Read Maru PHAO: THUG' 28 Bible Online

PHAO: THUG' 28 - Maru bible

PHAO: THUG' 28

¹Ni" mao: Arun we' yao" yauggai zo: qe ngad ko" ra" Nadab- Abihu- Eleaza- Ithama- bam re khai: zhang" yu wa,- yao: bam wa khinjaung qekhyo" ngore caung da" byid vageshao:- Israel byu qe mae" kho' to: wa,.

²0Ave, angau: we' yaung" nae" qhid' mae" ni" mao: Arun qhid' mae" khinjaung bau: qhang jham khyab' wa,.

³Ngo yang lo, mau" zaui: qam: byid' to" ra" lo, mau" zaui: mo, re khai: yu mung:- nga" mau" zo" mae khinjaung khyo" yao: qo" qhaug' byid: shao:- Arun nho: mai bau: khyab' genae" qhid' mae" yao: bam re ta" wa,.

⁴Yao: bam re- qao gao nghoe' bau:- bau: lo, kao:- bau: qhang- thug' nag: shaung: to" ra" bau:- au: thab'- phyid' cui: jham re khyab genae" qhid' mae" ta" wa,. Yao: bam wa khinjaung qekhyo" ngore caung da" byid geshao:- ai: lo, mau" zaui: mo, wa ni" mao: Arun we' yao" yauggai zo: qe: qhid' mae" ce: khinjaung bau: qhang jham re khyab' shaung ca" ako".

⁵Yao: bam wa ai: mai bau: khyab' shaung: rumae- mhai: nyhug khyang- khyang amo, sug' gug khyang ne- qhang khyang we' jid: mo" pin: gai jham re ci genae" ngad: ra".

⁶Yao: bam wa bau: lo, kao: re mhai: nyhug khyang- khyang amo,- sug' gug khyang ne- mug: nyhug qhang khyang we' jid: mo" pin: gai yang thug' nag: shaung: khyab' nae" ngad: ra".

⁷Bau: lo, kao: re xo' nae" qhid' mae" taui: shid' khe' ngad mung: dashad' mae" dashad' re te' nae" ngad: ra".

⁸Ai: khyang jham: yang yao: nyang" qo; to" ra" phyid' cui: re ai: bau: lo, kao: mae te' qo: ra". Airulao" dasho: za: ngad nae" ngad: ra".

⁹U nug- laug shid' baui re yu mung:- Yaku nho: yauggai zo: daxe: shid' yaug: nho: mang jham re apyad khyo" cao" yang:- dapye: mae mang khyaug' lam: lam: kyaung" te' wa,.

¹¹Laug ba: kyaung" ra" yaug: yang ai: laug shid' baui mae Yaku nho: yauggai zo: qe: mang jham re kyaung" te' mung:- ai: laug shid' baui re qhang kham" akhyao khug mae te' wa,.

¹²Israel byumyu" kaung daxe: shid' kaung re gaung tha" ngad nae" qhid' mae" ai: laug baui shid' baui re bau: lo, kao: lo, sin taui: jham mae taui" te' wa,. Ceru:- Arun wa yao: bam mang jham re yao" lo, sin mae vin: cili" nae"- airulao" ASANG ngo wa khonhae" re: nga" byumyu" re myid: beim" li" nae".

¹³Qhang kham" akhyao shid' lam: kad' wa.

¹⁴Taui we' dakhyo: nag: to" ra" Qhang gyang" jao co: shid' khe' yang: qhang kham" akhyao mae te' to: wa,.

¹⁵Mao"So myid o: ra" khyo re myid: phyid' rumae ci nae" qhid' mae" Khinjaung Yin" qhid' mae" qao nghoe' pye: dalam: kad' wa,- airu re bau: lo, kao: re khyab' ra" khyang- pin: jham re ci mung:- bau: lo, kao: khyab' ru we' dakhyo:- thug' nag: shaung: khyab' wa,.

¹⁶Aiwa byid khyug daqi" qi" ngad mung:- shid' kan kan paug' to: ca" ra". Qhang phyao: dathu- lu phyao: dathu bo: ru ngad ca" ra".

¹⁷Ai: mae phug' de; ra" laug sin" byid jin te' wa,- sao qhid' jin mae Patamya laug sin"- Utaphya laug sin"- Mya laug sin" te' wa,-

¹⁸Shid' jin ein: jin mae laug ne- Nila- Sein laug sin" jham te' wa,-

¹⁹Sam jin ein: jin mae vakintu- mahoya laug sin"- gomug laug sin" jham te' wa,-

²⁰Byid jin ein: jin mae wa myed yoe- gomug- nagatoe laug sin" jham te' wa,- cejham: re qhang kham" akhyao khug mae te' wa,-

²¹Israel byumyu" kaung jham re gaung tha" ngad nae" qhid' mae"- ai: laug sin" daxe: shid' ce'- khao: ngo" mae dace' mae Yaku nho: yauggai zo: dayaug: mang kyaung" te' ca" ra".

²²Qao nghoe' pye: qhid' mae" wa taui: we' dakhyo: sham" to" ra" qhang gyang" taui: jham kad' ca" ra".

