Read Maru PHAO: THUG' 30 Bible Online

PHAO: THUG' 30 - Maru bible

PHAO: THUG' 30

¹Sheim nae pyo" ru ngha" nae" qhid' mae" qhoje; sag' yang phan dalam: kad' wa,-

²Airu wa byid khyug ngad ca" ra". Qhang phyao: wa dadaung"- lu phyao: dadaung"- myhao phyao: wa shid' daung" ngad: qo: ra". Byid khyug mae" khyug jham rere: sag' pye: dakhyaung: yang za: kad' ca" ra".

³Aire adao mae re:- ayae byid shad' geim" rere: khyug jham mae re: qhang: gyang" yang thab' pye' wa,- lhang" gam: mae qhang bug ke' wa,.

⁴Aire vo, nae" lo, zaui: qhang kheim" shid' lam: kad' mung:- qhang bug o mae aire vo, nae" gyang: yao: jhoe" zaui nae" ayae shid' shad' mae te' wa,.

⁵Ai: gyang: yao: shid' yao: re qhoje; sag' yang kad' mung:- qhang: yang thab' pye' wa,-

⁶Ce: phan re Dao: Thang" Ban" qhid' au: mae lhao" to" ra" qe, kyo pin: lung: taung gaung shad' mae to: wa,- ai: jo, qo mae nao re ngo li" qhug' nae".

⁷Ne seim khao: ngo" Arun wa myikaug' re caung nae" vao li" ra" au:- yao: wa ai: dao mae nae pyo" ra" sheim ngha" nae" ngad: ra".

⁸Myi" thao re myikaug' jham re myi: te' au: re: yao: wa dakhyo: za: kad' ca" ra". Ce: sheim nae pyo" ja: ngaui" byid' ru wa joe" lo nae" yo, khyin: alhab' mae abang mabyid xo' yang: kad' nae" mau" ngad: ra".

⁹Ce: phan dao mae tam" to" ra" sheim nae pyo: ja:- gug'nyhug' ngaui" xeim:- gaug zo ngaui" xeim: pe" daja: rere: da ngaui" byid: wa,- sabyi qang: xeim: rere: ai: dao mae davhe' sheim: wa,.

¹⁰Dazin mae dalhang Arun wa qobo qhid' mae" ngaui" byid' ra" gug'nyhug' mae" sa: re yu mung: phan khyug byid: lam mae sa: gyad byid' ra" khyo" yang- caung:pa" thung" we' sin yang: phan re kyang" san: ra" khyo re kad' ca" ra". Ceru re joe" lo nae" ayo, zin khao: ngo" re kad' ca" ra". Ce: phan wa ASANG ngore qhaug' byid' to" ra" bin sho' gyang" lho" ra" phan ngad ca" ra"- ga: ta" ra".

¹¹ASANG wa Moshe re-

¹²Byu japhin: gaug: na: ra" gyo: mae yao" au: dao mae kyi" khyag' ru majoe" li" nae" qhid' mae"- Israel byu qere nao byu japhin: gaug: yu: ra" au:- yauggai yaug khao: ngo" wa yao" kao so' qhid' mae" aphug' ngore byid: nae" ngad: ra".

¹³Byu japhin: mae bobo: ra" mo, yaug khao: ngo" wa qo: ra" nho" tarha" vao: ra" azhao" re cao" yang: ngaui lag byid: ca" ra". Ngo re qhaug' byid' ra" xeim: khyo" ceru re yaug khao: ngo" byid: qo: ra".

¹⁴Japhin: gaug: rumae bobo: ra" apyad shid' xe zin byang" ra" yauggai- mangad lao" shid' xe zin je: ra" yauggai yaug khao: ngo" wa cenho" ngore byid: nae" ngad: ra".

¹⁵Yao: bam: kao so' qhid' mae" ce: ngaui byid' au: jo,nho" qo" yaug re: magai: jan" byid:- myaung sho: yaug re: nang: yang: magai: byid: ngad: ra".

¹⁶Ce: ngaui re Israel byu qe mae" khyui: zhang: yu mung: ai: ngaui re nga" qhid' kheim: Zaung qhid' mae" ci ca" rumae yhung: nae" ngad: ra". Ce: khang: wa yao: bam: kao so' qhid' mae" aphug' ngad mung:- ngo wa yao: bam re gug: gam byid: nae" rure myid: beim: nae"- ga: ta" ra".

