug' shid' lam: lam: te' ca" ra". Airu:- sag' khao: alhab' mae ai: zang thaug' jham de, ca" ra".

¹⁸Mug: thao shad' qhid' mae" sag' khao: shid' xe khao:-

¹⁹Athai: nhae: nae" qhid' mae" ngaui zang pan byid xe sheim" yu mung:- sag' khao: dakhao: re zaui" ci nae" zang thaug' shid' lam" qhid' mae" ngaui zang pan shid' lam: lam: kad' wa,-

²⁰Zaung mug: am: shad' mae sag' khao: shid' xe khyaung:-

²¹Sag' khao: khyaung: khao: ngo" qhid' mae" she' lam: lam:- ngaui zang pan byid xe kad' wa,-

²²Zaung nhaung thao" shad' ba vao shad' qhid' mae" sag' khao: khyaug' khao: we'-

²³Akhyug qhid' mae" shid' khao: kad' wa,-

²⁴Ai: akhyug mae" sag khao: shid' khao: re athai: mae jho" xo' mung: aau: joe" sho' jho" xo' to: qo: ra". Ceru: ai: sag' khao: shid' khao" yang akhyug shid' khyug kad' yu nae" ngad: ra".

²⁵Airumung:- sag' khao: she' khao: we' sag' khao: dakhyaung" qhid' mae" shid' lam: lam: ngaui zang pan daxe: khyaug' lam: ngad: li" nae".

²⁶Qhoje: sag' yang akyao" sag' yao: daxe: ngo" khyaung: kad' wa,- Zaung dashad' sag' khao: qhid' mae" ngo" khyaung:-

²⁷Gatau dashad' qhid' mae" ngo" khyaung:- zaung nhaung thao" shad'- ba vao shad' qhid' mae" ngo" khyaung: kad' wa,.

²⁸Agaung: mae" akyao" khyaung: wa akhyug ang ang Zaung jao: sho' sho' ru ngad ca" ra".

²⁹Sag' khao: jham re qhang: yang thab' pye' mung:- akyao" jhoe" zaui nae" qhid' mae" qhang kheim" lo, zaui: te' wa,- ai: akyao" rere: qhang: yang thab' pye' wa,-

³⁰Bam dao mae nao re ngo qhu" byid' rure cao" yang: ai: Zaung re kad' wa,-

³¹Mhai: nyhug mung: ra" khyang- amo, mo, mung: ra" khyang- sug' gug khyang ne: yang qo, mung: kherubin: alho thug' nag: shaung: te' to" ra" jid: mo" pin: gai akyo- pin lung: kad' wa,-

³²Ngaui zang pan byid lam: mae zhaung: to" ra" qhang: yang thab' pye' mung:- qhang anghoe: te' to" ra" qhoje; sag'- zang byid zang mae lhao" to: wa,-

³³Ai: qe, kyo pin: lung: re- Zaung mhao: mug: mae" anghoe: jham: nho: aqao: jin mae te' mung:- ai: qe, kyo pin: lung: nhaung thao" shad' mae laug pye: shid' khye' ke' to" ra" Dao: Thang" Ban" re to" to: wa,- qe, kyo pin: lung: wa Gyang" Lho" Jo, Qo mae" Gyang" Lho" Thao" Jo, Qo re kyo: to" li" nae".

³⁴Dao: Thang" Ban" mae apyid' pyid' to: wa,.

³⁵Gyang" Lho" Thao" Jo,qo taung gaung shad' Zaung mug: am: shad' we' tau" te' mae saboe" dalam: to: mung:- mug: thao shad' we' tau" te' mae myikaug' tao" to: wa,.

³⁶Zaung kham: nhad' qhid' mae" mhai: nyhug- amo, sug' gug ne we' qo; to" ra" jid: mo" pin: gai we' nag: shaung: to" ra" qe, kyo pin: lung: re kad' wa,-

³⁷Ce: qe, kyo pin: lung: lhao: nae" qhid' mae" qhoje; sag' zang ngo" zang re qhang: yang thab' mung:- aire qhang anghoe: jham te' wa,- ai: zang: jham: qhid' mae" gyid: bo" zang pan ngo" lam: kad' wa,.