Read Maru PHAO: THUG' 3 Bible Online

PHAO: THUG' 3 - Maru bible

PHAO: THUG' 3

¹Daba mae Moshe wa yao" yaug pho" Midian khinjaung pho" Yethro nho: yao jham we' cad' be, jham re zam: zo" re" yao: wa aijham re din"pyad' yo khyo" keim" lo mung: gyang" lho" ra" Sina bam khyo joe" ye" ra".

²Aimae ASANG: mug: lagyo: dayaug wa mhin: paung" gaung: mae" myishae khug mae" yao: re li" na: qhu" byid' ra". Mhin: paung" mae myi: de; jo, ngadqere: mhin: paung" wa- manga" lo" rure Moshe myao: ra".

³Ceru wa daja: yao: ngad: ra" ga: yao: myid: jho: ra" mhin: paung" pe"mung: manga" lo" laug i? Ngo te' sho' ye: yang: yequ" nae"- ga" ra".

⁴ASANG wa Moshe te' li" na: rure myao lao"- yao: wa Moshe re thao" paung" agaung: mae" Moshe- Moshe- ga: yao: ra". Ailao" Moshe wa ngad va"- ngo cemae na: ga: tau" ra".

⁵Mao"So wa yao: re- dajhid' re: date' li" ni" khyid zhaung: khyad' pye' wa,- pe"mung:ga"re nao wa gyang" lho" ra" myid gaung mae ye; jo; ra".

⁶Ngo wa ni" phug' pho" qe ngad ko" ra" Abram- Isag- Yaku bam: Mao"So ngad:- ga: ta" ra". Airumung: Moshe wa Mao"So re tau: qu" nae" gyaug yang: yao" myo, khung: re nghoe' pye' ra".

⁷Ailao" ASANG wa- Egutu mung" mae nga" byumyu" qe khoqhi" xo sho' yhin" ru qhug' na ko" rure ngo myao va". Yao: bam qe keim" ra" jeim keim: mo; lo, mae" khyad' yu qhug' nae" qhid' mae" gyi: ngug: ra" thoe re ngo the' gyo: va". Ngo yao: bam nho: qug: khai: kham zo: rure ba: ra".

⁸Airumung: Egutu byu qe: lo, mae" yao: bam re khyad' yu nae" qhid' mae" we' Egutu mung" mae" ana" Khanan- Hiti- Amori- Perizi- Hivi- Yebusi byu qe na ko" ra" mug: khyo jhui" ye: nae" qhid' mae" ngo joe" gyo" li" ru ngad:-

⁹Ngo wa nga" byu qe gyi: ngug: ra" thoe re gaigai: yao: the' gyo: mung:- Egutu byu qe yao: bam re khoqhi" sho' deim" zag zo" na ko" rure ngo myao:-

¹⁰Nga" byu qere yao" mung"dan: khug mae" qo" jhui" thug' lo" nae" qhid' mae" ana" ngo wa nao re Egutu kho:kham pho" jhao" nhao: ke' nae"- ga: ta" ra".

¹¹Ngadqere: Moshe wa Mao"So re ngo wa pe" doe, yaug mangad:- ngo wa kho:kham pho" jhao" ye: mung: Israel byu qere Egutu mung" mae" khoru: qo" jhui" thug' lo" nae" i? ga: ta" ra".

¹²Mao"So wa ngo wa nao we' daga" na nae"- nao Israel byu qere Egutu mung" mae" jhui" thug' lo: lao"- Naonhaung" wa ce: bam mae ngore caung:pa" byid' li" genae"- ai wa nao re ngoyang nhao: ke' ru ngad: ru sagse: ngad: li" nae"- ga: tau" ra".

¹³Ngadqere: Moshe wa ngo wa Israel byu qejhao" ye" lo" mung: naonhaung" phug' pho" qenho: Mao"So wa ngore naonhaung" jhao" nhao: ke' ra"- ein: yeta" lao" Yao: bam wa yao" mang pe" ngad: i? ga: ngore myid' li" genae". Airu: lao"- ngo wa yao: bam re pe" qo" ta" nae" i? ga: phaug' tau" ra".

¹⁴Mao"So wa- ngo wa ngo ngad:- ga: yaug ngad: ra". Airumung: nao wa yao: bam re ngo ngad:- ra" ga: mhang" ra" yaug wa naonhaung" jhao" ngore nhao ke' ra" ein: ta" ca" ra".

¹⁵Yao: bam: phug' pho" qe ngad ko" ra" Abraham- Isag- Yaku bam nho: Mao"So ngad: ra". Ngo ASANG: yang nao re yao: bam jhao" nhao: ke' ru ngad: ra" khyo re Israel byu qere ta" kyo: wa,- ce wa apyad ato mae nga" mang ngad: ra". Ce: mang wa joe" nae" ra" pyad qae: mae" mo, alhab' yang mhang" genae" ra" mang ngad: ra".

¹⁶Israel byumyu" qenho: au: jhaung qere yekhai: zhang" yu mung:- yao: bam: phug' pho" qe ngad ko" ra" Abraham- Isag- Yaku bam: Mao"So ngad: ra". Ngo ASANG wa nao re li" na: qhu" byid' ra" khyo re yao: bam re ta" kyo: wa,. Ngo wa yao: bam jhao" joe" li" mung: Egutu byu qeyang yao: bam re pe" kad' na: rure the' myao va"- ein: ra" khyo yao: bam re ta" kyo: wa,.

¹⁷Ngo wa yao: bam re xo sho' yhin" ru qhug' na: ra" Egutu mung" mae" yao: bam re jhui" thug' lo" mung:- Khanan- Hiti- Amori Perizi- Hivi- Yebusi byumyu" qenho: mug: myid ngad: ra" mug: gai myid gai khyo yao: bam re jhui" lo" nae" qhid' mae" ngo myid: phyid' to: va".

¹⁸Nga" byu qe wa yao: bam re nao ta" ra" dao: re tae" gyo" li" genae". Airumung:- nao wa Israel byumyu" qenho: au: jhaung qe we' Egutu kho:kham jhao" ye: mung:- Hebre qenho: Mao"So ASANG ana" ngonhaung" nho: Mao"So ASANG re xeim: yengaui" byid: nae" qhid' mae" din"pyad' yo khyo sam ba gyaung: su" ye: nae" akhang" ngonhaung" re byid: la,- ein: yeta" ca" ra".

¹⁹Egutu kho:kham wa yao: re za: madeim" zag: jhan: jhan: wa naonhaung" re manhao: ke' nae" rure ngo ba: ra".

²⁰Ngadqere: ngo wa nga" qam: so' re ci mung: aimung" mae qu" gyaug qu" lhaung sho' ra" lo, mau" kad' yang: Egutu mung" re ngo qobo dae byid: nae". Ai: thao re yao: wa naonhaung" re nhao: ke' byid' li" nae".

²¹Nga" byumyu" qe thug' lo" ko" au:- yao: bam wa lo, keim mangad: genae" qhid' mae" ngo wa Egutu byu qeyang naonhaung" re phug' myao: nhao nae".

²²Israel myiqe: yaug khao: ngo" wa yao" nhao: Egutu yham kyo: cao: qejhao" we' yao: yao" yham mae na: jo, ra" Egutu myiqe: khoyaug jhao" ngadqere: ye: mung:- mai bau:- qhang- ngaui zai jham re yemho' yu: li" nae". Israel byu qe wa ai: zai jham re yao: bam: yauggai myiqe: zo: qere re shaung: te' byid: gemung:- Egutu byu qenho: jo,nho" jham re ci: thug' lo" li" genae"- ga: ta" ra".