¹⁷ASANG wa Moshe re-

¹⁸Gyid: bo" jarung: dalam: re gyid: bo" tao" we' daga" kad' wa,- aire phan we' zaung agyo: mae to: mung:- aimae qid ke' to: wa,-

¹⁹Arun we' yao" yauggai zo: qe wa yao: bam Zaung khug khyo vao ye: nae" qid re- mangad: lao" zo:ve xeim: re qhaug' byid: nae" phan khyo te' ye: nae" qid re yao: bam: khyid lo, cid' rumae ai qid re ci genae" ngad: ra". Airulao"- yao: bam wa se' pye' ru maqhug' genae".

²¹Yao: bam mashid genae" qhid' mae" yao: bam: khyid lo, jham re cid' ca" ako". Ce: thung" tarha" wa yao: bam we' yao: bam: myid:zo: qe apyad ato mae phug' cao" genae" ra" thung" tarha" ngad: ra"- ga: ta" ra".

²²ASANG wa Moshe re-

²³Gai: thao" ra" nae pyo: ja:- Mura xau qang: byid joe: ko- nae pyo" ra" magyam shid' joe: ko- nae pyo" ra" phaung: qang: shid' joe: ko-

²⁴Kasia xau byid joe: ko- (alhab' re tarha" vao azhao" re cao" yang: lag) re yu mung:- zhanlun xau daga: lan: ke' mung: yang:-

²⁵Nae pyo" ra" xau we' dakhyo: lhag' mung: gyang" lho" ra" gyad xau re kad' wa,.

²⁶Ai yang nga" qhid' kheim: mae" Zaung- Dao: Thang" Ban"-

²⁷Saboe" we' yao" zai kug alhab'- myikaug' tao" we' yao" zai kug alhab'- sheim nae pyo" ra" ja: ngaui: byid' ra" phan-

²⁸Xeim: phad' ngaui" byid' ra" phan we' yao" zai kug alhab'- cid' ra" jarung: we' yao" ug' tao" jham mae gyad ra".

²⁹Ce: zai jham re ceru: ngore qhaug' byid: mung:- aijham wa bin sho' gyang" lho" li" genae". Dayaug yaug- mangad: lao" daja: ja: aijham re the' tin: gelao"- yao" gyang" lho" ru: nho: qam: so' yang yao: bam re dae te' li" nae".

³⁰Airumung: Arun we' yao" yauggai zo: qere- nga" mau" zo" mae khinjaung qekhyo" caung da" byid: genae" qhid' mae" yao: bam re xau gyad yang: lo, kai: byid: wa,.

³¹Israel byu qere- ce: gyang" lho" ra" gyad xau wa joe" lo nae" yo, khyin: mae nga" mau" zo" mae ci ca" ra" ein: ta" wa,.

³²Aire yu" yu" byu khag' dao mae re: magai: vhe' gyad nae" -nao wa pe" ja: rere: ce: azung re ci mung: magai: lhag' ngad: ra". Ai: ru wa gyang" lho" ru ngad mung: nao wa aire gyang" lho" ra" khyo" kad' ca" ra".

³³Ai we' dau: ra" khyo" kad' yaug khag' ngadqere:- mangad: lao"- khinjaung mangad' ra" yaug aimae" ci yaug khag' rere: nga" byumyu" dayaug ngad: ein: mamyid: yu byid: lo nae"- ga: ta" ra".

³⁴ASANG wa Moshe re- sheim nae pyo: ja: ngad ko" ra"- Natad gyid:- Onukha gyid:- Galbanum gyid:- Loban jham re dano" no" yu: yu wa,.

³⁵Aijham re sheim nae pyo: ja: re we' dakhyo: lhag' mung:- nae pyo: ja: kad' wa,- agyang" boe" jo,nae" we' gyang" lho" nae" qhid' mae" ai: mae xo: ke' wa,-

³⁶Aphaui: boe" sho' thaung" mhan" wa,- aire nga" qhid' kheim: Zaung khug khyo ci vao ye: mung:- Dao: Thang" Ban" qhid' au: mae sin: wa,- Bin sho' gyang" lho" ra" khyo"- ce: nae pyo: ja: re kad' wa,.

³⁷Yao: yao" qhid' mae nae pyo: ja: re ai: azung re yao: ci yang: dakad' yu ge,- ngore qhaug' byid' to" ra" gyang" lho" ra" ja: we' dakhyo: kad' ge,.

³⁸Byu dayaug yaug nae pyo" ra" ja: khyo"- aire ci yang: kad' yu: ngad: re- yao: re nga" byumyu" dayaug ngad: ein: mamyid: jho: yu byid: lo nae"- ga: ta" ra".