²³Qhang kheim" shid' lam: kad' mung:- qao nghoe' tho' mae" akhyug khyug mae aire te' wa,-

²⁴Airumung: qhang taui: shid' khe' re ai: qhang kheim" shid' lam: mae taui: wa,-

²⁵Taui: athao re wa qhang kham" akhyao shid' lam: mae taui: wa,- ceru:- bau: lo, kao: qhid' au: mae" lo, sin taui: thao mae taui" te' nae" ngad: ra".

²⁶Ai: thao qhang kheim" shid' lam: kad' mung:- bau: lo, kao: khyo lo" thao" ra" qao nghoe' pye" nho: o: pyae akhyug khyug mae te' wa,-

²⁷Qhang kheim" gatau shid' kheim" re dam: kad' mung:- bau: lo, kao: qhid' kheim: shad' lo, sin taui: o: dau- gyai yaung" sho' qo; to" ra" phyid' cui: tho' mae we' khyab' khyo: nhae mae dashad' dakheim" taui" te' wa,-

²⁸Qao nghoe' pye: wa phyid' cui: atho' mae de; jo; mung: bau: lo, kao: we' gatau tau maboe" shao:- qao nghoe' pye: mae" akheim" we' bau: lo, kao: mae" akheim" re nyug: ra" taui: dakhe' yang taui mung: jho" xo' to: wa,-

²⁹Gyang" lho" jo, qo khyo Arun vao ye: lao"- Israel byumyu" akaung jham: mang jham re tung" te' to" ra" ce: qao nghoe' pye: re ve, ca" li" nae". Airulao"- ngo ASANG wa nga" byumyu" qere khonhae" re: myid: beim: nae".

³⁰Ai: qao nghoe' pye: mae Urim we' Thummim te' wa,- airulao"- nga" gyang" lho" qhid' kheim: khyo Arun vao li" ra" au:- yao: wa aire cili" nae" ngad: ra". Israel byumyu" qhid' mae" nga" myid o: ra" khyo re yao: qo" myid: phyid' nae" qhid' mae" airu" ra" ayo, mae khonhae" re: Arun wa ce: qao nghoe' re ve, ca" ra".

³¹Bau: lo, kao: khug mae" bau: qhang wa khye' geim" nyug ra" sug' gug khyang: yang qo, ca" ra".

³²Au: lam: qhid' mae" adung: dadung: bo ca" ra". Majad nae" qhid' mae" qo; to" ra" pin" yang adung: lhang" gam: ce' to: nae" ngad: ra".

³³Ai: bau: qhang khyid dau athao lhang" gam: mae khyang anyug mung: ra" khyang- khyang mo, sug' gug khyang ne jham yang khaung: shi: ce' jham kad' te' mung: dace' kyo yang: qhang jhu jham re kad' te' wa,-

³⁵Arun wa khinjaung khyo" caung da" byid' ra" au:- yao: wa ce: bau: qhang ve nae" ngad: ra". Yao: wa nga" gyang" lho" jo, qo nga" qhid' kheim: khyo vao li" ra" au:- mangad: lao"- yao: aimae" thug' lo" au:- jhu jham: thoe re the' gyo" li"nae"- airumung: yao: wa se' pye' ru maqhug' nae".

³⁶Qhang gyang" yang shaung pye' ra" qhang pye: kad' mung: aimae ASANG re qhaug' byid' ra" zai ein: tung" te' wa,-

³⁷Mhai:nyhug mung: ra" taui" yang au: thab' qhid' kheim: shad' mae taui" te' wa,-

³⁸Arun wa aire yao" nga: lao: mae zhaung" ci nae" ngad: ra". Airulao"- ASANG ngo wa- Israel byu qe ngore qhaug' byid: ko" ra" xeim: alhab' re khae: yu nae". Mo,byu qe xeim: jham byid' rumae qobo, dajhid' dathao shad' lhoe" gesho' ngadqere: ngo khae: yu nae".

³⁹Arun nho: bau: we' au: thab' re jid: mo" khyang gai: yang qo, mung:- phyid' cui: rere: thug' nag: shaung byid: wa,-

⁴⁰Yao: bam re ngau: bo mung: yaung" nhao nae" qhid' mae"- Arun nho: yauggai zo: qe: qhid' mae"- bau: jham- phyid' cui: jham- maug kyab' jham qo, byid: wa,-

⁴¹Ai: mai bau: jham re ni" mao: Arun we' yao" yauggai zo: qere vhe' wa,- aimung: yao: bam wa khinjaung qekhyo" ngore qo" caung da" byid: genae" qhid' mae" yao: bam re zhanlun xau vhe' gyad byid: yang:- lo, kai: byid: mung: ngore qhaug' byid: wa,.

⁴²Yao: bam: qho' zai mamyao nhao nae" qhid' mae" phyid' dam: mae" paung daung: joe" ra" jid: mo" lho daung: khyab' byid: wa,-

⁴³Yao: bam: qho' zai re phung" qhu" yang: se' pye' maqhug' geli nae" qhid' mae"- nga" qhid' kheim Zaung khyo vao ye: ko" au:- mangad: lao"- Gyang" lho" jo, qo mae caung da" byid nae" qhid' mae" phan khyo te' ye: ko" au:- Arun we' yao" yauggai zo: qe wa khonhae" re: ai: mai bau: jham re ve, ca" ako". Ceru wa Arun we' yao" myid:zo: qe: qhid' mae" gyag maqui" ra" thung" tarha" ngad: ra".